AMOS 5 - SHEEYU BAIBEL (BSI)

Ledalo tea Kuyu

¹ Oh Israel maitaore, Enou neletaoye donou kouli lia paoyu chipao hai keilou khaio:

² Kaodu tayu hinou lashupulai moyu Israel loumaina paire! Honapai ye sü maili noua polashu peiyu ha-a puhsü dei hinou kaotare.

³ Daiolouzü Mapao Ramai nou haibüa paoe: “Nuh ali hinou mai theli seitayu hi mai kraili khaive bailai, alia nuh kukhe ali hinou mai kraili tapayu hi mai kirou litou sholoua bailai.”

⁴ Mapao nou Israel mai hi paoe, “Eye phoulo alia hrilo.

⁵ Bethel ye phouwuso, alia Gilgal hi talouwuso, mokhaia Beersheba hi talou rathoso; daiolouzü veikhai mosoua Gilgal hai mainou nüpoa ta bailai, alia Bathel hai hamako buh ali souta-a bailai.”

⁶ Mapao ye phoulo alia hrilo, sütou molouzü Israel maiye sü mei nou taohayu büa touhawu bailai, alia Bethel sü deiwu bailai, panou mai linou-a mei sünasü souhei louhoa bailai.

⁷ Ayaho, kaozü nasü poreilai baiyu alia acheche nasü deiphi hi pokouh khai peiyu maitaore, neletao hai daizhou koute vealaisa.

⁸ Teivu sou-apeio Mapao, Khoki loumai (pleides) ae khouh seipao tyaomai (Orion) sou-apeio, teizhitei hinou shona teiva ae hea teiva hinou khei teizhi hi southou apeio Puhnou zai hi buyu dzütaoye kuloua panou deiphao hi rükou peiwe. Puh zhih hai Mapao tea kuwe.

⁹ Puhnou khouko buyu mai alia reih khoubu khesü souha peiwe.

¹⁰ Romü likinou cheche monaye paodou peiyu mai alia acheche chi paolai maitaoye sü neletao nou ngaorae.

¹¹ Neletao nou touha soha maiye taina-a puletao vei buyu teitei sü saoloure. Südonou neletao nou ki aveih soukhai touyuma sühi buloulai moe; alia neletao nou darkhabe alao shokhai toua buyuma, sünavei rashi dzü sü neletao nou kelou laimoe.

¹² Daiolouzü neletao nou kazhou koute soucholayu alia kazhou dua mah soukhai touyu nasü Enou süwe, neletao hai acheche maiye souveawe, seihla touwe, alia vealai maiye romü hinou vakou khaopa baiwe.

¹³ Südonou tsüveiyu mai hai haibüyu teile hisü paipawu moe, daiolouzü teile hai veimoe.

¹⁴ Ashi na moa nou aveih nasü phoulo, sükulouzü ne hriloulai; Khoukhoulai Ramai Mapao sü nenou khoyu büa neye kozho peilai.

¹⁵ Ashi nasü ngaoralo ae aveih nasü leshilo alia acheche nahai ne buh hinou soushulo; sükulouzü hrülai pei hi Mapao Ramai nou daoti shokhai toua buyu Israel maiye zhuvea peishulai.

¹⁶ Südonou hrülai pei hi Mapao Ramai nou haibüa paoe, “Kiphao buyu hrülai hinou puletao nou dopfüa kralai alia ludu liki hinou puletao nou paolai, ‘Iyaho! Aishoho!’ Puletao nou kouli liveih maiye sü panou dopfüa kouli lire donou kuvelai.

¹⁷ Darkha kipei teitei hinou dopfüa kralai, daisounou touyuo Enou neletaoye sü souvea talai,” tea Mapao nou paoe.

¹⁸ Mapao vei teithe jüpa-a khobuyu mai donou daizhou koute vealaisa! Neletao daisounou Mapao vei teithe jüpawe? Neletao ye donou haisü azhi baie, ava na moe.

¹⁹ Haizhou hai mai linou kipeikhaoduye ngaopia tuho vu ali daolouyu büa bailai, mokhaia kihikha tuve kivo hi bah süa shoa nou buyu phaki nghou nou daopeiyu bülai.

²⁰ Mapao vei teithe hai ava na moa nou azhi baimowu, alia vayu ha-a küzhiyu bai mowu?

²¹ Mapao nou paoe, “Neletao vei khonü ralya nasü Enou ngaorae, alia neletao nou ve meime soua buyu sü Enou jüpa moe.

²² Neletao nou Eye meidei loua thoyu alia thoudzü sheelayu nou posheelayuma, Enou süsü popei laimoe, alia neletao nou kikhaorü hrüvei nou posheelayu hai Enou zhua zhupei laimoe.

²³ Neletao vei lou khosü ahinou pota-o; neletao vei lana khovei nasü Enou keipei laimoe.

²⁴ Ana kaozü nasü panou reidzü büa külo, alia acheche nasü panou teisa nou küa buyu reitou büpeio.

²⁵ “Oh Israel maitaore, neletao nou po raidai hai hiphao nou ta-a buyu phaki Eye posheelayu hai pove peiwu?

²⁶ Ana chuo, neletao lah soukhai touyu bashara - veo Sakkuth alia neletao vei teivu Kaiwan ye thoyu vanou, neletaoye panou bashara sütao pfüa

²⁷ Enou neletaoye Damaskas jünou la-a panou nüpoa talai,” tea hrülai pei hi buyu Ramai Mapao nou paoe.