2 VEMAITO 7 - SHEEYU BAIBEL (BSI)

¹ Elisha nou chila peie, “Mapao nou paoyu sü kei khaio! Dosho hai chu teile hi neletao nou Samaria nuhdu hisü southou veikayu sühcho asü moa süthou sühcho arou hai shahu ali nou ngaoloulai.”

² Veoye koa salaiyu mai ali nou Elisha hi haibüa nou paoe, “Mapao vuzünou thoudzü hai thasho-a nou seive peiyuma sübüyu sü soulou hoe.” “Nenou sübüyu sü ngaolai, ana nenou halia touloulai moe,” tea Elisha nou chila peie.

Sairia Maivei Reihmaitao nou Tutayu

³ Samaria vei rokhubomü vakou nou mai adai hai loukhaora soua nou bue, ae puletao mai alinou ali hi haibüa nou paoe, “Eletao thaimo koute hai hinou dai-e kho-a bukou laige?

⁴ Etao nou nuhdu lüvai sü louyu hai hamoko baie, daiolouzü Eletao hai khü-a nou thai-a bailai, ae Etao nou buh hai hinou buyuma süsüa Etao hai thai-a bailai. Südonou Sairia maivei fühao hisü holai khe; hakinou puletao nou Etaoye southa louzü daisou khai, ana puletao nou Etaoye southa paimoe.”

⁵ Südonou puletao nou teizhi rara louyu phaki, Sairia maivei fühao hisü tare, ana puletao nou sühi velouyu phaki, mailia buh sühisü hare.

⁶ Mapao nou Sairia maiye sü panou reihmai taoli hai rhei ae rheiluki khesü pfüa laiyu kho büa panou chouloure, ae Sairia maiye panou Israel mai nou Hit mai ae Ejipt maivei veo ae puletao vei reihmaitao hai ngaloua nou puletaoye reih soure donou laiyu phare tea tsücho loure.

⁷ Südonou süzhou khei nou Sairia mai hai buh sünasü puletao vei rhei ae rheisüh alia na veishi hai fühao hi thaokhaiwua tutare.

⁸ Mai adai taonou fühao hai hi takouloua sahpao hisü taloure ae puletao nou touso khesü touloure alia shahu, sana ae sabanü khesü poloua nou buh kukhe ali hi pove poku loure; süthaisü puletao nou dakhai ve sahpao kukhe lihi loue ae sübütoua puletao nou souloure.

⁹ Ana puletao mai ali nou ali hi haibüa paore, “Eletao haibüa buyu sü kaomore, ko aveih hai nasü lah Etao hi khaiyu kaomore. Etao nou ko hai nasü dosho shona nou taho paopei louzü, Etaoye tudee peia bailai. Südonou chu nou taho veo vei peikho maitao hi sü ko aveih hai nasü paopei laishe!”

¹⁰ Südonou puletao nou Sairia maivei fühao nasü thaokhaiwua Samaria hisü veloure ae reihkhao souyu maina hisü haibüa shapao peie, “Etao nou Sairia maivei fühao hisü loure ae sühisü mai lia hazei toure; puletao vei rheitao ae rheisüh khesü rai khimoa nou bubaie ae puletao vei sahpao hai puletao nou thaokhaiwua tayu zhai büa bubaie.”

¹¹ Reihkhaoyu nanou ko sünasü paosü papeie, ae ko süsü veo vei ki hia chouvere.

¹² Süsü khei toutsü hinou-e, ana veo nou kushuloua puhvei peikho maitao hi paoe, “Sairia mainou shodo souyu sü Enou neletao hi paongao peilai. Etao hai touso ha-a nou bue touyu sü puletao nou süwe, südonou puletao nou puletao vei fühao sü thaokhaiwua heihro hinou tutsüa nou bulai. Etao nou nuhdu hai hinou vakou tapa touso phouta louzü, puletao nou Etaoye hria nou nüloulai ae nuhdu hai nasü poloulai touyu donou shodo soua baie.”

¹³ Puhvei peikhomai ali nou haibüa paoe, “Nuhdu hai hinou buyu maitao hai hamako hinou bue baie, rai-a thaitayu mai ali bütoua nou bua baie. Südonou Etao nou kamai-a panou rhei anghou pfüloua nou kabüa busa touyu sü taho zhulai khe.”

¹⁴ Puletao nou kamai-a dopaloure, ae veo nou puletaoye sü panou rheiluki ahai pfüloua nou Sairia mainou kabüa fühao sü thaokhaiwua tare touyu phoupa loure donou seitare.

¹⁵ Mai sütao nou Jordan hi koute hai zhupoa nou ta-e, ae puletao nou ludu hisü puletao vei na khesü thaokhaiwua tutayu sü ngaoloure. Süthaisü puletao nou veo hi dakhai ve ko khesü paopeie.

¹⁶ Samaria hi buyu maitao nou tuvaho Sairia maivei fühao hinou buyu na khesü poloure. Mapao nou paopeiyu büa veikayu southou hai sühcho asü hinou ae süthou sühcho arou sü shahu ali nou zho peie.

¹⁷ Veo nou puhye koa salaiyu peikho mai naye panou nuhdu vei rokhubomü nasü zhuloure donou vahbu thoupeie. Peikhowo nanou veoye koa veyu phaki, Elisha nou rai-a paoyu bütoua maikhe mainou puhye sü phi nou deithawure.

¹⁸ Elisha nou veo hi paoe, süolouzü thainesho hai Samaria hi veikayu southou sühcho asü ae süthou sühcho arou hai shahu ali hinou zholai tea paoyu phaki,

¹⁹ Peikho nanou haibüa chila peie, “Mapao puh vuzünou thoudzü hai thasho-a nou seive peiyuma, sübülou hoe!” Ae Elisha nou haibüa chila peie, “Nenou sükhesü ngaolai, ana nenou sütao hai toulou laimoe.”

²⁰ Elisha nou paoyu bütoua vepare, ana puhye sü maikhe mainou nuhdu vei rokhubomü hinou phi nou taithawure.