EBRIAMAI 10 - SHEEYU BAIBEL (BSI)

¹ Jihudimai razhai hai vere acheche natao vei chekhouyu ea poloua vei zhai vuzümoe, daiolouzü haihai vere na avei taovei khu likhei baie. Sükuyu donou thaokhaimoa popatsü nou kheihaobüa sheela-a nou pothokhai khaiyu sünanou hakia Ramai hi taveyu ratho maitaoye souliche peilou hoe.

² Ramaiye thoyu maitao hai cheche nou puletao vei mah hinou soushee peiwure toulouzü, puhtao sü puletao mah donou hakia letsüpu khailai moe, alia sheelayu teiteisü thaowu bailai.

³ Ana popatsü sheelayu haitao nou maikhe maiye panou puletao vei mahtaosü lilouwe.

⁴ Daiolouzü chode ea nghitu zhenou hakia mahtaosü pota peilou hoe.

⁵ Haikuyu vanou Khrista nou deiphao hi vere kisü puhnou Ramai hi haibüa paoe: “Sheelayu ea pothoyu sü nenou züpa moe, ana nenou Eye donou pfüphao ali souda peiwure.

⁶ Meinou deia pothoyu ea mah donou sheelayu sü nenou lesa moe.

⁷ Süthaisü Enou paoe, ‘Zhukhaio, A vanou razhai larübvü hi rüthou khaiyu büa, Oh Ramai, ne leli nasü soure donou Esü veloure.’ ”

⁸ Raikai-a puhnou paoe, “Newo posheelayu, sa-a popeiyu, pfüphou nou pothou posheelabuh hinou meideia popeiyu ea mah donou posheelayu sütaosü hakia züpa moe moa lesayu hae.” Posheelayu sütaosü razhai thaifüa popeikhai-a puhnou haisü paoe.

⁹ Süthai-a puhnou paokhaie, “Zhukhaio, Oh Ramai, neleli nasü soure donou Esü veloure.” Südonou Ramai nou posheelayu ahai chenasü soushupa loure donou arai nasü souhare.

¹⁰ Daiolouzü Jisu Khrista nou Ramai nou puhye panou sounüyu nasü soulouyu donou Eletao hrülaiye sü lah puhnou puh pfüphaosü lühli hinou teisa vei soure thoupeiyu vanou soushee peire.

¹¹ Alia napao maitao hrülainou teithe tsünou naanou soua kheihao baiyu posheelayu sütaonou popei khaikhai baiwe; ana posheelayu sütao nou hakia mah pota louhoe.

¹² Ana Khrista nou mah donou posheelayu ali teisa vei donou popeiwua, puhnou Ramai bahkha zhoulovanou kou buloure.

¹³ Sühinou puhnou chuwo Ramai nou puhvei ngaoba maitaoye puh phi hi pove phihea soupeimo koute khoa bue.

¹⁴ Daiolouzü ali kheithe popeiyu sünanou puhnou mah hinou soushee louyu puletaoye sü teisavei donou southou liche peiwure.

¹⁵ Alia Rako Mashinou-a süna vanou puhvei zhopaohsü Eletao hi peie. Raikai-a puhnou paoe,

¹⁶ “Teithe sütaothai Enou puletaoye koa soulaiyu vo nasü hainare tea Mapao nou paoe; Enou Avei razhai taosü puletao lethou pei hi pothou khaipeilai, alia sütaosü puletao tsü lekhe hi rüthou khaipeilai.”

¹⁷ Süthaisü puhnou paoe, “Enou puletao vei mahtao ea ashi vahtao sü lichopu khailai moe.”

¹⁸ Südonou haitaoye khaipeiyu hisü, mah pota peire donou popeiyu sü matsü khaimore.

Eletao Ramai hi Tave Ngheilou Laikhe

¹⁹ Südonou, thaihou jürai khemai, Jisu vei zhe vanou chuo Eletao hi Mashi Shilai Buh hi talou loure mado nasü bure.

²⁰ Puhnou Eletaoye donou sah haokhai touyu süolouzü lah puhvei pfüphao vanou ashu ea hriyu ludu ali houpeire.

²¹ Alia Ramai kikha pei hi khoyu, Eletao vei dushoyu napaomai ali buyu donou,

²² Eletao nou vuzüyu lünou phoua buyu cheche le sünanou lekhetsü ashina hinou soushee peiyu Eletao le ea sheeyu dzünou khüsheeyu Eletao vei pfüphaoye koa Ramai hi takou ngheilou laikhe.

²³ Eletao nou füa laiyu areih sünasü Eletao nou letsüyu soukhaimoa soutao soua polou laikhe, daiolouzü apaopeiyu puhye sü louchelou veie;

²⁴ alia Eletao nou alinou liye panou leshi loure ea alinou lihi vah avei soupei-a panou alinou liye soukha peiloure kakua süthou peilaisa touyu vanou tsücho laikhe.

²⁵ Mai kamainou lüloumaime vedzüa buyu hi vekhai bayu büa Eletaowo soulai mokhe. Ana neletao nou Mapao vei teithesü ve ngheipu shoyu sü ngaoyu donou Eletao nou ali nou liye khoupua süthoupei laikhe.

²⁶ Daiolouzü Eletao nou acheche vei tsü nasü ngaolouyu thainou sütoua mah soulouzü sühisü mah pota loure posheelayu ali-a hare,

²⁷ ana vere chikuyu sünaye ngaopishoa ea Ramaiye ngaobamai taoye souhare chihshoyu meikei sünaye khoa buyu likhei baire.

²⁸ Moses vei razhainou paoyu zübayu maitaliye mai ahai moa asü vei chilapeiyu hinou zhuvea peiyu ali-a soukhaimoa southeawu baiwe.

²⁹ Sükuyu thaisü, kazhou koute shiyu tudeisü Ramainah Poutuye ngaorayu, alia puhye mah hinou soushee peiyu vo navei zhe sünaye souzhaiwuyu, alia zhuvea vei Rakoye sou ahrao peiyu mai sünanou ngaozüe tea nenou chowe?

³⁰ Daiolouzü haibüa, “Khüh phoure sü Aveie, Enou pao rüpeilai,” alia süthaia, “Mapaowo nou puhmaitaoye sü chikulai,” tea paoyu puhye sü Ehnou süwe.

³¹ Hriyu Ramai bah hi kaolouyu hai ngaopi pilai nasüe!

³² Raiki teiletao hi kakusa touyu sü lichokhaio. Teithe sütao hi Ramai avanou neletao pei hi vapeiyu thai neletao nou veahoyu alao vedaoyuma sütaosü neletao nou shamea loue.

³³ Chacha kisü neletaoye sü dua sou ahraopei ea souveapeie, alia chacha kisü sükua souvea peiwuyu maitaoye koa zha ngaozho loure donou nelenou soudawe.

³⁴ Neletao nou hukhahi bumaitao veahoyu sü koa zha ngaozho peie, alia neletao vei kina teitei saolouyu kisü, neletao vei hakayu hisü sasa-a shamea peie, daiolouzü chu koutea neletao vei veikou shoyu ea teisa vei souloure kinisü bue touyu sü neletao nou süwe.

³⁵ Südonou neletao nou louche-a buyu nasü polaiwuso, daiolouzü sünanou dushoyu buusü pove peiwe.

³⁶ Daiolouzü Ramai vei lichoyu souloure ea puhnou apaopei khaitouyu hai ngaoloure donou neletao nou shamea loure matsü bue.

³⁷ Daiolouzü sheeyu larübvü nou haibüa paoe: “Phajü chaokholoua, velaiyu puhsü velai; puhsü chao-a bulaimoe.

³⁸ Ana Avei achecheo sünanou lü vanou hriloulai, alia puhnou thaikhai tare toulouzü Enou puh lüsü valaimoe.”

³⁹ Ana Eletaowo thaikhai tayu ea hakayu mai sütao moe. Ana Eletaowo lü buyu ea khailu louyu mai sütaoe.