EBRIAMAI 7 - SHEEYU BAIBEL (BSI)

Napao Melkizedek

¹ Melkizedek hainasü Salem teideihi Veo süe ea puhsü Aku Kulai Ramai vei napao nasüe. Abraham nou vemai adaiye southeawua reihbuh hinou khaiveyu phaki Melkizedek nou puhye daoloua hapeie,

² alia Abraham nou reihbuh hinou ngaolouyu na teitei hinou zha kiruo hinou alisü puh hi peie (Melkizedek touyu vei ko araina louzü, “Acheche vei veo” toue; alia puh hai Salem teidei hi veoyu donou puh zhih ko hai “Kaonayu vei Veo” tea pao-a paowe.)

³ Puhsü pfü-puo moa paipao; puhye nayu moa thaiyu vei vanou rüthoukhai touyu ali-a hae, ana Ramainah Poutu kua thaokhaimoa teisanou napao soua bue.

⁴ Südonou, puhsü daizhozhou dusa chokhaio! Zhih tashoyu Eh puopao Abraham nou puh hisü puhnou reihbuh hinou ngaolouyu zha kiruo hinou alisü posheelae.

⁵ Alia napaomai soua buyu Levi tao-nah maitaoa razhai thaifüa Israel maitao hinou süolouzü puletao-a Abraham tao-nahmaikhaia, lah puletao thaihou jürai maitao hinou zha kiruo vei ali poloure chikha peikhai toue.

⁶ Melkizedekwo Levi taonah hinou vemoe, ana puhnou Abraham hinou zha kiruo hinou ali poloua Ramai vei apaopei khaitouyu ngaolouyu puhye sü hapeie.

⁷ Alia hapeiyu puhnou ha ngaolouyu puh jünou dukouhie touyu hisü halia motoure hae.

⁸ Napaomaitao veiwo louzü zha kiruo vei ali nasü thaire maitao nou khaloue; ana Melkizedek donou louzü zha kiruo vei ali nasü sheeyu larübvü hinou paoyu kua hria buyu puhnou khaloue.

⁹ Alia maitalinou haikua paolou veie, süolouzü zha kiruo hinou ali ngaoyu Levi puh-a Abraham vanou zhakiruo hinou alisü posheelae,

¹⁰ daiolouzü Melkizedek nou Abraham ye daoyu kisü Levi sü puh puopao Abraham vasou hi buhie.

¹¹ Chuo Levi khü vei napaobuh hilonou licheyu nasü ngaolousüe toulouzü (daiolouzü matsü soua süna vanou razhai nasü Israel maitao hi peie), Aaron vei napao zhai süna thaifü mo-a Melkizedek vei napao zhai hinou kukhe napaoli panou veyu dai matsü bue?

¹² Daiolouzü napaobuh datayu kisü, razhai-a data vuzülai.

¹³ Daiolouzü puh vanou chi haitao paopeikhai touyu Eletao Mapao puhsü khü kukhe hinou ve, alia puh khü hinou maitalia napaosoua sheelabuh hinou vahsou khai mohie.

¹⁴ Daiolouzü Eletao Mapao hai Judah khü hinou ve-e touyu sü maikhe mainou sükhaiwe, alia Moses nou napaomaitao vanou chi paoyu kisü khü haina vanou halia paomoe.

Melkizhedek kuyu Napao Kukheli

¹⁵ Alia Melkizedek kuyu napao kukhe ali payu kisü, Eletao nou paoyu sünasü sheetou pukhaire.

¹⁶ Puhye sü pfüphao vei zhai thaifüa chikha peiyu hinou moanou akhai hayu ahri sünavei khouko süna thaifüa napao soupeire.

¹⁷ Daiolouzü sheeyu larübvü nou puh vanou haikua paoe, “Newo Melkizedek vei napao zhai süna thaifüa teisanou napao soulai.”

¹⁸ Südonou chikha arai nasü lelou hoyu ea matsü hayu donou thaore.

¹⁹ Daiolouzü Moses vei razhainou hataliye southou liche peilou hoe. Alia chuwo vei kouyu areih ali pove peikhaitoua süna vanou Eletaonou Ramai hi tave ngheiloue.

²⁰ Alia süpeinou, sühisü Ramai vei chachouna-a bue. Kukhemaiye panou napao soulouyu kisü sükuyu cha-chou nasü hae.

²¹ Ana Jisuwo Ramai nou puh hi haikua paopeia cha-chou ali hinou napao souloue, “Mapaowo nou chaachou souwure alia puhle dakhai laimoe: ‘Newo teisanou napao soulai.’ ”

²² Chaachou haina vanou Jisu sü veikouyu vo sünavei lapeiyuna souloure.

²³ Alia takuyu kukhe alinou, napao araitaosü alao soua bue, daiolouzü puletaoye vahbuh hinou thaokhaimoa bure hinou athai nanou nuwure.

²⁴ Ana Jisuwo teisa nou hria buyu donou puhvei napaobuh sü puh hi teisa nou bulai.

²⁵ Südonou puh vanou Ramai hi tave louyu puletao hrülaiye sü puhnou teisanou khaipei lousüe, daiolouzü puhwo Ramai hinou puletao sühsoua khopeire donou teisanou hriwe.

²⁶ Daiolouzü sükuyu sheeyu, chaa hayu, mahlia hayu, mahmaitao hinou dokupa khaitoua buyu ea rateitao jünou pokukhe khaiyu Eletao vei napao peichana buyu sü züdoushoe.

²⁷ Puhwo napao peicha kukhemai kumoe; puhwo lah puh mah donou raia ea süthai maikhemai mah donou teisanou sheelayu natao pothoyu matsü hae. Puhnou lah puhye popeiyu hinou puletao mah donou lühli kheinou teisavei donou popeire.

²⁸ Achechewo louzü, Moses vei razhai nanou liche moyu maitaoye panou napao peichatao soure donou dothoupeie; ana razhai jünou na-a veyu chaachou noupu koa souyu Ramai vei apaopei khaitouyu sünanou teisanou sou liche peiwuyu Nah Poutu naye doloure.