EBRIAMAI 4 - SHEEYU BAIBEL (BSI)

¹ Südonou puhvei aso hi louloure apaopei khaitouyu süna bubukinou, Eletao nou pilou laikhe, molouzü neletao maitaliye sühi veloulou hore tea Ramai nou chikupeiwu shulai.

² Daiolouzü ko Avei nasü puletao hi velouyu büa Eletao hi-a ve; ana puletao nou choulouyu chipao nasü puletaoye donou ha zhiyu ali-a hare, daiolouzü puletao nou sünasü choulou-a lünoupu koa poloumoe.

³ Südonou louche louyu Eletao nou aso sühisü velouloue, süsü puhnou paopeiyu kue: “Enou rarouloua haikua chaachou soue: ‘Puletao nou Avei aso hisü hakia velou laimoe!’ ” Puhnou puhvah taosü deiphao soushurai hinou souche loukhaia haisü paoe.

⁴ Daiolouzü sheeyu larübvü buh ali hinou puhnou teithe anai zhou vanou haikua paoe: “Alia Ramai hai puh vah teitei hinou teithe anaizhousü soloure,”

⁵ alia sübüa hai hinou puhnou haibüa paopu khaitoue: “Puletao nou Avei aso hisü hakia velou laimoe.”

⁶ Südonou, chukoute mai kamaisü aso sühisü veloulai, alia raia Ko Avei choulouyu puletao sü paoyu-zübayu vanou aso sühisü veloulou more.

⁷ Südonou Ramai nou, “Zhou,” tea kuyu teithe akuli dadepei khaitoue, alia teile phasho bulouyu thainou puhnou teithe süna vanou panou David mü hinou raia paocheyu sheeyu larübvü buh süna hinou haibüa paoe: “Neletao nou zhou Ramai pai chouloure toulouzü, neletao le sü khou shoyu souwuso.”

⁸ Daiolouzü Ramai nou apaopei khaitouyu aso nasü Joshua nou puletao hi peire toulouzü, na-a Ramai nou teithe akuli vanou paopu khailai moe.

⁹ Sükuyu thaisü Ramai vei maitaoye donou puhnou soyu soteithe kuyu aso ali buhie.

¹⁰ Daiolouzü Ramai nou puh vah hinou soyu sübütoua Ramai nou apaopei khaitouyu aso süna ngaolouyu mai talisü lah puhvei vah hinou solai.

¹¹ Südonou Eletaowo puletao kua paoyu zübayu vanou kaodu tamoa aso sühi ve louloure telaikhe.

¹² Daiolouzü Ramai vei chipaowo hriwe ea khou-chihwe, alia hri ahai pfüyu khoche tali jünou haivei shohie. Sünanou hrirai ea rako kole hi, soukou ea soukei kolehi khüthoulou baiwe, alia emai le hinou züpa-a ea cho-a buyu taosü sülouwe.

¹³ Alia soukhai touyu na talia Ramai nghojünou kukhai loure hae, ana ha teiteisü dukhya-a puh nghi-ngaobuh hinou haphapa khaikhaitoue. Alia puh hisü lah Eletao hrülainou soukhai touyu soupfücho sü peivuzülai.

Jisu hai Dushoyu Napao Peichana Süe

¹⁴ Südonou rakitao tachopoa khetayu Ramai Nahpoutu Jisu, Eletao vei Napao Peichana buyu donou, Eletao nou füa buyu lü nasü soutao soua potoulou laikhe.

¹⁵ Daiolouzü Eletao vei Napao Peichanawo Ehnou lelou hoyuki Ehye leshi peilou hoyuna moe, ana Eletao büa hatali hinou athao daokhai-a puhwo mah soukhai moe.

¹⁶ Südonou Eletao nou Eletao vei moshilaiyu phaki leshi ea zhuvea ngaoloure donou lülouche-a zhuvea vei vebuh hisü takou ngheilou laikhe.