EBRIAMAI 6 - SHEEYU BAIBEL (BSI)

¹ Südonou Eletao nou Khrista vei lüzhai araitaosü thaowua licheyu hilo tapu koulaikhe. Eletao nou athai vahtao hinou le dalouyu, Ramai hi lüyu,

² dzükhao dayu, bah lakhai peiyu, thaimainou hrishuyu alia teisa halouho chikuyu vei vanou doupeiyu kifü nasü shupu khaikhai laimokhe.

³ Eletaowo nghojülo takoulou laikhe! Alia Ramai nou aetou peilouzü haihai Eletao nou soulai.

⁴ Daiolouzü vuhli lüloua puletao vei lü thaoyu maitaoye sü kakua sada khaive le soudalou khailai? Puletao sü vuhli Ramai vei ava hinou bue; puletao nou raki vei sapeina kai sünasü süloure ea puletao sü Rako Mashi hilo zha nasü ngaoloure;

⁵ puletao hrümai hinou Ramai chipao hai veie touyu ea vere teile sünavei khoukosü puletao nou süloure.

⁶ Alia sükuyu shonou puletao nou puletao vei lüsü thaore! Südonou puletaoye sü panou le dapu louyu hai tatei sholoure, daiolouzü puletao nou Ramainah Poutuye kros vanou veatheapu khaire ea puhye sü dua soungu peire.

⁷ Daiolouzü tobai soumoa rükouyu teirüye teilouyu, alia dei sünaye ta-a bumaitao donou vupou avei paopa peiyu dei sünaye Ramai nou hapeiwe.

⁸ Ana sühisü raishu paopa bailouzü süsü komore ea Ramai vei cha ngaore sü ngheire, alia süsü meinou souhalai.

⁹ Ana leshiyu thaihou jürai khemai, Ehnou haibüa paokhai-a nele vanou sütoua bue, süolouzü neleye khailu peiyu hisü veikouyu ha taosüa bue.

¹⁰ Ramaiwo cheche moyu moe. Neletao nou soukhai touyu vah moa neletao nou chukoute puhye donou neletao thaihou jürai Khrista maitao hi soukha pei-a leshiyu pongaokhai touyu sü puhnou ngaipei laimoe.

¹¹ Ehnou züpashoyuwo louzü, neletao nou reia buyu sütaosü cheche-a vete loure donou, neletao mai ali linou lah puhvei lenousü akhai koute pfüa bulo.

¹² Nelenou hitayu sü Ehnou züpa moe, ana lü ea shameayu vanou Ramai nou apaopei khaitouyu ngaolouyu sümaitao zhai doulouyu sü züpae.

Veikhai moyu Ramai vei Apaopei Khaitouyu

¹³ Ramai nou Abraham hi apaopeiyu kisü, puhnou apaopei khaitouyu nasü souvete loure donou chachouli soue. Alia puh jünou dukouyu maitalia hayu donou puhnou lah puh zhihsü kua chaachou nasü soue.

¹⁴ Puhnou paoe, “Veimosoua Enou neye hapeilai ea nehi taonah alaosou peilai.”

¹⁵ Alia Abraham nou shameatou louyu vanou apaopei khaitouyu nasü ngaoloue.

¹⁶ Maitalinou chachouli souyu kisü puhnou lah puh jünou duyu kukhe maili zhih kua chouwe, alia sükua chaachou sünanou züveiyu chi veishisü kukou chewu baiwe.

¹⁷ Ramai nou puhvei apaopei khaitouyu süna ngaoloure maitao hisü puhnou soure vah haio hakia podawu laimoe touyu sü sheetoua ngaopei nüwe. Südonou puhnou apaopei khaitouyu hisü puhvei chaachou thoupu peikhaitoue.

¹⁸ Südonou hakia soudalou hoyu ea Ramai nou sühai vanou hakia madalou hoyu na ahai bue. Südonou puh hinou baibuh ngaolouyu Eletaoye sü Eletao nghojühi khaipei khaitouyu areih sünaye soutaosoua poloure donou le soudu-sho peikhaitoue.

¹⁹ Areih hainasü dzüluki khika kua Eletao vei rako donou bue. Areih hai nasü kaoshiyu lia hae ea veilai moe, alia süsü rakiva Rathoki hi sahrana thailo tacholou kikha levai kide nahi louwe.

²⁰ Eletao sühsoua Eletao jünou raia Jisu nou buh sühisü talouloue ea Melkizedek vei napao zhai süna thaifüa puh hai teisa nou Napao Peichana souloure.