EZEKIEL 12 - SHEEYU BAIBEL (BSI)

Rachipaolawo nou Shetumai Soutayu

¹ Mapao nou ahi haibüa paoe,

² “Thai-a bailaiyu mainare, ne sü khaityayu maitao hrohinou bue. Puletao hai ngheithou bue, ana halia ngaolou moe, puletao hai noubei pfüwe, ana halia choulou moe, daiolouzü puletao hai khaityayu mai baie.

³ “Chuo thai-a bailaiyu mainare, vakou nüpoa tayu mai ali nou koupo pfüloua tayu zhai bütoua nevei kou sü souloua teimai mojünou takhai-o. Nenou tapayu phaki, mai hrülaiye panou neye zhingaolo, ae nenou buh kukhe ali hi veyu hai-a panou ngaolo.

⁴ Puletao vei ngheingao hinou nüpoa tayu mai ali nou koupo soupfüyu bütoua hea teiva-a buyu teile hinou nevei koupo sü soulo; ae nüpoa tayu mai ali büa koukhe hai puletao vei ngheingao hinou takhaio.

⁵ Puletao nou neye zhi-a buyu hinou nevei ki sü kivo hinou dakholo, ae nevei na sü sühinou popalo.

⁶ Puletao vei nghingao hinou nevei kou nasü ne phaova popa khailo, ae nevei nghithou sü doloua teizhi hiloua talou khaio, daiolouzü nenou kalova tawe touyu sü nenou ngaolai moe. Nenou hai zhai büa Israel maiye donou soupi peiyu ali soulai.”

⁷ Mapao nou ahi soukhaio tea paoyu sü Enou soupeie. Süzhou teithe Enou nüpoa tayu mai ali nou nado souloua tayu büa souloue, ae koukhe teimai loutayu phaki Enou kivo sü abah nou soucha loua sühinou E sü tare. Mai hrülai nou eye zhua buyu hinou Enou sahkou nasü aphaova popaloua Enou tare.

⁸ Thainesho hai Mapao nou ahi haibüa paoe.

⁹ “Thai-a bailaiyu mainare, chuo rulayu Israel maitao nou nenou souyu vah sü daivanoue tea noua bure.

¹⁰ Ramai Mapao Enou ne hi paopeiyu khesü puletao hi paopeio. Chipao hai nasü Jerusalem hi veo vei nahpoutu ae sühinou hrüa buyu mai hrülaiye donoue.

¹¹ Nenou soupfüyu hai puletao hi vepare vei shee soungaowe tea puletao hi paopeio. puletaoye hukhamai soua vakou nüpoa ta-a bailai.

¹² Puletaoye khasa-a buyu veo vei nahpoutu sü puhvei naazao hai puh phaova popa pfüloua kivo hi qulu soucha khaitouyu hinou tutsütalai. Puh vei ngheithou sü zholoulai ae puhnou daiki talai touyu hai ngaolai moe.

¹³ Ana Enou puhye sü avei khahbesah nou beloua bailai, ae puhye sü rüh hinou muloulai. Süthaisü Enou puhye Babilon vei nuhdu hi sapoa ve khai-a bailai, ae sühinou puh sü ngaomoa thaita bailai.

¹⁴ Puhvei chiku-apei maitao, paodou peiyu maitao ae puhye reikhao soupeiyu mai hrülai hai hupho rarou laiwulai ae maikhe mainou puletaoye sü southare donou phoutalai.

¹⁵ “Enou puletaoye tyahrü kukhe maitao hi ae vakou maivei tyadeitao hi soupho rarou khaiyu thai, puletao nou E hai Mapao-e touyu hai süloulai.

¹⁶ Enou mai daotuli panou soureih hinou, rahta rahvu hinou ae sounou ashi souyu hinou vupa peilai, sübüa puletao nou taho hrüa buyu tyahrütao hrohinou puletao nou soupfü buyu vah haso khesü daizhou koute ngaorayu vahsa ae E hai Mapao-e touyu sü panou süloulai.”

Rachipaolawo nou Nguhrührüyu vei Shee

¹⁷ Mapao nou ahi haibüa paoe,

¹⁸ “Thai-a bailaiyu mainare, nenou ha touyu phaki nguhrührülo, ae dzü keyu phaki ngaopi-a nou ngulo.

¹⁹ Tyahrü hrülai hi Ramai Mapao vei chipao hai na hai Jerusalem hi hrüa buyu maitaoye donoue tea paopeio: Puletao nou ngurürüa nou ha toulai, ae ngaopi shopoa nou dzü sü kelai, daiolouzü teidei sühinou hrüa buyu maitao nou vah ashi souyu donou puletao vei teidei sü soushi souhawulai.

²⁰ Chu mai alao soumoa hrüa buyu nuhdu khesü souhawulai, ae puletao vei teidei panou mai hrümoa heihro vaohro souwulai. Süthaisü puletao nou E hai Mapao-e touyu sü süloulai.”

Maisou nou Jüpayu Nada ae Jüpamoyu Chipao

²¹ Mapao nou ahi paoe,

²² “Thai-a bailaiyu mainare, Israel mainou daisounou nada haina sü paoe: ‘Teithe teile sü tare ana vepalai tea paopeiyu khesü halia vepa more.’

²³ Südonou chuo Ramai Mapao Enou nada süna vanou haibüa paowe tea paopeio. Enou nada sünasü panou akhai soulaire. Israel maivei teidei hisü panou sübüa paopu khailai more. Süna thao sü puletao nou haibüa panou paolai: Teithe teile sü vere ae vepalai tea paopeiyu khesü cheche-a nou vepare!

²⁴ “Israel maitao hisü panou da-a zho ngaoyu ae cheche moa rachi paoyu sü bupulai more.

²⁵ Mapao Enou puletaoye sü chakulai ae Enou paoyu khesü soupeilai. Vepalai tea paopeiyu khesü panou ponapu khailai moe. Khaityayu maitaore, neletao vei teile hinou Enou paopi peiyu khesü Enou neletao hi soupeilai. Haisü Ramai Mapao Enou paowe.”

²⁶ Mapao nou ahi paoe,

²⁷ “Thai-a bailaiyu mainare, nevei zho ngaoyutao ae nenou rachipaola peiyutao hai haithai naki donou baie tea Israel maitao nou tsücho-a nou bue.

²⁸ Südonou Ramai Mapao Enou haibüa paowe tea puletao hi paopeio: Avei chipao khesü ponapu khailai more. Enou paoyu khesü souvete peilai. Haisü Ramai Mapao Enou paowe.”