DOPFÜYU 1 - SHEEYU BAIBEL (BSI)

Jerusalem nou Veahoyu

¹ Raichoki mainou phoutao-a buyu nuhdu nasü, chuo kabüa zei tea bure sarou! Vuli hi deiphao mainou tsükhoua buyu nasü, chuo puh sü mimeapfü ali büa bure; Nuhdutao hrohinou vepfüpai soua buyu sü chuo maivei qila soutare.

² Kheimathe honapai sü kra-a bure; nghidzü hai puhvei baitu hi kükoure. Honapai vei samai khamai hrülai nou puhye sü thaowua takhai toure, puhye sousava peire mai lia hare. Honapaiye chavei lathao-a buyu mai hrülai nou puhye sü lalu peiwure, ae puletao nou chuo puhye sü ngaobayu mai soutare.

³ Judah hi maitaoye sü taitsü poa veasho-a panou vah sou-e, Süpei hinou puletaoye sü vakou nüpoa satare. Puletao hai tyahrü kukhe maivei teidei hi ho hrütare, ana lah puletao vei soua soloure buh ali-a ngaomoe. Ngaoba maitao nou puhye sü sühao loure, tupa loure ludu aliro hazei toure.

⁴ Mailinoua chuo Rathoki hisü sheeyu teithetao hia tave ratho more. Naotumaitao nou sühinou veahoyu vei lou soua bue, ae napao maitao nou lüpoa nou bue. Nuhdu vei rokhubomü khesü sakhai-a nou bure, ae Zion sü veahosho-a nou bure.

⁵ Honapaiye ngaobayu maitao nou puh jünou koloure, Honapaiye thaihraiyu maitao nou veipa loure, daiolouzü honapai nou mahmo souyu hai pouleyu donou Mapao nou puhye sü veahoyu hai peiwure; Honapai vei nahmaitao hai hukhamai soua vakou nüpoa tare.

⁶ Jerusalem vei kathe aveih khesü hatare. Puhvei süthai-apei maitao hai pou ngaotou moyu khoshu büa lülou hore, Puhye thaihuyu maitao nghoujü nou khouko lia ha-a tua bure.

⁷ Jerusalem nou veahoyu ae tateiyu daoyu thainou, raichoki puhvei haveih ae savayu khesü licholoue. Honapai hai ngaobayu maitao bah hi louyu phaki, mailinoua puhye sü soukha peire mai hare; Honapai nou kaodu tayu sü ngaobamaitao nou ngaoloua puhye sü konüre.

⁸ Jerusalem nou mahmo hai soupou zhulere, südonou honapai hai mai konü soutare. Honapaiye tsükhoua buyu mai hrülai nou puhye sü ngaorare, daiolouzü puletao nou honapai vei baitouyu sü ngaoloure; honapai hai lah lüa pah pfüku tare.

⁹ Honapai vei shee moyu sü ngaokhai loure, ana haithai puh hi dai vepalai touyu hai honapai nou tsücho moe; südonou honapai sü kaodu tare, ae puhye sousava peire mai lia hazei toure. Honapaiye ngaobayu maitao nou veiloure, ae honapai nou Mapao hi zhuvea leshi peio tea kra-a khowe.

¹⁰ Ngaobayu maitao nou honapai vei nangi buyu veishi sü poloure. Sheemoyu tyahrü kukhe maiye panou kikha louso tea Mapao nou kharochi peikhai touyu Rathoki hisü puletao nou talouyu hai honapai nou zhingao-e.

¹¹ Honapai vei mai hrülai sü lüpoa nou raokhao phoua laire; Puletao hai hria buloure donou puletao vei muteina khesü poa touso lea loure. Nuhdu sü haibüa kra-a bure, “Oh Mapaowo, Eye zhukhaio, avei veahoyu khesü zhupei khaio.”

¹² Honapai nou takou takheyu mai hrülai hisü haibüa kra-a paoe, “Eye zhupei khaio! Mailia Enou souyu büa souyu mai ha-e, Mapao nou puhvei lekha rarou hinou Eye veahoyu pove peiyu büa maili hia soupei moe.

¹³ “Puhnou mei sü reilova nou seikou peie, ae mei sünasü alekhe nou kei-a nou bue. Puhnou Eye muloure donou shorü southou khaipeie, ae Eye deiphi pokou khaipeiwure. Süthaisü puhnou Eye thaokhaiwure alia Eye panou sokhai timoa soua nou bua baire.

¹⁴ “Enou soumah khaitouyu veishi sü puhnou pothou hrüloure; Puhnou sütao hai ate hi khikhai peie, ae Enou sütao hai pfülou hore. Enou dulou hoyu avei ngaoba maitao bah hi Mapao nou Eye sü thoupeire.

¹⁵ “Mapao nou avei khoukayu reihmaitaoye sü malaiwua konüre; Puhnou avei nahle maitaoye souhare donou ngaobayu reihmaitaoye sü seive peire. Puhnou avei maitaoye sü darkhadzü süyu büa süchichi peire.

¹⁶ “Hai vanou Esü krawe, nghidzü nou anghithou sü phouloure. Eye sousava peire mai lia hare; mailinoua avei tsüle soudu peiloure mai hare. Ngaoba maitao nou ajünou veiloure; avei maitao hai hazei tare.

¹⁷ “Enou abah sü thaipa-e, ana mai linoua Eye soukha pei more. Avei kinapa maitaoye panou Eye haire donou Mapao nou kupove peiwure; Puletao nou Eye sü na ashi ali büa poa baire.

¹⁸ “Ana Mapao louzü kao-a baie, daiolouzü Enou puhvei chi sü zülou more. Neletao mai hrülai nou avei chipao sü keilo ae Enou veahoyu sü zhukhaio. Avei nahleyu maitaoye sü hukhamai soua vakou nüpoa tare.

¹⁹ “Eye leshiyu maitaoye sü Enou kuwe, ana puletao nou Eye tave soukha peibare. Napao maitao ae süthai-apei maitao hai hriloure donou touso phoua nuhdu vei luduva kinou thaitare.

²⁰ “Oh Mapaowo, Enou veahoyu ae chorosoua buyu sü zhupei khaio. Avei mahmo vanou Esü tsüle pepoa nou bure; kikha hi koute-a athai sü bure.

²¹ “Enou lüa buyu sü kei peikhaio; mailinoua Eye sousava peire mai hare. Nenou veahoyu khesü ahi pove peiyu phaki Eye ngaobayu maitao nou asah soua bure. Nenou paoh peikhai touyu teithe nasü pove peio; avei ngaoba maitaoye panou Enou veahoyu büa puletao-a veahoyu peio.

²² “Puletao nou vah haso ashi soukhai touyu veishi vanou puletao hia veahoyu sü peio. Avei mahmo vanou Eye tudee peiyu büa puletao-a tudee peio. Ewo veahoyu donou lüpoa nou bua baire, ae avei lüthou hinou soua nou bure.”