AMOS 1 - SHEEYU BAIBEL (BSI)

¹ Tekoa nuhdu hinou zhaotu khowo, Amos vei chipao sü haihaie. Nüsü mojü po ahaikou, Judah hi Uzziah nou veo soua buki alia Israel hi Jehoash nahpoutu Jeroboam nou veo soua buki Ramai nou Israel maiye donou Amos hi chipao haitao hai süngao peie.

² Amos nou paoe, “Zion hinou Mapao nou ra-e, alia Jerusalem hinou teisüpayu büa puhnou paiwe; Zhaotutao vei hiphao sü kitare, alia Karmel deichitao hinou buyu pouhou sü kitare.”

Israel Kinapatao ye Ramai nou Chikure Sairia

³ Mapao nou haibüa paoe, “Damaskas hi buyu mainou mah soukhaikhaiyu donou, puletao ye tukhare nahai Enou pokhaiwu laimoe; daiolouzü puletao nou Gilead maiye hunou dou dayu büa dapeire.

⁴ Südonou veo Hazeal kikhamai hisü Enou mei seive peilai, alia sünaye panou veo Benhaded vei reihbutao sü deihawulai.

⁵ Enou Damaskas vei rokhubomü khesü daophewulai, alia Aven deikho hinou hrüa buyu maitao ae Bethedea hi peikhoyu maitaoye sü polaiwulai; alia Sairia maiye sü panou Kir hi nüpoa ta-a bailai.”

Philistia

⁶ Mapao nou paoe, “Gaza mainou mah soukhai khaiyu donou, puletaoye Enou souveare nasü polaiwu laimoe; daiolouzü puletao nou Edom mai hi tyahrü teitei nou pa qila soure donou zhothou peiwure.

⁷ Südonou Gaza nuhdu vei bouvo hisü Enou mei seikou peilai, alia süvei reihkhaobu khesü deihawulai.

⁸ Ashdod alia Ashkelon hinou peikhoyu khemaiye sü Enou polaiwulai. Ekron nuhdu hisü abah thaithou talai, alia shokhaitoua buyu Philistia mai hai thaita bailai.”

Tair

⁹ Mapao nou paoe, “Tair mainou lü asü-dai soucholayu vanou puletaoye souvea laiyu nahai Enou pokhaiwu laimoe; daiolouzü puletao nou tyahrü teitei nou Edom mai bah hi zhothou peiwure, ae puletao nou tyaraitao hi vo soukhai touyu nasü lilou moe.

¹⁰ Südonou Enou Tair nuhdu navei bouvo hisü mei seikouh peilai alia mei sünaye panou reihbutao sü deihawulai.”

Edom

¹¹ Mapao nou paoe, “Edom mainou vu asü-dai soucho soulayu donou, puletaoye tudeere nasü pokhaiwu laimoe. Daiolouzü puletao thaihou-jürai soua buyu Israel maiye sü thaokhai toumoa teisa nou hubaie.

¹² Südonou Temon nuhdu hisü Enou mei seikouh peilai, alia Bozrah vei rokhubomü khesü deihawulai.”

Ammon

¹³ Mapao nou paoe, “Ammon mai nou lü asü-dai soucholayu vanou, puletaoye souveayu nahai Enou polaiwu laimoe; daiolouzü puletao teidei souka pupa loure donou puletao nou Gilead hi poupfüa buyu nahpfümai koute-a southare.

¹⁴ Südonou Rabbah nuhdu vei kivo hisü Enou mei seikouh thoulai, mei sünanou puletao vei rokhubomü khesü deihawulai, reih souyu teithe sü pai shurao soulai, alia teikhai teirüshi veyu büa reih soulai.

¹⁵ Süthaisü puletao veo alia peikhoyu maitaoye sü vakou nüpoa tabailai.”