EZEKIEL 2 - SHEEYU BAIBEL (BSI)

¹ “Thai-a bailaiyu mainare, lashulo Enou neye cha nüwe.”

² Pai sünasü rao-a buyu teile hinou Ramai vei rako sü ahi louloure ae Eye polashu peiwure ae haibüa chi paopuyu sü Enou choue.

³ “Thai-a bailaiyu mainare, Enou neye sü Israel maitao hi seitalai. Puletao hai Eye khaityare alia ahinou tavai tare ae chu koute Eye puletao vei puopaoh maitao büa nou du-a bure.

⁴ Puletao hai rochi shore ae Eye tsükhou peimoe, südonou Khoukhoulai Mapao Enou haibüa paowe touyu nasü neye panou puletao hi pao peire donou Enou neye puletao hi seitalai.

⁵ Khaityayu maitao nou nevei chipao sü keipei-a keipei moyuma puletao vei hrohisü rachipaola peiyu mai bue touyu sü puletaoye panou süloulai.

⁶ “Ana thai-a bailaiyu mainare, ne puletaoye ngaopiso, moa puletao vei chipao khesü piso. Puletao nou neye paoshilai ae ngaoralai; puletaoye koa hrüyu hai tushi shoyu chuhlyakhaoye koa buyu bütoua bailai.

⁷ Enou ne hi paopeiyu chipao khesü puletao nou keipei-a moa keipei moyuma puletao hisü paopeio, puletao hai rochi-a khaityayu maitao baie touyu hai licholo”

⁸ “Thai bailaiyu maipure, Enou ne hi paoyu chipao khesü keilo, Enou neye peilaiyu nasü ne mü hepalou-a sünasü touthoulo”

⁹ Enou bah ali hai ahilo thaikouyu sü zhingao-e ae bah sünasü larübvü ali poa nou bue.

¹⁰ Puhnou larübvü nasü ahi houpa ngao-e ae sühisü levea krayu, dopfüyu ae leyu khesü rüthou khaitoue.