EBRIAMAI 11 - SHEEYU BAIBEL (BSI)

Raichoki Maikhe Mainou Ramaiye Lüyu Ko

¹ Chuwo lü haisü Eletao nou reia buyu natao vei vuzüyu nasüe, alia Eletao nou ngaomoyu natao vei veikhai moyu nasüe.

² Daiolouzü dao raichoki maikhe maitao nou lü vanou Ramai nou ae-ao toupeiyu sü ngaoloue.

³ Lü vanou teideiphao hai Ramai chipao nou soupeie touyu sü Eletao nou süloue, sükua ngaoa buyu taosü ngaolou hoyu natao vanou souloue.

⁴ Lü vanou Abel nou Kain vei jünou veikouyu posheelayu nanou Ramai hi popeie. Puh lü vanou puh hai chechemai alie touyu vei zhopaoh hai puhnou Ramai hinou ngaoloue, daiolouzü Ramai nou puhvei sapeina taosü ae-ao tea popeie. Puhsü thaitakhaia, puh lü vanou chu koutea puhnou chi pao-a bue.

⁵ Lü vanou Enok hai athai ngaomoe. Ana Ramai nou puhye potaloua maitalinoua puhye phouhare, daiolouzü Ramai nou puhye pokhere. Puhye pokhemo jühinou puhnou Ramai züpa soue touyu sü zhopaoh ngaoloue.

⁶ Alia lüloumoa maitalinoua Ramai züpa soulouhoe. Daiolouzü Ramai hi taveyu maitalinou puh hai buwe ea puhye phoua bumaitaoye sü buu peiwe touyu sü louche vuzülai.

⁷ Lü vanou Noha nou ngaomoyu natao vanou Ramai nou tukha peiyu kisü puhnou züloua puh kikhamaitao khailu paloure donou dzüluki ali daoloue. Alia sükuyu vanou puhnou deiphaomaiye sü mah dukhaipeie, alia sübüa lü vanou veyu acheche navei kaa nasü puhnou thaoloue.

⁸ Lü vanou Abraham nou puhye thaikhai hi Ramai nou peilai tea apaopei khaitouyu teidei sühi taloure donou kuyu kisü, puhnou daiki taholaisa touyu sü sümokhaia paoyu züa tapae.

⁹ Lü vanou puhnou Ramai nou puh hi peilai tea apaopei khaitouyu teidei hinou vakoumai libüa hrüe. Alia puhye koa Ramai nou apaopei khaitouyuna zha ngaozhoyu Isak ea Jakobye koa puhsü sahpao hinou hrüe.

¹⁰ Daiolouzü Abraham nou Ramai nou soudawua soupakhai touyu teisa halouho kifü hinou buyu nühdu süna donou zhi-a bue.

¹¹ Lü vanou Sarah nou puh hai nah hrüre teile latakhaia, nah hrüloure khoukosü ngaoloue, daiolouzü Ramai nou puhvei apaopei khaitouyu nasü souvete peilai touyu sü puhnou louche-e.

¹² Südonou thaimai kheihao baiyu mai ali vanou rateihi teivuh zhou ea choshalou hoyu zaipehi vünaizhou taonah hrükouloue.

¹³ Mai haitao hrülaisü lü louche-a thaita khaire. Puletao sü Ramai nou apaopei khaitouyu nataosü ngaoloumoe, ana puletao nou kaah doushoyu hinou zhingaoloua sütaoye sü sasa-a khoa bue, alia puletao hai deiphao hinou vakoumai ea shevai shesümai baie touyu sü dua aetouwe.

¹⁴ Daiolouzü sübüa pao-a laiyu puletao nou puletao hai lah puletao vei donou teidei ali phoutawe tea sheetoua paopeie.

¹⁵ Puletao nou thaowu-a tayu teidei süna donou puletao nou cho-a bukhaimoe; puletao nou choa bue toulouzü, puletao sü dakhai veloure teile zhouvei ngaolou vuzülai.

¹⁶ Süjüwo, puletao nou veikouyu teidei ali süolouzü rakiva teidei süna donou züpa-a bue. Südonou Ramai nou puhye nou puletao vei Ramai tea kuyu hisü ahraoyu hae, daiolouzü puhnou puletaoye donou nuhdu ali soudapei khaitoue.

¹⁷ Lü vanou Abraham nou puhye Ramai nou zhai zhuyu kisü puhnah Poutu Isakye posheelayu na ali büa popeie. Abraham hai Ramai nou apaopei khaitouyu ngaolouyu mai nasüe, sütoukhaia puhnou puhvei likhuyu puhnah Poutuye posheela loure donou soudae.

¹⁸ Ramai nou puh hi paopeie, “Isak vanou Enou apaopei khaitouyu taonahsü nenou ngaoloulai.”

¹⁹ Abraham nou Ramaiye nou thaimaiye-a souhri peilou süe tea chowe, alia nada nou paolai toulouzü Abraham nou Isakye athai hinou poda khailoue.

²⁰ Lü vanou Isak nou Jakob ea Esau pei hi thaikhai vei hataosü hakhaipeie.

²¹ Lü vanou Jakob nou Josef vei nahpoutu maitao aliliye puh thaitamo jübü hinou hapeie, alia puhvei süpo pei hi puh pei pfüna kouloua Ramaiye thoe.

²² Lü vanou Josef nou puh thaitare phaki Isreal maitao nou Ejipt hinou tapalaiyu vanou paopeie, alia puh pfüphao vanou kabüa soulai touyu sü paodoupeie.

²³ Lü vanou Moses pfüpuo nou puhye nalouyu thai puhye khou asü pokue, daiolouzü puh hai veishoyu nah alie touyu sü puhai nou ngaoloure alia puhai nou veo chikha pfüthouyu hisü ngaopiyu hae.

²⁴ Lü vanou Moses nou dupa louyu kisü Pharaoh nahpai nahpoutuwo tea kuyu sü bae.

²⁵ Puhnou phajü donou mah hinou vashoa hrüyu jünou Ramai vei maikhe maitaoye koa veaho zhoyu sü dolou.

²⁶ Khristaye donou ahrao ngaoyu sünanou Ejipt teidei vei kini teitei jünou koushoa muhtei hie tea puhnou choloue, daiolouzü puhnou thaikhai vei buu nasü zhia bue.

²⁷ Lü vanou Moses nou veovei rarousü ngaopi khaimoa Ejipt thaowua tae, daiolouzü puhnou ngaomoyu Ramaiye ngaoyu büa thailo reive bae.

²⁸ Lü vanou puhnou Tachonüh nasü soushuloue ea Athai vei Rakivamai sünanou Israel maitao vei nah Poutu narai taoye southeawu more donou kikhutao pei hi zhe vukhai peire donou chikha peie.

²⁹ Lü vanou Israel maitao nou Zaiho nasü deithe hi büa tacho paloue; ana Ejipt maitao nou sübüa tacho paloure donou teyu kisü puletao sü dzü hinou maotheare.

³⁰ Lü vanou Jerikho vei bouvou taosü Israel mai tao nou teithe anai tasühaoyu thaisü pe-potare.

³¹ Lü vanou khakhapfü Rahabye sü Ramai chi zübayu maitaoye koa souhawu moe, daiolouzü puhnou Israel maitao vei reihkei pomai taoye soutaosoua shepeie.

³² Alia Enou dai paopukhailai? Daiolouzü Eye donou Gideon, Barak, Samson, Jephthah, David, Samuel alia rachi paola maitao vanou paokhailai toulouzü teilenou hae.

³³ Lü vanou puletao nou vedei taosü koloue, alia puletao nou acheche nasü soupfüa Ramai nou apaopei khaitouyu sü ngaoloue. Puletao nou khaosouveotao müsü khaaloue.

³⁴ Chihshoyu meikei sounghiloue, khoche mü hinou tupaloue, lelouhoyu hinou khouchihloue. Puletao sü reih hinou khouchihloua vakou teidei reihmaiye hutaloue.

³⁵ Lü vanou naotumai taonou puletao vei thaitayu taraitaoye hridashua ngaoloue. Kukhemai taonou do soupeiyu sü ba-a veikouyu hrü hinou hrida shuloure donou souvea souho peiyu hinou thaie.

³⁶ Kamaiye konüpeie ea südanou dapeie, alia kukhe maiye sü phibao rai phuwu-a hukhahi pothou khaipeie.

³⁷ Puletaoye chuhnou deipeie, puletaoye sü ahaisoua vadepeie; puletaoye khochenou daotheae. Puletaoye sü zhao ea nghitu heenou banoua tasühaoe, toure shore ha-a souvea souhoa ea zhai ashi noupu soushi soukhapeia hrüe.

³⁸ Puletaoye donou deiphao hai züdou moe! Puletao nou rekounou ea deichitao hinou tasü-haopo-a chuhlea phikho ea dei qulukho hinou hrüe.

³⁹ Alia puletao lü vanou mai haitao hrülainou Ramai vei ae-ao touyu sü ngaolouyuma, puletao nou paopei khaitouyu sü ngaoloumoe,

⁴⁰ daiolouzü Ramai nou Eletaoye donou veikou shoyu kukheli khai khaitoue, süolouzü Eletaoye kozho-a laiyu sülikhei hinou puletaoye sou lichepei bailai.