AMOS 7 - SHEEYU BAIBEL (BSI)

Zho kounou Khazü Ngaoyu

¹ Haibüa Ramai Mapao nou ahi ngaoe: Veo vei zha pouhou sailouyu thai, pouhou lapayu teile phaki, Puhnou khazü soua bue.

² Poudai khesü khazü nou toukhai loua Enou ngaoe. Süthaisü Enou paoe, “Oh Ramai Mapao, nevei maitao mah sü khaipeio tea khowe; kabüa nou ne maitao hai hrilou khailai? Puletao hai taiyu lehie alia lelouho lehie!”

³ Mapao nou haina donou le daloua paoe, “Haisü panou vepa khailai more.”

Zho kounou Mei Ngaoyu

⁴ Ramai Mapao nou ahi haibüa ngaoe: Ramai Mapao nou Puh vei maitaoye meinou seikou souveare donou souda-a bue. Mei sünanou zaidu nasü taokhei touwua deithe hi taopare.

⁵ Süthaisü Enou paoe, “Oh Mapao, baipei baio tea E ne hi khowe! Kabüa nevei mai haitao hai hrilou khailaige? Puletao hai taiyu lehie ae lelouho lehie!”

⁶ Haina donou Mapao nou le daloua nou paoe, “Hainaro panou vepa khailai more.”

Zho kounou Khiyua Douyu Rai Ngaoyu

⁷ Puhnou ahi haibüa ngaoe: Soukhai touyu bouvo pehisü khiyua doure donou Mapao nou khiyua douyu rai ali puh bah hinou poa la bue.

⁸ Puh nou ahi paoe, “Amos, ne dai ngaoe?” “Khiyua douyu rai ngaowe” tea Enou chila peie. Süthaisü Mapao nou paoe, “Zhukhaio, Enou avei mai haitaoye chichi moyu nasü bouvo büa douzhure donou khiyua douyu rai nasü khaikhai toue. Puletaoye souvea laiyu hinou Ale datapu khailai moe.

⁹ Isaak vei tyaonahtao nou rathoyu buh khesü souhawulai, Israel maivei sheeyu buh khesü soushiwulai, alia Enou veo Jeroboam vei kihikha maiye sü khoche nou daothawulai.”

Amos ae Amaziah

¹⁰ Süthaisü Bethel hi napao Amaziah nou Israel maivei veo Jeroboam hi seiko haibüa seive paoe, “Amos nou Israel mai hrohinou neye paoshi shoa bure, teidei haihi hrüa buyu khemai nou puh chi hai healou hore.

¹¹ Daiolouzü Amos nou haibüa paoe, ‘Jeroboam hai khoche hinou thailai, alia Israel maiye sü puletao vei teidei hinou doushoa ngaoba mainou nüpoa talai.’ ”

¹² Süthaisü Amaziah nou Amos hi paoe, “Oh rachipaolawo! talo, ne Judah teidei hi taho sühinou ne pou kutoua rachi paobaio.

¹³ Ana Bethel haihi louzü ne rachi paopu khaiso, daiolouzü haihi hai veo vei rathoyu buh-e alia vedei hi buyu maivei rathoki baie.”

¹⁴ Süthai Amos nou chila peie, “E hai rachi paolayu mai moe, moa rachi paolayu mai nah-a moe; ana Ewo louzü zhaotu kholaiyu mai ali baie, alia bousüü kao khao-a vah souyu mai ali baie.

¹⁵ Ana Mapao nou Eye zhaotu khoyu hinou saloua ahi paoe, ‘Taho avei Israel mai hi vepare rachi paopeio.’ ”

¹⁶ Südonou chuo Mapao nou paoyu sü keilo. Neletao nou paoe, “Israel mai hi rachi paopuso, ae Israel maiye paoshiso.”

¹⁷ Südonou Mapao nou haibüa paoe, “Ne chapfü sü nuhdu hinou khakhapfü soutalai, alia ne nahpoutu ae naotu khesü khoche hinou thailai, alia ne teidei sü mainou dezhi potalai, alia ne masha koutea sheemoyu teidei hinou thaiwulai, ae Israel maiye sü veikhai mosoua doushoyu teidei hisü nüpoa talai.”