DANIEL 6 - SHEEYU BAIBEL (BSI)

Danielye Souveo Be hi Laithouyu

¹ Darius veo nou puhvei vedei hi panou nuh khore donou peikhomai kaihlia kai khailai tea tsücho loure.

² Puletao pei hi khoa zhupeire donou ae veo vei vahtao zhua souzü peire donou mai asü hai peikhomai panou soulai tea dopa khaitoue, sühisü Daniel-a loue.

³ Süthaisü vedei hi aduso maitao alia peikho maitao hrülai jünou Daniel nou veipu shohie, daiolouzü puh hisü checheyu rako bue, alia veo nou Danielye panou vedei teitei pei hi khowo soulai tea tsücho loure.

⁴ Südonou aduso maitao ae peikho maitao nou Daniel nou vah souyu hi puhvei mah phoue, ana puletao nou puh hisü mah phouhare, daiolouzü puh hai mainou louchelou veiyu mai alie, alia puhnou kaomoyu ae cheche moyu vah khesü aliro sou moe.

⁵ Süthaisü puletao hai mai linou mai lihi haibüa paoe, “Eletao nou Danielye mah duka peiloure hai puhnou Ramai ye thoyu chikha hideinou hakukhe hiolouzü Etao nou puhye mah duka peiloure ludu hade.”

⁶ Südonou peikho maitao nou koa do zholoua tave veo hisü paoe, “Oh Darius Veo, neye panou hrüsho theo!

⁷ Ne khenou buyu Etao peikho maitao, vedei zhu-apei maitao, alia vahdubu buyu mai hrülai nou neye panou chikha ali soupeilai ae sünasü panou vedei teitei hi zhai ali soua talai tea ae-ao souloure, süolouzü Oh Veo, ne hinou moa rah tarali hinou moyuma mai tarali hinou teithe shirou lihai veachi paolouzü, puhye sü souveo be hi laithoulai.

⁸ Südonou Oh Veo, sünasü chikha ali soupeio, sübüa panou souphe soupho louhoyu Medes ae Parsia mai vei chikha ali soupeio.”

⁹ Südonou veo Darius nou sünasü ae-ao tea sheesao nopeiwure.

¹⁰ Veo nou chikha nasü ae-ao souloua sheesao nopeiwure touyu Daniel nou süa bulikhei, puhnou teithetsü puh ki hi veloua puhvei kide areina hinou buyu vabome, Jerusalem hilova reipoa buyu hinou khoukhüloua teitheli hinou bakha asü Ramai hi veachi paoe alia puhye paoshowe.

¹¹ Süthaisü Daniel nou Ramai hi veachi paoyu ae soukha khoyu sü puhye ngaobayu maitao nou ngaoloure.

¹² Südonou puletao nou chikha na vanou veo hisü ve paoe, “Oh Veo, nenou mai taralia ne hinou moa nou rah tarali hinou moyuma mai tarali hinou teithe shirou lihai veachi paoa soukha kholouzü, puhye sü souveo be hi laithoulai tea chikha soukhai toumowu?” Veo nou chila peie, “Pfüphe pfüpho louhoyu Medes ae Parsia maivei zhai thaifüa chikha nasü lachü tea bubaie.”

¹³ Süthaisü puletao nou veo hisü chila peie, “Oh Veo, Judah teidei hinou nüpoa veyu maipu ali Daniel tea kua buyu nanou neye tsükhou moe alia nenou soukhai touyu chikha nasü zümoa puhnou teithe ali hinou bakha asü veachi paowe.”

¹⁴ Veo nou haihai choulou khaie le veasho loure, alia Danielye vupa loure donou ludu phoua tsüchoe. Puhnou teinghi louyu koute kabü louzü puhye vupa loulaisa tea bo phoue.

¹⁵ Süthaisü maikhe maitao nou ve veo hisü paoe, “Oh Veo, Medes ae Parsia maivei zhai thaifüa vemai ali nou paopa khaitouyu chi moyuma chikha soukhai touyu nasü souda laiyu zhai moe.”

¹⁶ Süthaisü veo nou Danielye sü nülo alia souveo be hisü laithouwo tea kharochi peiwure. Veo nou Daniel hi paoe, “Nenou chilee chechea thoyu Ramai ye panou neye vupapei theo!”

¹⁷ Souveo taonou buyu kaobvü mü sü chuh ali nou pokou hore, alia Danielye panou mai tarali noua vupalou more donou chuh hisü veo vei sheesaoyu ae peikho maitao vei sheesaoyu sünou koa saopaloua hokhaire.

¹⁸ Süthaisü veo nou puhvei ki hi dakhai ve tare, alia süzhou khei puhnou halia tou moe, panü ralya haia soumoe ae puhsü zhia zhimoe.

¹⁹ Teithe rarapa khaie, veo nou souveo buyu buh hisü tuvere.

²⁰ Daniel nou buyu buh hisü puhnou nghikouyu phaki leveashoa puhnou Danielye shusoua lae, “Oh Daniel, Hriyu Ramai vei kilaiwo, nenou nevei hrümai teitei nou peia thoyu Ramai nanou neye souveotao hinou vupapei homoe?”

²¹ Daniel nou veo hisü chila peie, “Oh Veo, neye panou hrüshoyu sü soulou theo!

²² Avei Ramai nou puhvei rakivamai seikou souveotao mü sü phupeiwure, alia puletao nou Eye soushi moe, daiolouzü Enou Puh nghoujü nou mah soumoe, alia Oh Puo Veo, Enou ne nghoujü hia mah soumoe touyu Puhnou süwe.”

²³ Süthaisü veo nou sashore, alia Danielye kaobvü hinou vakou sapawo tea kharochi peie. Südonou Danielye sü souveo be hinou sapa loure, alia puh va sü halia soushi moe, daiolouzü puhnou Ramai ye lülouche-e.

²⁴ Süthaisü veo nou Danielye mah duka peiyu mai hrülai, puletao vei chapfü ae nahmai hrülai noupu souveo be hisü laithouwu tea kharochi peiwure. Puletaoye deiphi hi laikou nghitemo kinou souveotao nou taoloua puletaoye sü paide paisasa loua touloure.

²⁵ Süthaisü Darius veo nou deiphao hrüyu tyahrü teitei hi, maitya hrülai hi ae la kukua raoyu mai veishi hi haibüa kharochi rüloua seitae: Mai hrülai nou savayu sü soulou theo!

²⁶ Enou kharochi haina sü peiwe, süolouzü avei vedei hi hrüyu mai hrülai nou “Daniel nou thoyu Ramai ye sü ngaopia tsükhoulai. Daiolouzü puh hai hriyu Ramai nasüe, Puhnou teisa khasa-a hrülai; Puhvei vedei sü akhai bulai moe, alia puhnou khosa-a hrüre hai akhai bulai moe.

²⁷ Puhnou khailu peiwe ae vupa peie, puhnou rakia ae deiphao-a shee ae khupayu vah sü soupeiwe, Puhnou haka laiyu Danielye souveo mü hinou vupa peie!”

²⁸ Daniel nou veo Darius ae Parsia hi veo Sairas nou vekouyu phaki sava-a nou vei-a hrüe.