AMOS 6 - SHEEYU BAIBEL (BSI)

Israel Maiye Soushiyu

¹ Zion hinou talabou-a nou vashoa hrüyu khemai, Samaria deichi hinou vaphia ngaopiyu aliro hanou hrüa buyu khemai, tyahrü hrohinou matsüli soua bukhemai, Israel mainou ve soukha khoa buyu maitao, neletao hai daizhou koute veayu soulaisa!

² Kelnah nuhdu nasü takou zhukhaio; süthaisü dushoyu Hamath nuhdu nasü ve zhukhaio; sühinou takouh Philistin maivei Gath nuhdu nasü zhukhaio. Neletao vei vedei hai puletao vei jünou veipu hiwu? Ho puletao vei teidei hai neletao vei teidei jünou kahpu hivu?

³ Oh! neletao hi veahoyu teithe sü velaire touyu hai louche bae, ana neletao nou soua buyu vahtao sü sünaye pove nghipu peia baie.

⁴ Paongi nou soukhai touyu züphao hinou züa buyu khemai, bu-zü aveih hinou buyu maitao, alia zhaokhome hrohinou zhaotu aveih ae chokhome hinou choteu hrüvei nou datoua laimai, neletao hai daizhou koute vealaisa!

⁵ Neletao hai David büa lou dapaloua lana noupu poa lou sounüe.

⁶ Neletao hai pai phoua nou zhaoh so-e alia veishoyu theadzü nou nawe, ana Israel kihikhamai nou shitayu vanou neletao hai levea-a dopfü moe.

⁷ Südonou nüpoa tayu hisü neletaoye panou araina soulai, alia neletao vei khonü ralya khesü panou hata bailai.

⁸ Teideiphao ahai pei hinou buyu Mapao Ramai nou haibüa paoe: “Israel mai vei khaophu nasü Enou ngaorae, alia puletao vei nuhdu khesü Enou ngaorae. Puletao vei nuhdutao ae sühi buyu veishi Enou ngaobamai bah hi peiwulai.”

⁹ Kihikha ali hinou mai kirou shoa bulouzü, mai sütao-a thai bailai.

¹⁰ Kityarai mai linou thaiphao nasü vakou popalai touyu phaki, kihikha mai aliro buhadesa teanou haibüa noulai, “Mailia neye koa buhomoe?” “Bumoe” tea chila sü peilai. Süthaisü kityarai mai nanou paolai “Paikhai tiso! Eletao hai Mapao zhih sü sathou pulai modao.”

¹¹ Zhukhaio, Mapao nou tudee veyu phaki, ki adu-atai teitei nou peko sasa ta bailai.

¹² Rhei hai chuhlya phao hinou tuwu? Mainou chode sa-a zaidu hinou tatawu? Sübümoe, ana neletaowo kaozü nasü maiye shutha laiyu pou-ashi hi soudathou peiwure, alia acheche nasü kaozü moyu hi souda thoupeiwure.

¹³ Neletao nou reih soulou Lodebar nuhdu nahai polouyu vanou khouphu souwe. Neletao hai “Avei pfüchi vanou Karnaim polou mowu?” teanou phusoua paoe.

¹⁴ Khoukhoulai Ramai Mapao nou haibüa paoe, “Oh Israel maitaore, Enou neletao hi ngaoba mai tyahrü ali seive peilai, ae puletaoye panou reilo buyu Hamath ludu hinou poa khelo kouh Arabah reitou hi koute neletaoye souvea peilai.”