EPHESAMAI 5 - SHEEYU BAIBEL (BSI)

Teiva hinou Hrüyu

¹ Südonou neletao hai Ramai nou leshiyu nahmaitao baiyu donou, neletaosü puh zhai dou vuzülai.

² Alia Khrista nou Eletaoye leshia kai nüveiyu na ea posheelayu na Ramai hi popeiyu büa lah puhye sü Eletaoye donou thoupeiyu sübüa neletao hrümai hai leshinou tukha-a hrüvuzülo.

³ Neletaowo Ramai vei maitaoyu donou neletao hrohinou khulou souyu moa sheemoyu vah tali moa loküyu sütaohai zhih koutea panou sa-a neletao hrohi buwulaimoe.

⁴ Moa neletaoye donou hraopachi paoyu, sheemoyu chi moa müro-mübaoyu chi paoyu zümoe. Süjüwo neletao nou Ramai hi kalo paoloukhaio.

⁵ Haisü neletao nou süvuzülo süolouzü khulou souyumai, sheemoyumai moa loküyumai (loküyu hai basharaye thoyu zhai alie) talinou Khrista ea Ramai vei Vedei hi zhalia ngaokhai laimoe.

⁶ Maitaliye panou neletaoye raohayu chipaonou lawuso; daiolouzü haibüyu vahtao vanou Ramai vei rarouhai paoyu zübayu nahmaitao pei hi vewe.

⁷ Südonou sübüyu maitaoye koa hakia tawuso,

⁸ daiolouzü teile lihisü neletao hai teizhi hinou bue, ana chuwo neletao nou Mapao vei maitao soulouyu donou, neletaosü teiva hinou buloure; südonou teivahi nahmaitao büa talo,

⁹ daiolouzü avavei shithou hai avei teitei, cheche-a hrüyu teitei ea acheche teiteihi buwe.

¹⁰ Mapaowoye dainou le sousa peiwe touyu nasü douloure donou telo.

¹¹ Teizhivei thouhayu vahtao hisü koa lou souzho shuo, süjüwo sütaosü teivahi popa ngaopeikhaio.

¹² Puletao nou kheikheisoua souyu vahtao vanou phayu koute-a chechenou hraoyule.

¹³ Alia na teiteihai teivahi popa phukhaiyu kisü, sükisü puletao vei zhai chekhaoyu nasü popa sheesha-a ngaopei baiwe;

¹⁴ daiolouzü sheetoua popa ngaoyu hatalisü ava data baiwe. Sübüyu donou haibüa paoe, “Oh zhia buyu ne, kaishulouwo, alia athai hinou hrishulo, alia Khrista nou neye avasü peilai,”

¹⁵ Südonou kabüa neletao nou hrüsa touyu sü zhutoulo. Tsü hayumai bümoa tsü veimai büa hrülo.

¹⁶ Teile kao avei teitei hai soutaosoua seilo, daiolouzü teithe haitaohai veimoe.

¹⁷ Südonou voso, ana Mapao vei leli hai daisa touyu sü sülo.

¹⁸ Zhaoh shozhiwuso, daiolouzü sühisü soula-pfülayu alaosou bue; süjüwo Rakonou phoupeia bulo.

¹⁹ Alinou lihi sheeyu lounou, paoshoyu lounou ea rako lounou pao-a, soua bulo. Mapaowo hisü neletao vei le teiteinou ea pai-la veinou lou soukhaio.

²⁰ Teisanou ea ha teitei hinou Eletao Mapao Jisu Khrista zhih hinou Puo Ramai hisü kalo paokhaio.

Kikhamai ea Church vei Nada

²¹ Khristaye khuhao peiyu süna hinou lah neletao linou li khehi hrüa bupeilo.

²² Chapfü maitao, neletao nou Mapao vei khakhehi hrüa buyu büa neletao vei chaamaitao khakhehi hrüa bulo.

²³ Daiolouzü Khrista nou puhvei pfüphao, alia lahnou sünavei khailu-apeio soua buyu lüloumaimevei peichana soua buyu büa chaa nanou chapfü peichana süe.

²⁴ Südonou lüloumaimenou Khrista khehi hrüyu büa chapfümai taonou ha teitei hinou puletao vei chaamaitao khehi hrüvu zülai.

²⁵ Chaamaitao, Khrista nou lüloumaimeye leshiyu ea süna donou puhvei hrirai peiyu sübüa, neletao chapfümaiye leshilo.

²⁶ Haisü puhnou lüloumai meye puhvei chipao vanou dzü hinou khüshee peiwu-a soushee peiyu thainou sünaye Ramai hi posheela peire donou soue;

²⁷ alia haisü lüloumaimeye lah puh hi zhai veishoa süolouzü shee-a ea mahlia ha-a, chaalia taomoa moa tei lia taomoa ea kukhe chemoyu alia ha-a popeire donoue.

²⁸ Südonou chaamaitao nou puletao chapfümaiye lah puletao pfüphaoye leshiyu zhaibüa leshilai. Lah puhvei chapfüye leshiyu puhnou lahye leshiwe.

²⁹ Daiolouzü maitalia lah puh vasouye ngaoratamoe, ana Khrista nou lüloumai mehi soupeiyu zhaibüa, sünaye vaitoupei-a zhutou peiwe;

³⁰ daiolouzü Eletaowo puhvei pfüphao zhataobaie.

³¹ Haisü sheeyu larübvü nou paoyu büa, “Qo haina vanou poutumai alinou puh pfüpuoye thaowua puh chapfüye koa lou ali souloulai, alia puhaisü vasou ali souloulai.”

³² Haisü dushoyu kheitsü alie, ana Enou Khrista ea lüloumaime vanou paowe.

³³ Ana haisü neletaoye-a paowe: chaamai hrülainou puletao vei chapfümaitaoye lahye leshiyu büa leshi vuzülai, alia chapfümai hrülainou puletao vei chaamaitaoye tsükhou vuzülai.