ESTHER 9 - SHEEYU BAIBEL (BSI)

Jihudimai nou Veilouyu

¹ Khouh kiahai nava, Adar khouh khoukha kiasü zhou hai veo nou kharochi shapao peiyu na thaifüa, süzhou teithe hai Jihudimai ye ngaobayu mainou veilou süre tea areih buyu nahai, Jihudimai nou puletao jünou veilouyu teithe ali soua baire.

² Jihudimai nou puletao ye ngaobayu maiye duloure donou veo Xerses vei vedei hi buyu nuh teitei hisü puletao nou ve meme souloure. Mai ali koute-a puletao nghoujü nou lalou hore, daiolouzü mai hrülai nou puletao ye sü ngaopi loure.

³ Vedei khehinou buyu adusomai, peikhomai, alia veo vei fühao hinou peichamai hrülai nou Mordekai ye ngaopiyu donou Jihudimai ye soukha tare.

⁴ Daiolouzü Mordekai hai chuo veo vei vedei hinou khouko pfüshoyu mai ali soure, alia vedei teitei hisü puh zhih hai tashore; alia Mordekai hai khouko ngaopu khaikhai pare.

⁵ Südonou Jihudimai nou puletao ye ngaobayu maitao ye sü khoche nou daothawure alia puletao nou jüpana thaifüa souhawure.

⁶ Susa nuhbei litou hinou Jihudimai nou puletao ye ngaobayu poutumai kraingou hai southaloue.

⁷ Puletao nou southayu hi louyu maitao hai Parshandatha, Dalphon, Aspatha,

⁸ Poratha, Adali, Aridatha,

⁹ Parmashta, Arisoa, Aridai, Veizatha,

¹⁰ alia Jihudimai ye ngaobayu Hammedatha nahpoutu Haman nahpoutu mai kirou hai-a loue; ana puletao nou kina khesü poloumoe.

¹¹ Süzhou teithe Susa nuhbei hinou mai kazhou southa loue touyu ko nasü veo hi paosü peie.

¹² Veo nou vepfüpai Esther hi paoe, “Susa nuhbei litou hinou Jihudimai nou mai kraingou, Haman nahpoutu kirou noupu loua nou southawure. Kabüa nou vedei kukhe hisü sousa! Chua nenou daie khopu nüyu buhie? Nenou khoyu nasü peilai. Nenou daie jüpa-a kholou nüyu buhie? Süsü ne hi peilai.”

¹³ Esther nou chila peie, “Veo nenou jüpa louzü, Susa nuhbei hi buyu Jihudimai ye doshoa panou zhou puletao nou souyu nasü pa soupuwuo. Alia Haman nahpoutu kirou taoye deka shokhai touyu hinou rai daotha peio.”

¹⁴ Veo nou sübüa soulo tea kharochi peipue, alia sünasü Susa nuhbei hi kharochi seita peiwure. Haman nahpoutu kirou taosü rainou daothawure.

¹⁵ Susa hi buyu Jihudimai taonou ve me soupu loua Adar khouh khoukha kiadai zhou hai puletao nou mai kraisü southapu loue, ana puletao nou kina khesü pomoe.

¹⁶ Vedei khenou buyu Jihudimai kukhe tao-a ve jüloua lah puletao ye vupaloure donou reih soue, alia puletao nou ngaoba maitao ye southa louyu hai mai theh rainai ngoue; ana puletao nou kina khesü pomoe.

¹⁷ Haihai Adar khouh khoukha kiasü zhoue, alia khoukha kiadai zhou hai puletao nou aso-a süzhou hai asah soua khonü nüyu teithe souwe.

¹⁸ Ana Susa hi hrüyu Jihudimai taonou khoukha kiasü zhou alia kiadai zhou hai reih soue alia khoukha kiangou zhounou asasoua nüh nüyu teithe souwe.

¹⁹ Südonou nuh hinou hrüyu Jihudimai taonou Adar khouh khoukha kiadai hinou aso-a nüh nüyu teithe soue, alia süzhou hai puletao nou alinou ali hi todo peiwe.

Purim vei Nüh

²⁰ Mordekai nou haikhe hai rükhailoue, alia veo Xerses vedei hinou hrüyu Jihudimai hrülai hisü haihai rüsei tapeie.

²¹ Sübüa puletao ye panou po patsü Adar khouh khoukha kiadai ae kiangou zhou hai nai-a reihlai.

²² Süsü Jihudimai nou puletao ngaoba mai bah hinou tupa louyu, alia puletao nou veayu hinou asavayu hi ae dopfüa kra-a buyu hinou asayu hi soudathou peiyu khouh teithe soua reihlai, sübüa puletao nou asah soua nünüyu teithe soulai, alia alinou aliye todo sei-a veayu maiye soukhalai.

²³ Mordekai nou rüsei tayu na büa Jihudimai hrülai nou souwe.

²⁴ Jihudimai hrülai ye ngaobayu Hammedatha nahpoutu Agag puona Haman nou Jihudimai ye souhawure teithe nasü rako (“purim” tea kuyu) zhue.

²⁵ Ana Esther nou veo nghoujü talou louyu phaki, veo nou kharochi nasü rüseita peiwua Jihudimai ye souhawure donou souyu nasü lah Haman pei hi ve-a baire, alia puh ae puhnah poututao ye sü rainou daotha baire.

²⁶ Südonou puletao nou Pur tea kuyu teithe nasü Purim teanou kuwe. Rütayu kharochi na thaifüa, alia puletao nou haibüa daoyu donou ae puletao hi payu vahtao teitei hai donou,

²⁷ Jihudimai nou puletao ae puletao vei tyaonahtao alia puletao hi loure maitao hrülai donou popatsü teithe ahai hai Mordekai nou paopeiyu na thaifüa reihwe.

²⁸ Teithe haina ahai sü Jihudimai kiphao teitei nou, vere bonakha hrülai nou, vedei hi buyu nuh teitei nou vere po teile teitei hie lichoa reihlai.

²⁹ Süthaisü vepfüpai Esther, Abihail nah naotupai ae Mordekai nou seiko ali rüpuwe, sühisü vepfüpai Esther vei khouko teitei nou thoua Purim nüh hai kabüa reimo louzü shie touyu teitei hai sühi rüthou loua seipeie.

³⁰ Seiko nahisü veo Xerses vedei hi hrüyu Jihudimai hrülai hi, vedei zha 127 soua dade khaitouyu teitei hi rüsei tapeie. Sühisü kaonayu ae acheche chipao lako hainou rüsei tapeie.

³¹ Jihudimai puona Mordekai ae vepfüpai Esther nou puletao ye donou paopeiyu büa puh hainou puletao ye ae puletao tyaonahtao donou khoa veachi paoyu ae dopfüa buyu teithe hi souyu büa puletao ye nou Purim nahai reihtou toulo tea paopeie.

³² Esther nou Purim vanou haibülai touyu hai kharochi ali büa larübvü hi rüthou khailoue.