EZEKIEL 43 - SHEEYU BAIBEL (BSI)

Mapao nou Rathoki hi Dakhai Veyu

¹ Mai nanou Eye teinghi palova rei-a buyu rokhubomü hisü sa-a loure,

² ae Enou teinghei palova nou Israel maivei Ramai vei khouko ava nasü va-a nou zhingao-e. Ramai vei paikho hai zai hi dzü nghouyu büe, ae puhvei khouko ava sünou deiphao sü valoure.

³ Zho ngaoyu haina hai Enou raichoki Ramai nou tave Jerusalem souhayu phaki ae Kebar Reipe hinou ngaoyu zho bütoue. Süthaisü Enou deiphi hi apei pfüa nakou loure.

⁴ Ramai vei vavei shoyu ava nasü teinghei palova rokhubomü hinou Rathoki hisü taloure.

⁵ Mapao vei rako nou Eye saloua chikubu khevai sü sapoa nou loue, ae Enou Rathoki hisü Mapao vei khouko ava sünou lou phoutao-a buyu sü ngaoe.

⁶ Mai nanou ape hinou la-a nou bue, ae Rathoki hinou Mapao nou ahi haibüa paoe,

⁷ “Thai-a bailaiyu mainare, avei vebuh sü haihi bue. Enou Israel maitaoye koa hai hinou hrülai ae teisa nou puletaoye khasa-a hrülai. Israel maitao nou moa puletao vei vemaitao nou rah kukheye thota-a moyuma puletao vei vemai thaiphao sü hai hi daovu peia avei sheeyu zhih nasü souzhai peipu khailai more.

⁸ Vemaitao nou puletao vei bomü ae deka khesü avei Rathoki vei bomü ae dekatao nghitei-a sholoure, südonou ahai kohisü kivo likhei baire. Puletao nou avei sheeyu zhih sü ngaorayu vah haso tyatyali soupeia nou souzhai peiwure, südonou avei lekha rarou hinou Enou puletaoye sü souhare.

⁹ Chuo puletao nou basharatao hai thoyu bailouzü ae puletao vei vemaitao thaiphaotao hai polai louzü Enou puletaoye koa teisa nou hrüzho-a bailai.”

¹⁰ Mapao nou haibüa paopue, “Thai-a bailaiyu mainare, Israel maitao hisü Rathoki donou paopeio ae puletaoye panou süna vanou tsücho khaio. Puletao nou mahmo soupfükhai touyu donou pa hraongu sü pfükhaio.

¹¹ Süthaisü puletao nou soupfü khaitouyu donou hraongu pfüa bulouzü, kabüa Rathoki nasü soulai touyu hai puletao hi paopeio: daizhai hinou soulai, kabüa kikha talou tapalai touyutao, dushoyutao, daidai loulai touyutao, alia sühi soupfüre chikha teitei hai paongao peio. Sütao veishi hai puletaoye panou ngaoloua soudaloure donou ae chikha thaifüa souloure donou rükhai peio.

¹² Haisü Rathoki vei chikha-e: Deichi peitao alia süpehao teitei hai shesha toue.”

Posheelabu

¹³ Posheelabu vei doukhai touyutao sü haitao-e, haisü Rathoki poa douyu dousüü nanou poa doukhai toue. Posheelabu beiphi veishi hisü sentimiter raingou thoue, ae sentimeter raingou dua nou soukhaitoue, alia khupe teitei hisü sentimiter kaingou kua nou khahaovü khaitoue.

¹⁴ Posheelabu teikhai hi koute, süsü beiphi hinou poa peitaoh hi khete hai mitar ali ku-e. Süthailo tao hai pehao veishi hai sentimitar raingao nou soukhaitoue ae mitar ahai ku-e. Sünavei thailo-a sentimitar raingou dua nou souhaovü khaitoue.

¹⁵ Posheela khesü meideire donou soukukhe khaitouyu hai mitar ahai ku-e. Kainghou adai hinou tsülare süü thoukhai touyu adaitao hai peitao hinou soukhai touyu jünou kupu hie.

¹⁶ Posheelabu vei phao sü sa-jha-a raibütoue, mitar churou-rou bue.

¹⁷ Sho touchü na-a sa-jha raibütoue, mitar anai sa so-e, mitar anai jha due, ae süpehao veishi hisü sentimitar kaingou kua nou khahaovü khaitoue. (Phihea buh hai sentimitar raingou dua nou soukhai toue.) Posheelabu hi taloure phiheadou hai teinghi palova nou soukhai toue.

Posheelabu Sousheeloua Peithouyu

¹⁸ Ramai Mapao nou ahi paoe, “Thai-a bailaiyu mainare, Enou ne hi paoyu sü keilo. Posheelabu souche louzü, haina phao hinou posheela khesü poa meideilo ae souzhe sü haina hi kavu peia nou sousheeloua peithoulo.

¹⁹ Levi vei khü hinou hrüveyu Zadok vei tyaosholea hinou napao soua buyu maitao nou avei nghoujü hinou kuvah sü soua bailai. Ramai Mapao Enou haisü kharochi peiwe. Neletao nou chode ali hai mah vei posheela soua posheela peio.

²⁰ Nenou souzhe daotuli hai poloua posheelabu vei kainghou adai hi napeilai, ae posheelabu vei sho touchü hi kainghoutao alia khupe veishi hisü zhe napeilai. Haizhaibüa nenou posheelabu nasü sousheeloua peithou loulai.

²¹ Nenou mah vei posheela peikhai touyu chode nasü poloua Rathoki vei fühao vakou hi popaloua buh ali hinou poho meidei peilai.

²² Thainesho sü chaalia taomoyu nghitu ali hai poloua mah vei posheela soua posheela peilai. Souzhe sü poloua posheelabu nasü chode vei zhe nou poa soushee peiyu bütoua soushee peio.

²³ Nenou haibüa soulou cheyu thaisü, chode ali ae zhaotsü ali polo, sünahai sü chaalia taomoyu noulai,

²⁴ ae ahi pove peio. Napao maitao nou tai poloua kavu peilai ae süna ahai sü Eye meideia posheela peio.

²⁵ Teithe anai koute hai teithetsü nou nghitu ali, chode ali ae zhaotsü ali hai mah vei posheela soua posheela peio. Sütao teitei hai chaa hayu noulai.

²⁶ Teithe nai hai napao maitao nou posheelabu nasü soushee peia panou poa vah soutare donou souda khaipeilai.

²⁷ Hapta süna cheyu phaki, napao maitao nou posheela hinou meidei-a posheela peiyu ae chavei lathao-a buloure vei posheela hai posheela peilai. Süthaisü Enou neletao vei posheela hai jüpa-a popeilai. Ramai Mapao Enou haisü paowe.”