ESTHER 2 - SHEEYU BAIBEL (BSI)

Esther nou Vepfüpai Soulouyu

¹ Veo Xerses nou lekhayu hai khaitayu thai-a, puh hai Vashti nou souyu vah alia honapai pei hi aetou moa kharochi peikhai touyu nasü lichoa bubaie.

² Südonou veo vei vah soukha-apei maitao nou paoe, “Veoye donou hüveiyu loumaina ye phouta molouzü shire.

³ Veo panou puhvei vedei hi buyu nuh teitei hisü peikhomai doloua panou sühi hrüa buyu loumaina hüveiyu hrülaiye sü save Susa nuhbei hi khailo. Sübüa nou puletao ye sü souhüveipu loure donou pou kaivei nou pei noulo.

⁴ Süthaisü sütao hrohinou hüvei kayu naotupaiye sü nenou poloua Vashti thaosou vepfüpai soulo.” Veo nou haibüa paopeiyu hai jüpaloua puhnou sübüa soue.

⁵ Susa nuhbei hisü Jihudimai ali Jair nahpoutu Mordekai tea bue. Puh hai Benjamin vei khü hinou Kish ae Shimei tyaonah-e.

⁶ Puh hai Babilon hi veo Nebukhadnezzar nou Judah hi veo Jehoiakin kolinou Jerusalem hinou nüpoa tayu hi louyu mailie.

⁷ Puhnou puh puo thaihou nahnaotupai Hadossah, süolouzü Esther ye puh nahpai souloua puhnou kikopa peie, daiolouzü honapai hai pfüpuo ahai khinou thaitare. Honapai hai hüvei showe alia hrüa veishowe.

⁸ Veo vei kharochi nasü vedei teitei hi paosüta peiyu thai, naotumai alao hai Susa nuhbei hisü veloure, sühisü Esther-a veo vei buh hi naotumai ye khoyuna Hagai bah hi save thoupeie.

⁹ Hagai nou hounapaiye sü ngaoloua jüpaka loure. Puhnou theadzü kaivei ae touso aveih nou honapai ye sü peie, alia veo vei ki hinou buyu kilai maipfü anai hai dopaloua hounapai vah soure donou khaipeie, alia puletao ye sü panou naotumai nou buyu buh aveih teina hinou bue.

¹⁰ Mordekai nou paodou peiyu na thaifüa Esther nou puhvei kityarai ae tyahrü hai mai hi paongao moe.

¹¹ Esther hai kabüa busa touyu süloure donou Mordekai hai teisa nou naotumai taonou buyu kipa hisü takou takhea laiwe.

¹² Loumainah ali nou veo Xerses hi talou ngaomo jünou, khouh kiahai hai maimou soua hüveipure donou naotumai ali nou haitao hai soulai. Khouh arou lihai kaivei myrrh theadzü nou nalai, alia khouh arou lihai kaiveiyu ae panou vasou veire donou pou nalai.

¹³ Haibüa soucheyu thai, naotumai taonou veo hi talouyu phaki, puletao nou banao nüyu sabanü nasü banao-a bailai.

¹⁴ Koukhe sü loumainah nanou veo hi taloulai, alia thainesho shona sü khusoupfütao ye kho-apeio Shaashgaz nou khoyu naotumai buh ahaina hisü dakhai pa bulai; veo nou honapai ye sü jüpa-a puh zhih nou kupu molouzü honapai nou veo hi taloupu laimoe.

¹⁵ Mordekai puo thaihou Abihail nahnaotupai, puhnou kilouyu Esther nou veo hi taloure phaki, naotumaitao ye kho-apeio, vasou datayuna Hagai nou sabanü noulo tea paodao peiyu natao litou hounapai nou nao-a veo hi sü taloua baie.

¹⁶ Esther ye veo Xerses nou buyu vebuh hi salouyu phaki, puhnou vekou louyu po anai navei khouh kirou, süolouzü Tebeth tea kuyu khouh nahie.

¹⁷ Veo nou Esther ye sü ngaoloua naotumai kukhe jünou leshipu loure, alia naotumai hrülai jünou jüpapu loure. Südonou puhnou vepeirü nasü honapai pei hi rüpeiwure alia Vashti thaosü Esther ye nou vepfüpai soupeiwure.

¹⁸ Süthaisü veo nou puh khenou buyu peikhomai hrülai, aduso mai hrülai sü kupove tovai zhowe. Haihai Esther donou nühnüe. Puh vei vedei teitei hai panou süzhou hai nai-a ki bue, alia maikhemai hisü vemai linou peizü na thaifüa sapeina hai peie.

Mordekai nou Veo Hrirai Khailu-apei

¹⁹ Vu ahai na soua loumaitao ye save jüyu phaki, Mordekai ye panou veo vei talouyu robomü khore donou dopeiwure.

²⁰ Mordekai nou paodou peiyu thaifüa Esther nou puhvei tyarai alia tyahrü hai mai hi paongao moe. Daiolouzü honapai nou raichoki Mordekai nou puhye kipa peiyu phaki puh chi züyu büa chua puh chi züa baie.

²¹ Mordekai nou veo vei talouyu rokhubomü khoa buyu phaki, veo vei kikhu khoyu jülamai (vasou datamai) ahai, Bigthana ae Teresh nou veo Xerses ye southare donou chipha-a bue.

²² Mordekai nou süsü chouloua vepfüpai Esther hi paopeie, alia Esther nou veo hisü Mordekai nou paoyu nasü paopeie.

²³ Haihai kabüsa touyu panou phoutae, alia süsü phouve chechewe touyu ngaolouyu phaki, puh haiye sü rai nou daothawure. Pa-a buyu vah haitao hai veo nghoujü hinou vemai vei puopao ko rüthou khaiyu larübvü hisü rüthou khaiwure.