2 VEMAITO 23 - SHEEYU BAIBEL (BSI)

Josiah nou Chechemoyu Rathobutao Souha Peiyu

¹ Veo Josiah nou Judah hi ae Jerusalem hi süthai-apei mai hrülai hai kuve jüloure,

² ae puletao nou koa napao maitao, rachipaola peiyu maitao ae mai hrülaiye saloua nou rathoki hisü vere. Puletao mai hrülai nghoujü hinou rathoki hinou ngaolouyu larübvü nasü teitei nou pai chisho-a veo nou pa phoungao peie.

³ Puhnou rathoki hi veo maiye panou bure donou soupeikhai touyu dekaphi hinou buloua larübvü hinou rükhai touyu kharochi ae chikhatao hai puhvei tsüle ae khouko veishi nou peia zülai tea Mapao ye koa nou vo souloure. Alia mai hrülai-a vo soukhai touyu nasü soupfülai tea chaachou souloue.

⁴ Süthaisü Josiah nou Napao Peicha Hilkiah, puhye koa napao souyu maitao, ae rathoki kho-a buyu maitao hisü rathoki hinou buyu Baal rahye thoyu natao, Asherah rapfüpaiye thoyu natao, ae teivutao thoyu na veishi hai vakou popa laiwo tea kharochi peie. Veo nou na sütao teitei nou nuhdu vei vakou popa loua Kidron Deikho hinou meidei laiwure, ae vounai khesü panou Bethel hi poho laiwure.

⁵ Cheche moyu rahtao hi panou naanou soua posheela peire donou sousheeloua Judah hi vemaitao nou vahbu thoupei khaitouyu napao maitao, puletaoye panou Judah teidei hinou buyu ae Jerusalem pehao hinou buyu posheelabu hinou Baal, teinghei, khouh ae teivuh tao hi posheela peiyu napao maitao hai napao maivei vahbuh hinou veo nou popawure.

⁶ Rathoki hi khaitouyu Asherah rapfüpai vei zhurai hai puhnou nuhdu vei vakou popaloua Kidron Deikho hinou meideiwure, ae vounai sü taisasa loua maisou vei khüh pei hi pove raokhai peie.

⁷ Rathoki pehao hinou khakhapfü maitaoye panou bure donou soukhai touyu ki khesü puhnou hralaire. (Naotumai sütao nou Asherah thore vei naazao khesü soupeiwe.)

⁸ Judah vei nuhdutao hinou buyu napao mai hrülai hai puhnou Jerusalem hi save thoupeie, ae puletao vei teidei hinou buyu posheelabu veishi hai puhnou soushilai khaiwure. Nuhdu hi peikhowo Joshua nou nghiturah hi posheela peire donou soukhai touyu posheelabu na-a puhnou soulaiwure, sünasü nuhdu hi taloure rokhubomü nalova nou soukhai peikhai toue.

⁹ Sütao hinou napao souyu maitao hai panou rathoki hisü panou kuvah hai soupu more, ana napao maitao hi posheela peikhai touyu kheih thoumoa soukhai touyu raokhao khesü toua bailai tea paopeie.

¹⁰ Veo Josiah nou Hinnom Deikho hinou buyu Tophath rathobu nasü soushi peiwure, sübüa maikhe maiye panou puletao vei nahmai hai southaloua Molek rah hi meidei-a posheela peiyu sü panou soupu more.

¹¹ Judah hi vemaitao nou teingheiye thore donou soushee khaitouyu rheitao sü polaiwure, ae poa rathoyu hi vah souyu khesü meideiwure. (Haitao hai rathoki pehao hinou peichawo Nathan Meleck vei ki hi taloure robomü nghia nou khaikhai toue.)

¹² Judah hi vemaitao nou veo Ahaz vei ki pei hinou posheelabu soukhai touyu nasü pokouloure, ae veo Manasseh nou rathoki hi maisou nou vejüa buyu hinou posheelabu ahai soukhai touyu nahai koa nou daphesasa khaiwure, ae daphasasa khaitouyu pe sütao hai poloua Kidron Deikho hi shilai khaiwure.

¹³ Veo Solomon nou Jerusalem teinghei palova ae Oliv Deichi khelova nou soukhai touyu posheelabu— Sidon maivei rahpfüpai Astarte, ae Moab maivei rah Molek vei bashratao hai Josiah nou soushi laiwure.

¹⁴ Veo Josiah nou chuh shukhai touyu dekatao, ae Asherah rapfüpai vei zhuraitao hai deiphi soukhokou loua maivei sourao nou poa hopao peiwure.

¹⁵ Bethel hinou rathoyu buh, Nebat nahpoutu veo Jeroboam nou souloua Israel maiye mah hi süthaithou peiyu buh nasü Josiah nou dakholai peiwure. Josiah nou posheelabu sü soukhao kouloua chuh khesü dakhosasawure, ae puhnou Asherah vei zhurai khesü meidei peie.

¹⁶ Süthaisü Josiah nou zhu haoveyu phaki, puhnou deichi vanou maivei khüh hai bua nou zhingao loure; puhnou sühinou mairao hai popaloua nou posheelabu hinou mei deipeie. Khonüh nüyu teile hi veo Jeroboam nou posheelabu nghoujü nou la-a buyu phaki, rachipaolayu mai ali nou paodai peiyu bütoua posheelabu sü soushi peie. Veo Josiah nou zhuyu phaki haibüa nou vepalai tea paopeiyu rachipaola-apei navei khüh-a puhnou ngaoloue.

¹⁷ “Khüh hona hai thao khüh-e?” tea puhnou noue. Bethel hi maitao nou “Khüh süna hai Judah hinou zhou posheelabu hi soupeiyu vah haso khesü haithai vepalai tea paopeiyu navei khüh-e,” tea chila peie.

¹⁸ Josiah nou “Puhvei khüh sü panou sübüa nou bu-o, puhvei rao sü polai laimoe,” tea kharochi peie. Südonou puhvei rao sü polai more, ae Samaria hinou veyu rachipaola peiyu maitao vei rao-a polai more.

¹⁹ Veo Josiah nou Israel maivei teidei hinou buyu rathoyu buhtao, Israel maivei vemaitao nou souloua Mapao vei lekha rarou soupayu rathobu teitei hai soushilai khaiwure. Puhnou Bethel hi soupeiyu bütoua posheelabu teitei hi-a soupei.

²⁰ Puhnou cheche moyu napao mai hrülai hai puletao nou naanou soua posheelayu posheelabu hinou southakhai toupeie, ae maivei rao khesü posheelabu hinou meidei peie. Süthaisü puhnou Jerusalem hi dakhai tare.

Josiah nou Tachopa Nüh Nüyu

²¹ Veo Josiah nou Vo soukhai touyu vei larübvü hinou rükhai touyu thaifüa puletao vei Ramai Mapao ye tsükhouyu hinou mai hrülaiye panou Tachopa Nüh hai nülai tea kharochi peie.

²² Tachopa Nüh nüyu hai haizhai büa Israel maiye chiku-apei maitao nou khasa-a hrüyu teile hia moyuma Israel maivei vemaitao vei teile hia haibüa nükhai toumo hie.

²³ Ana Josiah nou veo soulouyu po kiacha kounou Tachopa Nüh hai haibüa veishoa nou Jerusalem hinou nüloue.

Josiah nou Vah Kukhe Soulouyutao

²⁴ Napao peichana Hilkiah nou rathoki hinou ngaolouyu larübvü hi rüthou peikhai touyu thaifüa chikhatao hai taloure donou, veo Josiah nou Jerusalem ae Judah teidei hinou buyu teingumai ae vepare paoyu mai hrülai hai hulaiwure, ae ki hi buyu rahtao, basharatao, alia rah kukheye thoyu na veishi hai polai khaiwure.

²⁵ Moses vei chikha züa Mapao vei kuvah hai tsüle ae pfüchi teitei nou peia souyu veo mai lia puh büyu hai hahie.

²⁶ Ana veo Manasseh nou Mapao vei lekha rarou hai soupa peia Mapao nou Judah teidei hi rarouyu hai chua hazei toumo hie.

²⁷ Mapao nou haibüa paoe, “Enou Israel mai hi soupeiyu bütoua Judah hia soupeilai: Enou Judah hi maitao hai avei nghingao hinou souhalai, ae Eye panou thore donou Rathoki soukhai touyu Jerusalem nuhdu nasü Enou malaiwulai.”

Josiah vei Hrüh Akhai

²⁸ Veo Josiah nou soupfüyu vah teitei hai Judah hi Vemaitao vei Hrüko Larübvü hi rüthou peikhai toue.

²⁹ Josiah nou veo soua buyu phaki, Ejipt hi veo Neko nou puhvei reihmai saloua Assaria maivei veoye soukha peire donou Euphratis rei hisü veloure. Veo Josiah nou Ejipt maiye nuloure donou Megiddo hinou reih soue, ae puhye sü reihbu hinou southawure.

³⁰ Puhvei peikho maitao nou puhvei thaiphao hai rheiluki hi thouloua Jerusalem hi pfüa dakhaive peie ae puhye sü vemaitao vei khüh hinou poa daovu peie. Maikhe mainou puh nahpoutu Joahaz ye panou veo soure donou doloua theadzü napeiwure.

Judah hi Veo Joahaz

³¹ Joahaz nou Judah hi vekou louyu phaki, puh hai po kaisü pare ae puhnou Jerusalem hinou khouh asü hai veo soue. Puh pfü hai Libnah nuhdu hinou hrüyu Jeremiah nah naotupai Hamatal toue.

³² Puhvei puopaoh maitao büa puhnou Mapao vei nghingao hinou mahmo khesü soure.

³³ Ejipt hi veo Neko nou puhye sü Hamath maivei teidei Riblah hinou hukhamai soua nüloure, ae Judah maiye panou shahu sühcho 3,400 ae sana sühcho shiadai hai panou kikha soua nou peie. Sübüa Joahaz nou veo souyu sü akhai soure.

³⁴ Veo Neko nou Josiah nahpoutu Eliakim panou Judah hi veo souloure, ae puh zhih hai Jehoiakim tea sadapeie. Joahaz ye sü veo Neko nou Ejipt hi nüpoa tare ae sühinou puh sü thaire.

Judah hi Veo Jehoiakim

³⁵ Ejipt maivei veo hi kikha hai peire donou Jehoiakim nou maikhe mai hinou thoudzü hai puletao nou ngaolouyu thaifüa kikha hai polouwe.

³⁶ Jehoiakim nou Judah teidei hi pa vekou louyu phaki, puh hai po kaingou pare ae puhnou Jerusalem hinou po kiali hai veo soue. Puh pfü hai Rumah nuhdu hinou hrüyu Pedaiah nahnaotu Zebidah toue.

³⁷ Puhvei poupaoh maitao nou tayu zhai büa Jehoiakim nou Mapao vei nghingao hinou mahmo khesü soua baie.