EPHESAMAI 6 - SHEEYU BAIBEL (BSI)

Pfüpuomai ea Nahmaitao

¹ Nahkhe maitao, Mapaowo hinou neletao pfüpuomai chi zülo, daiolouzü haisü souzüe.

² “Nepfü nepuoye tsükhoulo;” (haisü apaopei khaitouyu ali koua thoupu peikhai touyu raikaiyu chikha nasüe):

³ “Sükulouzü ha teitei hai neye donou kao-zhou veiloulai ea deiphao hinou ne maishoa buloulai.”

⁴ Puokhe maitao, neletao nahmaitaoye lekha-rarouhi züthou peiwuso, ana puletaoye Mapaowo vei tukhazü peiyu ea doupeiyu hilonou kipapeio.

Qilatao ea Paopu maitao

⁵ Qila khemaitao, neletao nou Khrista vei kuvah souyu zhaibüa, pi-hia ea le sheetoua deiphao neletao vei paopumaitao chi sü zülo.

⁶ Haisü neletao nou puletao vei paoshoyu ngaolounüa puletao nou neletaoye zhubuki likhei baimoa, Khrista qilatao büa neletao vei le teiteinou koa Ramai züpasü soukhaio.

⁷ Maiye moa Mapaoye neletao nou kuvah souyu zhaibüa qila ali soua lesasa-a neletao vei vahsü soukhaio.

⁸ Qila-a, mado souyuna-a lah puhnou vahvei souyu süna thaifüa Mapao nou mai hrülaiye buu peilai touyu sü licholo.

⁹ Paopu maitao, süzhaibüa neletao-a neletao vei qilatao hisü soukhaio ea soupiyu sü thaowuwo. Neletao ea neletao vei qilatao hai hrüzhai ali hinou mai hrülaiye chikuyu rakivabu Mapaowo puhvei baie touyu sü li-cholo.

Ramai vei Reihna Pfüphou

¹⁰ Akhai hinou, Athaihou jürai maitao, Mapaowo hinou ea puhvei achana khouko hinou khoua bulo.

¹¹ Neletao nou Rashinavei do ashitao hinou laloure donou Ramai nou neletao hi peikhai touyu reihna pfüphou sü thoulo.

¹² Daiolouzü Eletaowo ke-zheye reihzümoe, ana rakilo buhtaohi buyu ashi rakotao vei khoukotao, paopu maitao, peikho maitao, alia chu teizhi hainavei teideiphao vei khoukotaoye reih züwe.

¹³ Südonou chuo Ramai vei reihnasü noulo! Süthaisü teithe ashi veyukisü, ngaoba mainou reih duveyu sü neletao nou nulou süe; alia akhai koute reih zükouyu kisü, neletao nou ko-a laloulai.

¹⁴ Südonou acheche nanou khyakho büa neletao khyahi khoteiloua ea cheche-a hrüyu sünanou neletao khaokha büa kholoua latoulo,

¹⁵ alia kaonayu vei Ko Avei paodoure souda-a buyu sünanou neletao phikha nouyu büa noulo.

¹⁶ Ha teitei jünou, teisanou lüvei rü nasü pfülo; daiolouzü süna vanou neletao nou ashi nanou leitei poa buyu meikeiyu loushuh teiteisü sounghi lousüe.

¹⁷ Alia khailu louyuhai reih peirü büa ea Rako nou neletao hi peikhai touyu Ramai chipao hai khoche büa polo.

¹⁸ Ramai hinou soukha khoa haitao pfüphou hai veachi pao-a soulouwo. Rakonou süthai peiyu thaifüa phabu sanou veachi paolo. Qo haina vanou leikeilo ea hakia thaokhaiso, teisanou sheeyumaitao hrülai donou veachi paolo.

¹⁹ Alia Enou khuvei-a chi paoloure ea Ko Aveinavei kheitsü nasü paosü peiloure donou Enou chi paoloure donou souda-a buyu kisü Ramaiye panou Ahi puhvei chipao nasü peiloure donou, Eye donou-a veachi paopeio.

²⁰ Chuo Ehai hukhahi bumai ali soukhaia Ko Avei haina vanou Esü süh-seitamai alisoua bue. Enou paozüa buyu Ko Avei nasü khuvei-a paoloure donou veachi paopeikhaio.

Akhai khurüyu chidoh

²¹ Ehai kazhaibüa hrüsa touyu sü neletao nou süloure donou leshiyu Eletao thaihou jürai ea Mapaowo kuvah hinou checheyu kilai soua buyu Tukhika nou Avanou ko pfüphousü neletao hi paongao peilai.

²² Südonou Eh hai kazhaibüa hrüsa touyu sü puhye panou neletao hi paongao peire donou ea neletao lesü soudu peiloure donou Enou puhye neletao hi seivewe.

²³ Puo Ramai nou ea Mapao Jisu Khrista nou Khristamai thaihou jüraimai hrülai pei hi sü kaonayu ea lü naye koa leshi nasü peiyu souloutheo.

²⁴ Eletao Mapao Jisu Khristaye thaihoyu hayu lesha nanou leshia buyu maikhemai hrülai hisü Ramai zhuvea nou koa bupeiyu sü souloutheo.