DANIEL 7 - SHEEYU BAIBEL (BSI)

DANIEL NOU PUHVEI ZHO NGAOYUTAO PAOPEIYU ( 7.1—12.13 ) Daniel nou Khaosou Adai Zho Ngaoyu

¹ Babilon hi veo Belshazzar nou vekoulouyu po arai nahisü Daniel nou mekou nou zho ali ngaoe. Sütaosü puhnou rüthou khailoue, alia süzhou khei puhnou ngaoyu zho nasü haibüe:

² Enou zhia buyu phaki, avei zho kounou deiphao kainghou adai hinou teikhai sü hüpoa ve zaidu dzü sü hülüa ngaoe.

³ Alia tyakukuyu soukhao adai lihai zai hinou ngaopare.

⁴ Araina hai souveo raiwe, ana lühche shouh pfüwe. Süthaisü Enou zhua buyu hinou puhvei shouh sü paide laiwure, alia puhye sü polashu mai ali büa panou phi ahai nou laloure; ae puh hisü maivei tsüle thoupeiwure.

⁵ Khaosou ahai chena hai vuh büa phi ahai nou lapoa buyu Enou zhingaoe. Puh mü hinou turaopo asü tupoa nou bue ae pai ali nou haibüa shae, “Tashulo alia nenou toulou süyu sou khesü toukhaio.”

⁶ Süna thailo hai Enou zhua buyu phaki, khaosou kukhe ali hai shirakhao zhai büa tapa-a ngaoe, ana puh phao hisü raohou shouh adai ae pei adai pfüwe. Puh hisü tukha lousüyu khouko thoupei khaitoue.

⁷ Süthaisü Enou zhua buyu phaki, ngaopi shoyu, khouko bushoyu ae dushoyu khaosou adai nasü ngaoe. Puh sü dushoyu hu vei huh pfüwe, puhvei dushoyu huh süna sünou puhnou ngaorayu kheyesü nüloua tusasa peia baiwe, alia shokhai touyu khesü phi nou taicha baiwe. Khaosou haina hai kukhe soukhaotao jünou tyakua kai kirou pfüwe.

⁸ Enou kai sütao sü tsüchoa zhua buyu phaki, kaitao hrohinou kai taitou ali paopa-a zhingaoe, kai sünatou nou paopaloua rai-a buyu kai kukhe asü taoye sü bei hinou soula laiwure. Kai sünatou hisü nghithou ali bue, alia khouphu soushoyu chipao paoyu mü ali bue.

Teisa nou Hria Buyu Mai Aliye Zho Ngaoyu

⁹ Enou zhua buyu phaki, vebuh khesü pokou khaipeia zhingaoe. Teisa nou hria buyu mai süna sünou vebuh ali hi kou buloure. Puhvei sabanü hai vürah büa kaawe ae puhvei peishu hai veikayu phako büe. Puhvei vebuh hai lukiphi pfüa mei taopoa tawe.

¹⁰ Alia puh nghoujü hinou mei nou küpoa tayu rei ali küpawe. Puhvei vebuh hisü mai thethe nou puhvei kuvah soua bue alia mai zzü-zzü kaa-kaa nou puh nghoujü nou la-a bue. Chikuyu buh hinou chi sü kutare, alia larübvü khesü laopare.

¹¹ Enou zhua buyu phaki, soukai taitou nasü khaophu soushoua raopoa buyu Enou choue. Alia Enou khaosou adai naye sü southayu ngaoe, alia puhvei pfüphao sü mei hi laithou mei deiwure.

¹² Soukhao kukhetao louzü southa moa panou phateile daotu hrüre donou phapeiwure, ana puletao vei khouko louzü puletao hinou popawure.

¹³ Enou mai ali büa rakiva teihao nou koa jüpoa veyu avei zho kounou ngaoe, alia puhye sü teisa hria buyu nahisü sapoa koupeiwure.

¹⁴ Puh hisü soulou süyu zü, kathe alia vedei zhure khouko teitei peiwure. Puhye sü panou mai hrülai, tyahrü teitei, ae la kukua paiyu mai veishi panou puhvei kuvah soulai, puh hisü teisa nou khasa-a hrüre khouko sü bulai, alia puhvei vedei hai hakhai toulai moe.

Zho Ngaoyu nasü Paolapa Peiyu

¹⁵ Daniel, E sü le veashore alia Enou zho ngaoyu na vanou ale sü chorore.

¹⁶ Buh sühinou la-a buyu mai ali hi Enou ngaoyu zho nasü daivanoue tea noue. Puhnou ahi Enou ngaoa buyu zho nasü daivanoue touyu paongao peie.

¹⁷ Puhnou paoe, “Soukhao adai hai deiphao hi vemai adai vere taoe.

¹⁸ Ana Kukulai Ramai vei maitao nou vedei sü poloulai, alia vedei sü teisa puletao vei souloulai.”

¹⁹ Süthaisü Enou kukhe jünou tyakuyu, ngaopi shoyu hu vei huh pfüyu ae baosahu bahtsü pfüa buyu süna nou nüloua soudesasa peiyu ae shokhai touyu khesü phi nou taicha peiyu soukhao adai chena vanou süpunü loure.

²⁰ Alia kai kirou pfüyu, ae kai taitou ali tsüpayu ae süna nghoujü nou kai asü latayu, alia nghithou ali ae khaophu soushoa raoyu mü pfüa kukhe jünou duyu büa buyu kai süna vanou Enou süpulou nüre.

²¹ Enou zhua buyu phaki, kai sünatou nou Ramai vei maitao hi reih züre, alia puletao jünou reih veiloure.

²² Süthaisü teisa hria abuwo nou Kukulai Ramai vei maitao jüpa hinou chikude peiwure, alia Ramai vei maitao nou vedei nasü ngaoloure teile sü vere.

²³ Puhnou haibüa ahi paolapa peie, “Soukhao adai nahai deiphao hi vedei adai chena-e, alia vedei süna hai kukhe maivei vedei teitei jünou tyakulai alia puhnou deiphao teitei sü souphesasa khaiwulai alia soushi khaiwulai.

²⁴ Kai kirou taohai vedei sünahi vemai kirou palai, ae puletao thailo hisü vemai ali palai, puh hai vemai kukhe jünou tyakulai, alia puhnou vemai asüye souhawulai.

²⁵ Puhnou Kukulai Ramai ye paoshilai, ae Ramai vei maitaoye souvealai, alia puletao vei rathoyu zhai ae khonü khesü souhare donou telai; ae Ramai vei maitao hai puh bah hinou po asüa da hai veashoa hrülai.

²⁶ Süthaisü rakiva chikuyu buh hinou puh pei hisü chikulai, alia puhvei khouko sü puh hinou polaiwulai alia puhye sü souhakhai touwulai.

²⁷ Deiphao hinou buyu vedei teitei ae khouko teitei sü Kukulai Ramai vei maitao hisü peiwulai. Puletao vei vedei hai teisa vei vedei soulai, alia deiphao hi vemai hrülai nou puletao vah soulai ae puletao chi zülai.”

²⁸ Akhai nasü haihaie. Daniel, E sü tsücholoua ngaopire, alia avei zhuh shirah tare, ana chi paokhai touyu taosü Enou ale hi pokhai loure.