EZEKIEL 16 - SHEEYU BAIBEL (BSI)

Jerusalem nou Chilee Cheche Moyu

¹ Mapao nou ahi haibüa nou paopue,

² “Thai-a bailaiyu mainare, Jerusalem nou daizhou koute ngaorayu vah haso khesü soua buyu sü popa ngaopei khaio.

³ Mapao Ramai nou Jerusalem donou haibüa pao-a nou bure tea paopeio: “Neye sü Kanaan maivei teidei hinou naloue, Ne puo hai Amor mai baie, ae ne pfü hai Hit mai-e.

⁴ Neye nayu phaki, mailinoua nevei larai sü rode peimoe, moa neye sü dzü khüshee peimoe, moa neye tai napeia sah nou poa züpei moe.

⁵ Mailinoua neye leshi-a nou vah hai khesü soupei moe, neye nalouyu phaki, mailinoua neye sü leshi peimoe. Neye sübüa deiphi hi laikhai toua nou bubaie.

⁶ “Enou tave neye ngaoyu phaki, ne hai lah nevei zhe hinou danapfüa nou bue. Neye sü zhe nou hopfüa nou bue, ana Enou neye sü panou sübüa thai moe.

⁷ Veishoyu poube ali büa Enou neye sü panou vipaloue. Nenou dusho paloua püphao vei shoyu naotumai ali souloure, nevei naonao hai veisho-a nou paloue, ae nevei peishu hai shokouloue, ana ne sü baitoua nou bua baie.

⁸ “Enou dakhai vepuyu phaki, ne hai leshi lou veiyu teile hi pa-a nou ve ngaoloue. Baitoua buyu nevei pfüphao hai avei zhao nou poa nou neye hopeie, ae Enou neye leshi peilai tea chaachou sü soupeie. Enou neye nalai tea shanghi souyu vei vo sü soupeie ae ne sü avei souloure.” Haibüa nou Ramai Mapao nou paoe.

⁹ “Süthaisü Enou dzü poloua ne va hi zhe taoyu khesü khüshee peie, Enou neye oliv theadzü napeie.

¹⁰ Sahcha veishoa daothou khaitouyu sah nou neye banaopeie ae souhee veikayu tyanou soukhai touyu phikha sü neye noupeie, Enou neye züzüyu sah ae soumai sah nou banou peie.

¹¹ Mutei shoa soukhai touyu zhusana khesü Enou ne bah hi thoupeie ae ne te hi toupeie.

¹² Enou ne nghou hi nghoukha thoupeie, ne noubei hi noubo thoupeie ae ne pei hi hüvei shoyu vepeirü rüpeie.

¹³ Sübüa neye panou shahu ae sana nou soukhai touyu zhusana khesü panou toupfüe, ae sabanü sü veikhayu züzüsah ae soumaisah nou teisa nou banouwe. Neye panou sou veikayu tyanou soukhai touyu raokhao, laivoudzü ae oliv theadzü sü panou toue. Nehai hüvei shopare ae ne vemaipfü ali souloure.

¹⁴ Nenou hüveiyu hai tyahrü hrülai hi zhih tashore, daiolouzü Enou neye leshi shopeia nou neye souliche peie.” Haibüa nou Ramai Mapao nou paoe.

¹⁵ “Ana nenou nevei hüveiyu nasü louche loure ae nevei zhih tayu donou ne sü khakha tare.

¹⁶ Nenou nevei sabanü daotuli hai poloua rathobuh hi zhainga southouloue ae buh sühinou ne hai khakhapfü ali büloua mai veishi sü sabue. Haibüyu hai raichoki vepakhai toumo hie ae haithai-a vepalai moe.

¹⁷ Enou ne hi peikhai touyu shahu ae sana nou soukhai touyu zhusana khesü nenou poloua poutumai zhurai sü souloure, ae nenou sütaoye koa nou vah ashi sü soutare.

¹⁸ Enou ne hi peiyu sahcha veishoa daothou khaitouyu khesü nenou poloua zhurai soukhai touyu khesü banaopeie ae oliv theadzü alia poukai nüvei Enou ne hi peikhai touyu khesü nenou poloua basharatao hi peiwure.

¹⁹ Enou neye touso sü peie, veikayu sou, oliv theadzü ae laivoudzü peie, ana nenou sütao hai basharatao vei jüpa souloure donou posheela peiwure.” Haibüa nou Ramai Mapao nou paoe.

²⁰ “Süthaisü Enou neletao hi nahnaotu nahpoutu peikhai touyu khesü neletao nou basharatao hi poa meidei-a sheela peie. Neletao nou ahi chilee cheche moyu nasü khabai mowu?

²¹ Avei nahmaitaoye poa basharatao hi posheela peimoyuma,

²² nenou khakhapfü ali soua ngaorayu hrü hi hrüa buyu teile hi nenou bakha ali koute-a ne taibuki kabüa hrüpa-e touyu hai lichokhai toumoe, nenou baitou tea zhe hinou danapoa buyu nasü lichokhai timoe.”

Khakhapfü ali büa Hrüyu Jerusalem

²³ Ramai Mapao nou haibüa paoe, “Ne sü daizhou koute vealaisa! Daizhou koute vealaide sarou! Nenou vah ashi veishi sü soure, ae süthaisü

²⁴ ludu pe teitei hinou nenou basharatao thore buh khesü souloure ae khakhatare.

²⁵ Nevei hüveiyu nasü konai hi pothou nai neawure. Khakhapfü ali büa newo takou takheyu mai teiteiye panou sazü sabua baire.

²⁶ Reshi sho-a buyu nevei kinapa Ejipt maiye panou neye sazü sabua ae nenou khakha-a chaozü laiyu nanou avei lekha sü soupa peie.

²⁷ “Chuo Enou neye tudeere donou abah sü lashu laire ae Enou neye shiha peikhai touyu khesü podakhai loulaire. Enou neye sü nevei hrü ashi nasü ngaora-a nou buyu Philistin mai bah hi thaothou peiwure.

²⁸ “Nenou mai kukhe hi rukhayu sü hayu donou Assaria mai thaihu tare. Nehai puletao vei khakhapfü soutare ana puletao nou neye rukhayu sü soupei moe.

²⁹ Nenou huha soua buyu Babilon mai vei khakhapfü souta-e ana puletao-a neye sü rukhayu hai soupei moe.”

³⁰ Ramai Mapao nou haibüa paoe, “Nenou hrao ali-a ha-a nou khakha-a chaozü laiyu vah haitao veishi sü soure.

³¹ Ludu pe veishi hinou basharataoye thoyu buh sü soukhai loure ae khakha tare. Ana ne hai khakhapfü kukhe maitao büa pousha vanou khakha tamoe.

³² Ne hai naotumai ali nou maipuoye leshi moa vakou mai hinou khulou vah souyu raibütou-a baie.

³³ Khakhapfü ali louzü pousha peiwe ana ne louzü neye leshiyu maiye sü sapeina peiwe ae seihla peia panou neye sazü sabu peie.

³⁴ Ne hai khakhapfü kukhe mai jünou tyaku hie, mai linoua neye panou khakhare donou soumoe. Neye sü mainou muma peimoe; nenou puletaoye peiwe. Südonou ne hai mai jünou tyaku hie.”

Ramai nou Jerusalem ye Tudeiyu

³⁵ Jerusalem, khakhayu pfüpai, chuo Mapao nou paoyu sü keilo.

³⁶ Ramai Mapao nou haibüa nou paoe, “Ne hai khakhapfü ali büa nevei sabanü sü pheipaloua nenou jüpayu mai hi ae ngaorayu basharatao hi pfüphao hai sü peiwe ae nevei nahmai khesü southaloua basharatao hi posheela peie.

³⁷ Haivanou raichoki nenou jüpayu mai alia ngaorayu mai hrülaiye sü Enou save jüloulai. Enou puletaoye panou neye sühao loulai, süthaisü nevei sabanü khesü Enou phapeiwua nevei baitou touyu sü puletaoye panou ngaolai.

³⁸ Nenou khulou souyu donou ae maiye southayu donou ne pei hisü Enou chikulai, ae avei lekha rarou sünou neye sü athai vei tudee nasü peilai.

³⁹ Enou neye sü puletao vei bah hi thaothou peilai ae puletao nou nevei khakha-a chaozü laiyu buhtao ae basharataoye thoyu buh khesü souphe soupho laiwulai. Puletao nou nevei sabanü ae zhusana khesü poloua neye panou baitoua thaokhai-a bailai.

⁴⁰ “Puletao nou neye ngaobayu maitaoliye saveloua panou neye chuh nou deilai, ae puletao nou neye sü khoche nou daosasa khaiwulai.

⁴¹ Puletao nou nevei ki khesü meidei laiwulai ae neye tudee peiyu hai panou naotumai tao nou zhulai. Enou neye panou khakha-a chaozüpu laimoe ae neye panou nevei leshiyu maitao sapeina khesü peipu khailai moe.

⁴² Süthaisü avei lekha rarou nasü khaita bailai ae E sü kaonaphi tea nou bua bailai. Enou lekhapu khailai moe ae ngaorapu khailai moe.

⁴³ Ne nahle buki Enou kabüa neye kikopa peie touyu hai sü nenou ngaiwure ae nenou vah ashi khesü soupeia avei lekha hai soupa peie. Südonou Enou neye haibüa paokha peiwe. Nenou vah ashi souyu pei hinou ne daisounou khakha-a khulou souyu sü southoupuwe?” Ramai Mapao nou haisü paowe.

Pfüye Raiyu Nahnaotupai

⁴⁴ Mapao nou paoe, “Maikhe mainou nada hai nasü Oh Jerusalem, neye donou paolai: ‘Pfü raiyu nahnaotupai.’

⁴⁵ Ne hai cheche vujünou ne pfü nah naotupai-e. Honapai nou lah puhvei maipuo ae nahmaitaoye sü ngaora-e. Ne hai ne tupfü raibütoue, lah maipuoye ae nahmaitaoye ngaorare. Ne ae nevei jüraipai vei nuhdutao vei pfü hai Hit mai-e ae puo hai Amor mai-e.

⁴⁶ “Nevei jüraipai hai puhvei nahnaotu maitaoye koa reilova nou hrüyu Dameria mai-e: ae ne thaihoupai sü khelova nou puhvei nahnaotu maitaoye koa hrüyu Sodom mai-e.

⁴⁷ Puletao nou hrüyu zhai büa nenou hrülouzü ae puletao nou ngaorayu vah souyu büa souyu sü ne jüpawu? Moe, teile daotuli hinou ne sü puletao jünou shipu sho-a nou soupfüre.”

⁴⁸ Ramai Mapao nou paoe, “E cheche vujüa hriyu thaifüa, nevei tupfü Sodom ae puhvei nuhtao hai nenou vah ashi souyutao hai soumoe.

⁴⁹ Honapai ae puhvei nahnaotu maitao nou khaophu sü soue, daiolouzü puletao hai touso sü alao bua baie ae kaonaphi tea nou hrüa bubaie, ana puletao nou touhayu mai ae lülou hoyu maiye sü zhupei moe.

⁵⁰ Puletao hai khaophu soue, ae rochi sho-e alia Enou ngaorayu vah khesü soupfüe, südonou Enou puletaoye sü souhawure touyu hai nenou veisho-a nou süwe.

⁵¹ “Samaria nou mah souyu hai nenou souyu dali koute-a soumoe. Nenou puh jünou shipu sho-a ngaorayu vah souyu khesü soupfüre. Nenou mah souyu khesü zhulouyu phaki, nevei tupfü maitao hai mah hayu büa bubaie.

⁵² Chuo nenou veahoyu sü ngaolaire, daiolouzü nenou mah souyu hai puletao jünou pousho loure ae puletao hai ne hinou mah hayu mai büa buloure. Südonou chuo hraoloukhaio, ae hao sü pfülo, daiolouzü nenou nevei tupü maitao hai panou mah hayu mai büa zhingao loure.”

Sodom ae Samaria ye Podakhai loure

⁵³ Mapao nou Jerusalem hi haibüa paoe, “Enou Sodom ae puhvei nuhtao alia Samaria ae puhvei nuhtao hai sousavapu peilai. Enou ne-a sousavapu peilai.

⁵⁴ Ne sü hrao hraodu pfüa nou bulai ae nevei kaozhou ashi alia veahoyu nasü nevei mitomaitao nou ngaoloua puletao hai vei-a nou bubaie tea lesava-a nou buloulai.

⁵⁵ Puletao hai kaozhou aveih sü ngaopuloua sava-a nou bulai alia nevei nuhtao-a panou savayu sü ngaodakhai loulai.

⁵⁶ Nenou sava-a khaophu soua buyu teile hi nenou Sodom sü konü movu,

⁵⁷ ae nenou vah ashi soukhai touyu khesü popa ngaopei mojü nenou puletaoye jünü mowu? Chuo ne-a puletaoye raibütou loure. Neye ngaora-a buyu nevei kinapa Edom mai ae Philistin mai nou neye konüa nou bure.

⁵⁸ Nenou kaozü moyu vah ae ngaorayu vah khesü souyu donou ne sü veahoyu hai daolai.” Mapao nou hai sü paoe.

Teisa nou Bure vei Vo Ali

⁵⁹ Ramai Mapao nou paoe, “Nenou jüpayu thaifüa Enou neye sü soupeilai, daiolouzü nenou soulai tea paokhai touyu nasü ngaophou more ae nenou vo soukhai touyu nasü pfüthowure.

⁶⁰ Ana E louzü ne nahle-a buki neye koa vo soukhai touyu nasü tsükhou-a khaipeilai ae Enou vo sünasü teisa vei soure donou soupeilai.

⁶¹ Nenou soufü khaitouyu vah khesü licho louyu phaki, ae Enou nevei jüraipai ae thaihoupaiye sa-a dakhai veyu phaki ne sü hraongu pfüa nou bulai.

⁶² Enou neye koa vo soukhai touyu nasü soupu peilai ae nenou E hai Mapao-e touyu sü süloulai.

⁶³ Nenou soumah khaitouyu teitei sü Enou khaipeilai ana nenou sükhesü licholoulai ae ne sü hao haodu pfüa ne mü hai ngepapulai moe.” Ramai Mapao nou haisü paowe.