ESTHER 4 - SHEEYU BAIBEL (BSI)

Mordekai nou Esther vei Soukha Khoyu

¹ Mordekai nou haibüyu ko teitei hai sülou khaie, puhvei sabanü khesü daophawua soukou nou banao loure alia puh pei sü vonai bokhai loua nuhdu touchü hinou shusoua kouli lia kranou tae.

² Puhnou tave veo vei rokhu bomü hi bue, daisounou toulouzü soukou banao-a panou mai aliro veo vei rokhu bomü khevai louchamoe.

³ Vedei teitei hi veo vei kharochi peiyu na sülou khaie, Jihudimai hrülai nou dopfüre, kra-a kouli lire, alia lüh-a veachi paore, ae puletao mai poulo nou soukou banouloua vonai hinou dapfüa bure.

⁴ Esther vei kilai pfütao ae vasou datayu maitao nou Mordekai hai kabüa bure touyu nahai ve honapai hi paopei khaie, honapai hai levea shore; südonou honapai nou Mordekai ye panou soukou banaoyu nasü laolaiwua sabanü aveih nou banoure donou seipa peie. Ana puhnou pobare.

⁵ Süthaisü Esther nou vasou datayu puhvei kilai, veo nou dokhai peiyu Hathak ye sü Mordekai hi seipa daivanoue alia daisounoue touyu ko pore donou seitae.

⁶ Hathak nou nuhdu kijü tapa Mordekai nou buyu rokhu bomü hisü ve-e.

⁷ Mordekai nou daivanoue touyu ko teitei sü puh hi paopeie, alia Haman nou veo vei kini pojüyu ki hisü Jihudimai hrülaiye souhakhai touwua pousha kazhou thoupeilai touyu veishi hai paongao peie.

⁸ Puhnou Hathak hisü, Susa nuhbei hi rütayu kharochi larü nasü, Jihudimai hrülaiye souhawuo touyu seitako kharochi larü ali peie, panou larü sünasü Esther hi polou ngaore donou, alia honapai hi panou kabüwe touyu shozü nou paotou peiloure donou, alia honapai hisü puletao thaosoua veo hi talou soukha khomo louzü tyaka laire teanou paopeie.

⁹ Mordekai nou paoyu thaifüa Hathak nou ve Esther hi paopeie.

¹⁰ Süthaisü Esther nou Mordekai hi haibüa ve paopeio tea Hathak ye seidakhaie:

¹¹ “Veo khehinou vah souyu mai alia vedei hi hrüyu mai hrülai nou chikha haihai süwe, süolouzü mai tara linoua veo nou kumoa veo nou buyu buh hi talou louzü, puhye sü southalai touyu zhai hai bue, alia zhai haina souda loure hai veo nou puhvei sana süpo nahai polapa peire toulouzü puh hai hriloulai. Ana Eye teithe shirou lihai veo nou kumore.”

¹² Esther nou paoyu chipao nasü ve Mordekai hi paopeie.

¹³ Süthaisü Mordekai nou dakhai ve Esther hi haibüa paopeio tea paoe, “Nenou veo vei fühao hi buyu vanou Jihudimai kukhe jünou rako veipu hie tea choso.

¹⁴ Daiolouzü haibüyu teile hi nenou raomoa bulouzü, Jihudimai ye khailupa peire hai raki vanou ve-a bailai, ana ne ae nevei kihikha louzü hakata-a bailai. Thaonou sülai, haibüyu teile vere donou neye panou vepfüpai soua buyuma.”

¹⁵ Süthaisü Esther nou Mordekai hi haibüa chila peie,

¹⁶ “Susa nuhbei hi hrüa buyu Jihudimai hrülaiye save jülo, alia athaosou heakhei asü hai lüh-a touso ali-a toumoa veachi paopeio. E alia avei kilai mai hrülai nou neletao büa halia toumoa lüh-a veachi paolai. Süthai nou zhai moa buyuma Enou veo hisü taloulai.”

¹⁷ Esther nou paoyu teitei hai Mordekai nou soue.