2 VEMAITO 25 - SHEEYU BAIBEL (BSI)

Jerusalem Kaodutayu

¹ Zedekiah nou Babilon hi veo Nebukhadnezzar pei hi khaitya pare, südonou puhnou puhvei reihmai hrülaiye saloua Zedekiah nou veo soulouyu po akü navei khouh kirou kousü Jerusalem hi reih huloure. Puletao nou nuhdu vei kivo vakou hinou fühao soua buloure,

² ae nuhdu nasü Zedekiah nou veo souyu po kiali koute hai sühaopoa nou buloure.

³ Po süna vei khouh adai nava khoukha akü zhou hai nuhdu hinou hrüyu maitao hai halie toure hazei toure, daiolouzü buh sühisü tokaa shisho loure,

⁴ südonou puletao nou nuhdu kivo sü dakhowure. Babilon mai nou nuhdu sü sühao buyuma, reihmai hrülai hai khei nou vakou tupakhai touloure. Puletao nou veo vei kipei hinou ludu buyu, kivo ahai kohinou rokhubomü soukhai touyu na hinou Jordan vei deikho hilova tupoa nou tare.

⁵ Ana Babilon mai vei reihmaitao nou veo Zedekiah ye sü thaihukou Jeriko deikho nghiyu hinou nüloure ae puhvei reihmai hrülai nou puhye sü thaowua tutare.

⁶ Zedekiah ye veo Nebukhadnezzar hi nüpoa nou ve-e, ae süphaki puh hai Riblah nuhdu hinou bue, ae Nebukhadnezzar nou puhye southawo tea chi lüthou peiwure.

⁷ Zedekiah vei nghoujü hinou puh nahpoutu maitaoye sü southawure, süthaisü Nebukhadnezzar nou Zedekiah ngheithou hai reila paloua puhye hurai nou phuloua Babilon hi nüpoa tare.

Jerusalem hi Rathoki Soushiyu

⁸ Nebukhadnezzar nou Babilon hi veo soulouyu po kiakü, khouh adai navei khoukha anai zhou, veo vei paodou-apeio ae reihmaitao peikhowo Nebuzaradan nou Jerusalem hisü veloure.

⁹ Puhnou Rathoki, veo vei ki ae Jerusalem hinou matsüyu maitao vei ki veishi hai meidei laiwure,

¹⁰ ae puhvei reihmaitao nou nuhdu vei kivo sü dakhowure.

¹¹ Süthaisü Nebukhadnezzar nou nuhdu hi shokhai toua buyu maitao, vah soulou süyu maitao ae Babilon veo nou thaokhaiwua tayu maitao hai hukhamai soua Babilon hi nüpoa tare.

¹² Ana puhnou Judah hi touhakayu maitao, lahvei touyu ki-lu ae kipei ali-a hayu maitao hai shokhai peie ae puletaoye panou dou hi ae kipei hinou pa vah soue.

¹³ Babilon maitao nou Rathoki hinou buyu baosahu vei dekatao ae rheiluki khesü dakhosasare alia baosahu nou soukhai touyu dzükhao na-a dakhowure ae puletao nou baosahu teitei hai Babilon hi poa tare.

¹⁴ Posheelabu poa sousheeyu phou ae vounai vethouyu bvütao, meivabvütao, posheelayu phaki zhe thouyu khaoshao, poukai nüvei thouyu bvütao, ae rathoki hi poa vah soure donou baosahu nou soukhai touyu na veishi hai puletao nou poa tare.

¹⁵ Sana ae shahu nou soukhai touyu khaoshao ae poa meithou biyu natao-a poloua takhai toure.

¹⁶ Veo Solomon nou rathoki donou baosahu nou soukhai touyu deka ahai, rheilukitao ae dzükhao sü sühleyu donou sühdou hi pothou doumore.

¹⁷ Deka ahai sü raibütoua soukhai toue. Deka alili nou mitar acha ku-e ae süpei hinou baosahu nou zhainga southou khai touyu nasü mitar 1.3 kue. Dekapei hi zhainga hai baosahu nou vajüshithou zhai rai-a southou peikhai toue.

Judah hi Maitaoye Babilon hi Nüpoa Tayu

¹⁸ Süpei hinou reihmai peikhowo Nebuzaradan nou Napao Peicha Seraiah, puh khenou buyu napao Zepheniah, ae rathoki hi peikhomai asü hai nüpoa tare.

¹⁹ Puhnou nuhdu hinou reihmai peikhowo, veo vei paodou-apei mai angou, reihmaitao peikho-e soukha-apeio ae reihmaitao vei larü rü-apeio hi peikhowo alia nuhdu hinou matsüyu mai rairou hai nüpoa tare.

²⁰ Nebuzaradan nou puletaoye Babilon vei veo hi nüpoa nou ve-e, ae süteile hi veo hai Riblah nuhdu,

²¹ Hamath maivei teidei hinou bue. Sühinou veo nou puletaoye da-dapeia southawure. Südonou Judah maitaoye puletao vei teidei hinou hukhamai soua vakou nüpoa takhai toure.

Judah hi Teidei Khowo Gedaliah

²² Babilon hi veo Nebukhadnezzar nou Gedaliah ye panou Judah teidei khowo sü soure donou vahbu thoupeie, ae Babilon hi nüpoa tamoyu maitaoye panou zhure donou lüthou peie.

²³ Nüloumoa buyu Judah hi reihmai peikhoyu maitao ae reihmaitao nou Babilon hi veo nou Gedaliah ye panou teidei khowo sü soupeire touyu ko hai choulou khaie, puletao nou puhye Mizpah hinou tave daoe. Puletao hai thaothao mai-e toulouzü: Nethaniah nahpoutu Ishmael, Kareah nahpoutu Johanan, Netophath puona Tanhumeth nahpoutu Seraih, ae Maakah hinou Jezaniah hai maitaoe.

²⁴ Gedaliah nou puletao hi paoe, “Enou neletao hi chaachou soua paowe, süolouzü Babilon vei peikho maitaoye ngaopiso, neletao nou teidei hai hi hrüloua Babilon veo vei khakhe hinou puhvei kuvah soua bulouzü, neletaoye donou kaozhou shiyu ali-a vedao laimoe.”

²⁵ Ana po sünavei khouh anai hinou Elishama vei tyao, Nethaniah nahpoutu Ishmael nou mai kirou hai saloua Mizpah hi tave Gedaliah sü southawure. Puh hai veo vei kihikhamai alie. Puhnou Gedaliah ye koa buyu Israel maitao ae Babilon maitao-a koa nou southawure.

²⁶ Süthaisü Israel mai hrülai, tai-du soumoa reihmai peikho maitaoye koa nou Ejipt hi tutare, daiolouzü puletao nou Babilon maiye sü ngaopi loure.

Jehoiakin ye Hukhaki hinou Popa Peiyu

²⁷ Judah hi veo Johoiachin ye hukhamai soua nüpoa tayu po shianai, khouh kiahai vei khoukha kainai zhou hai Babilon hi Evilmerodakh nou pa vekou loue. Puhnou Judah hi veo Jehoiakin ye zhuvea peia nou hukhaki hinou popa peiwure.

²⁸ Evilmerodakh nou puhye leshi shopeie, ae hukhamai soua nüpoa Babilon hi veyu vemaitao jünou puhye tsükhoupu peie.

²⁹ Südonou Jehoiakin ye hukhaki hinou popa peiwua puh thaimo koute hai veo vei taibel hinou veoye koa vaizho-e.

³⁰ Puhnou hria bukisasü veo nou puhye molouzü shiyu teitei hai zhupeia nou puhye teithe teithe vei khorcha hai peie.