EZEKIEL 10 - SHEEYU BAIBEL (BSI)

Mapao vei Khouko Ava Rathoki Thaokhaiwua Tayu

¹ Süthaisü Enou zhuyu phaki, shouh pfüyu khaonatao pei hinou haorüa buyu phao hinou mutei chuh nou soukhai touyu vebuh ali büa zhingao-e.

² Züzüyu sabanü banaoyu maina hisü Ramai nou haibüa paoe, “Shouh pfüyu khaonatao khe hinou buyu lukiphitao kohisü taloulo, ae sühinou meithou sü nebah nou poloua nuhdu hisü porao peikhaio.” Puhnou tayu sü Enou zhua nou bue.

³ Puhnou tayu phaki, shouh pfüyu khaonatao hai Rathoki vei khelova nou la-a nou bue, ae Rathoki khevai hai teihao nou phoutao loure.

⁴ Mapao vei khouko ava sü shouh pfüyu khaonatao hinou tapaloua Rathoki hi taloure bomü hisü loutare. Süthaisü teihao nou rathoki teitei hai phouloure, ae Rathoki hai Mapao vei khouko ava sünou vapha loure.

⁵ Khaonatao vei shouh phayu kho hai kijü hia choupawe, ae kho süna hai Hali Hala Soulousüo Ramai vei pai kho büe.

⁶ Züzüyu sabanübanaoyu maina hi Mapao nou shouh pfüyu khaonatao vei lukiphi hinou talou meithou polo tea kharochi peiyu thaifüa maina nou lukiphi ali hi talou laloure.

⁷ Soukhaona ali nou puh bah sü mei buyu hisü thaithou loua züzüyu sabanü banaoyu mainaye meithou daotuli hai popa puh bah hi thoupeie. Mai sünanou meithou sü poloua tare.

⁸ Soukhaona sütao hai mai bütoua puletao vei shouh khevai nou bah hai pfüa Enou ngao-e.

^9-10 Enou sütao hi lukiphi adai bua nou ngao-e ae sütao hai raibütoua baie. Lukiphi sütao hai chuh muteiyu tyanou soukhai touyu bütoue ae lukiphi sütao hisü lukiphi chekhei nou taopa poa nou bue.

¹¹ Puletao nou tayu phaki, holo hailo reimoa buh tarali hia taloua baiwe. Puletao koa nou tanüyu buh veishi hisü taloua baie.

¹² Puletao vei pfüphao, phao, bah, shouh, ae lukiphi teitei hai ngheithou nou hopfüa nou bue.

¹³ Lukiphi haitao hai Enou raichoki zho kounou ngaoyu lukiphi bütoua baie.

¹⁴ Soukhaona alihi nou pah adai pfüwe. Zhu arai na hai chode pah pfüe, ahai chena nou mai zhu pfüwe, asü nanou souveo zhu pfüwe ae adai nanou leche zhu pfüwe.

¹⁵ (Soukhaona haitao hai Khebar Rei hinou Enou ngaoyu soukhaona sütao raibütoue.) Soukhaona sütao nou ratei hi kukhe tayu phaki,

¹⁶ Lukiphitao-a puletaoye koa ta-a baiwe. Soukhaonatao nou shouh pfüa zhaotayu kisü lukiphitao-a koa ta-a baiwe.

¹⁷ Soukhaonatao nou chaoyu phaki, lukiphitao-a chao-a baiwe ae soukhaonatao nou zhaoyu phaki lukiphitao-a puletaoye koa tawe, daiolouzü soukhaona sütao nou lukiphi hai khasa-a tawe.

¹⁸ Süthaisü Mapao vei khouko ava nasü Rathoki thaokhaiwua shouh pfüyu soukhaonatao pei hi koutare.

¹⁹ Soukhaonatao nou puletao vei shouh sü hepaloua zhaotare ae lukiphitao-a koa nou tare. Puletao nou teile daotuli hai Rathoki vei teinghi palova rokhubomü hinou chao-a nou bue ae Mapao vei khouko ava nasü puletao vei phao hinou bue.

²⁰ Soukhaona sütao hai Enou Khebar reipe hinou Israel maivei Ramai khehinou ngaoyu soukhaonatao raibü toue.

²¹ Soukhaona sütao hai pah adai-dai pfüwe, shouh adai-dai pfüwe ae puletao vei shouh khehinou maivei bah bütoua nou bue.

²² Puletao vei pah hai Enou Khebar Rei pe hinou ngaoyu bütoue. Soukhaona sütao hai nghoujülo zütou tea ta-a baiwe.