DOPFÜYU 3 - SHEEYU BAIBEL (BSI)

Tudeeyu, Ledalouyu, ae Areih

¹ E hai Ramai nou tudeeyu sü kabüwe touyu süyu mai nasüe.

² Puhnou Eye azhi hisü huthou leikhai leikhai peiwure.

³ Ae puhnou Eye zhuveayu lia ha-a nou dapeiyu thainou dapei khaikhaire.

⁴ Puhnou avei souke ae souhee sü soushi peiwure, ae avei rao khesü souchawure.

⁵ Puhnou Eye shishoyu ae veahoyu hukhaki hinou thou bekhai peiwure.

⁶ Puhnou Eye raichoki nou thaiyu mai ali büa teimai teizhi hinou pa bue.

⁷ Puhnou Eye hurai nou phumu loure, E hai hukhaki hinou tupa loure areih lia hade.

⁸ Enou shusoua nou Eye soukha peio tea kra-e, ana Ramai nou avei pai sü keipei bare.

⁹ Puhnou avei ludu khesü chuh nou khokhawure; Puhnou avei ludu sü soukhirukao laiwure.

¹⁰ Puhnou Eye vukü ali büa kholoure; Puhnou souveo ali büa Eye tutsüloua daloure.

¹¹ Puhnou Eye ludu hinou hulaiwure, Eye paide paisasa peiwure, ae thaokhai peiwure.

¹² Puhnou puhvei vouloushu sü paipa loua Eye kavure donou teloure.

¹³ Puhnou puhvei voulouthou sü avasou hi leisho-a kathou peiwure.

¹⁴ E sü maivei jünü soure, avanou puletao nou lou dapaloua soua nou bure.

¹⁵ Puhnou khayu, veahoyu hai nou avei touso soua peie.

¹⁶ Puhnou apah hai deiphi hinou poa nou roupeie, ae avei hutao sü chuh rao hinou sousha peie.

¹⁷ Enou pfüphao veiyu ae kaonayu alia savayu khesü ngaiwure.

¹⁸ E hai teile so-a nou hrilou hore; Enou Mapao hinou vuzhi-a buyu nasü hatare.

¹⁹ Enou avei veahoyu ae avei ki hayu sü licholoua sünasü khashoyu kaithapou ali büre.

²⁰ Enou hai nasü tobai soumoa licho veloua chathai tare.

²¹ Ana Enou hai nasü licho louyu phaki areih nasü ahi dakhai ve-e:

²² Mapao vei tobai soumoa leshi peiyu ae zhuvea peiyu nasü chukoute-a buhie.

²³ Süsü veishoyu shona bütoue, ae teinghi pavuzü laiyu bütou tea bue.

²⁴ Mapao hai avei soulai, ae Enou avei areih nasü puh hi bulai.

²⁵ Mapao hai puhye lüa loucheyu mai hrülai hi veisho-e.

²⁶ Südonou Etao hai heameapoa puhvei vu kholouyu haina-a veika-e, Etaoye khailupa peiloure donou puhvei vu kholo.

²⁷ Heameayu haina hai nahle-a bukinou doulouyu-a veiveilai nasüe.

²⁸ Etao nou veahoyu phaki, chobuloua nou zei tea shameapoa buyu pha-e;

²⁹ Etao nou nakoulou-a puh hi peithou louzü, sühisü areih hai bulou vei-e.

³⁰ Taida peia ae hraongu soupeiyuma, Etao nou süsü pfüyu kaobaie.

³¹ Mapao hai maiye zhuvea sühsho-e ae puhnou Etaoye teisa sü malaiwulai moe.

³² Puhnou Etao hi veahoyu hai pove peia mala-e, ana puhnou Etaoye leshiyu hai dusho-e.

³³ Puhnou Etaoye panou veahoyu ae souyu haisü ngaoloua puh-a lesa moe.

³⁴ Mapao nou hukhaki hi buyu maitaoye phi nou taikya peiyu hai ngaowe;

³⁵ Etao nou ngaozütao hai Etao hi peimore touyu sü puhnou süwe.

³⁶ Chikubuh hisü kaozü nasü porei laiwure touyu hai puhnou süwe.

³⁷ Mapao vei leli loumoa nou mai linoua halia soupfü louhoe.

³⁸ Havei-a moyuma hashiro puhvei kharochi thaifüa vepa-a bubaie.

³⁹ Etao nou soumah pfümah khaitouyu vanou Etaoye tudee peiyu phaki, Etao daisounou nolealea bulaige?

⁴⁰ Etao nou Etao ludu sü soutaosoua zhuloua nou Mapao hi dakhai veloua bailaikhe.

⁴¹ Eletao vei tsüle veishi hai rakiva buyu Ramai hi peilaishe ae veachi paolaikhe,

⁴² “Etao nou mahmo souwure ae khaityawure, alia Oh Mapaowo, nenou Etaoye sü khaipei more.

⁴³ “Nenou Etaoye sü thaingouho southawure, ae nevei zhuvea leshi nasü nevei lekha rarou nanou pokure,

⁴⁴ Teihao nou chaotei touloua Etao nou veachi paoyu sü loute louhore.

⁴⁵ Nenou Etaoye sü tyahrütao hrohinou sheemoyu ae nghoushi ali büa soupeiwure.

⁴⁶ “Etaoye ngaobayu maitao nou ngaophou moa konüpeia nou bure.

⁴⁷ Etao hisü veahoyu ae hakayu sünou veloure; Etao hai kaozhou ashi ae ngaopiyu hinou hrüa bubaire.

⁴⁸ Avei maitaoye soushi soukanghi peiyu donou anghithou hai reidzü büa nghidzü nou küa bure.

⁴⁹ “Avei nghidzü hai reitou ali büa thaokhai timoa küa nou bua bailai,

⁵⁰ Mapao nou rakiva nou Etaoye zhukou ngaoloumo koute hai.

⁵¹ Nuhdu hinou hrüyu naotu maitao hi vepayu khesü Enou ngaoloua ale hai veashore.

⁵² “Eye ngaobayu maitao nou kaozü ali-a hayuma Eye sü raohou ali büa thaihure.

⁵³ Puletao nou Eye sü hria nou deibvü hi laithou peiwua chuh nou mü sü khungi peiwure.

⁵⁴ Dzü nou apei hi kükhere, ae E hai thaire nghitei loure tea tsüchoe.

⁵⁵ “Deibvütei akhai hinou, Oh Mapaowo, tea Enou puh hi kra-a kuwe,

⁵⁶ ae Enou kuyu avei pai sü keipeio tea paoyu phaki puhnou apai hai keipeie.

⁵⁷ Nenou Eye chila peie ae Eye ngaopiso tea ahi paopeie.

⁵⁸ “Nenou Eye sü tave vupa peie, Oh Mapao, ae avei hrü sü khailupa peie.

⁵⁹ Oh Mapaowo, ahi soumah peiyu khesü nenou ngaowe, südonou kaozü thaifüa chilou sü kupeio.

⁶⁰ Eye ngaobayu maitao nou kabüa Eye ngaorawe ae kabüa puletao nou ahi shodo ashi sü soupeie touyu khesü nenou süwe.

⁶¹ “Oh Mapaowo, puletao nou Eye ngaophou moa paoshiyu sü nenou chouloure, ae puletao vei do ashi khesü nenou ngaowe.

⁶² Puletao nou heamajü sü Eye soushi peire donou chi phawe ae shodo ashi khesü tsüchoda-a nou bue.

⁶³ Shona nou poa koukhe koute hai puletao nou Eye ngaohia nou konüa bue.

⁶⁴ “Oh Mapaowo, puletao nou soupfüyu thaifüa puletaoye tudee peio;

⁶⁵ Puletaoye chaa peio ae puletao hisü veahoyu hai peio!

⁶⁶ Nevei lekha rarou hinou puletaoye thaihuloua puletaoye nevei deiphao hinou souhalai peio!”