AMOS 9 - SHEEYU BAIBEL (BSI)

Mapao Nou Chikure

¹ Rasheelayu buh pe hinou Mapao nou la-a buyu Enou zhingaoe, alia Puhnou paoe, “Rathoki peimatao nasü dakhosa mokoute dakho khaio, ae dakhokouh mai khemai pei hi deikhaio; alia shokhai toua buyu maitaoye sü Enou khoche nou daotha khaitouwulai; mai ali koute-a panou tutaloulai moe; mai ali koute-a panou palou laimoe.

² Puletao nou thaimai buh hi hepolou buyuma, Enou puletaoye sü nüloua bailai; puletao nou rakiva taokhe buyuma, Enou puletaoye sü ponakou bailai.

³ Puletao nou khe Karmel deitao hinou tuchüa buyuma, sühi-a Enou phoupa loua bailai; alia puletao nou zaidu teikhai hinou lou anghoujünou tuchüta-a buyuma, zaidu hi nghou naye Enou paopeiwua panou puletaoye daopeia bailai.

⁴ Puletaoye ngaoba mainou nüpoa tayuma, Enou puletaoye southawo tea kharochi peia bailai. E hai puletaoye soukhare donou moe, ana puletaoye souhare donou Ale lachewure.”

⁵ Khoukhoulai Mapao Ramai nou deiphao deipeiyu phaki, nüsüa baiwe; ae sühi hrüa buyu mai hrülai hai dopfüa baiwe, alia deiphao teitei hai Ejipt hi Nail rei na büa kükou kükhea baiwe.

⁶ Puh hai rakiva nou puhnou buyu ki soue, alia deiphao hinou phi heayu buh souwe; Puhnou zaidu hinou dzü kuloua deiphao hi teirü kouh peiwe, Puh zhih hai Mapao tea kuwe.

⁷ Mapao nou paoe, “Oh Israel maitaore, neletao hai Eye donou Sudan mai bümowu? Israel maiye Enou Ejipt teidei hinou sapapei mowu? Alia sübüa nou Kaphtor mai bah hinou Philistin maiye ae Kir mai bah hinou Sairia maiye Enou popapei mowu?

⁸ Ramai Mapao Enou, anghithou sü mah soua buyu Israel maivei teidei nasü zhua bue. Deiphao hinou Enou teidei haina sü souhawulai. Ana Jakob kihikha maiwo louzü Enou teitei nou souhakhai toulai moe.

⁹ “Zhukhaio, Enou kharochi peiwua panou thouvuyu mai linou thouba chepayu büa tyahrütao hrohinou Israel maiye sü chelai bailai, ana thoubu ali koute-a panou deihi raikou laimoe.

¹⁰ Mah souyu avei mai hrülai alia ‘Ha ashi hai E pei hi velai moe moa Eye ve daolai moe,’ tea paoyu mai hrülai hai khoche mü hinou thailai.”

Israel Maiye Khailu Peire

¹¹ Mapao nou paoe, “Enou David vei vedei, shita-a buyu nasü soupu loua nou alia kaota-a buyu nasü soulapu loua nou, alia daoraiki büa soupu loua nou peida khailai.

¹² Ae sübüa Enou Edom maivei teidei alia daoh vuli avei soua buyu tyahrü hrülai hai Israel maiye panou reih veiloua poloulai.”

¹³ “Haibüyu teithe nasü velaire,” tea Mapao nou paoe, “Dou shayu mainou chachiyu mai jünou railoulai, alia darkhabe shoyu mainou darkha dzü süyu mai jünou railoulai. Deichi taonou mouyu darkha dzü sü süpeilai, alia deitao khenou süsü küpeilai.

¹⁴ Enou avei Israel maiye sü puletao vei teidei hi sa-a dakhai ve peilai, alia puletao nou shitayu nuh khesü soushupu loua sühinou hrüwulai; puletao nou rashibe sholoua süna vei rashithou haitoulai.

¹⁵ Enou avei maitaoye sü puletao hi peikhai touyu teidei hinou shoe, ae puletaoye paipapu khailai moe.” Haisü neletao vei Ramai Mapao nou paoe.