2 VEMAITO 21 - SHEEYU BAIBEL (BSI)

Judah hi Veo Manasseh

¹ Manasseh nou Judah hi vekou louyu phaki, puh hai po kiahai baihie, ae puhnou Jerusalem hinou po 55 hai veo soue. Puh pfü zhih nou Hephzibah toue.

² Mapao vei maitao takouyu phaki, puhnou hulai peiyu tyahrütao nou ngaorayu vah ashi souyu zhaibüa Manasseh nou Mapao vei nghingao hinou mahmo khesü soure.

³ Puh puo Hezekiah nou cheche moyu rahtaoye thoyu buh soushi peikhai touyu khesü puhnou soushupu loure, puhnou Baal rahye thore donou posheelabu khesü soupeie ae Asherah rahpfüpai zhurai hai Israel hi veo Ahab büa soupeie. Manasseh hai tei hi vutao-a thore.

⁴ Puhnou Mapao ye likhei tho-a bailaiyu Rathoki hinou cheche moyu rahye posheelare buh khesü soupeie.

⁵ Puhnou Rathoki hi maisou nou vejüa buyu buh ahai hisü teivutaoye thore vei posheelabu soupeie.

⁶ Puhnou puh nahpoutu koute-a dathaloua meidei-a posheela peie. Puhnou kabülaisa tea prou zhutare ae keingumai alia thaimai rako hinou phaku tare. Puhnou shishoyu mah khesü soupeia Mapao vei lekha rarou hai soupa peie.

⁷ Puhnou Asherah rahpfüpai vei zhurai hai Rathoki hi polou khaipeie. Rathoki sühisü Mapao nou David ae puh nahpoutu Solomon hi haibüa paopei khaitoue: “Israel maivei khü kiahai taovei teidei teitei donou Eye tave panou thore donou Jerusalem hai hinou buyu Rathoki haina hai Enou dopa khaitoue.

⁸ Ae Israel mainou avei kharochi ae Chikha, Enou avei kilai Moses hi peikhai touyu khesü zü louzü, Enou puletaoye puletao vei puopaoh maitao hi peikhai touyu teidei hinou hulai laimoe.”

⁹ Ana Judah hi maitao nou Mapao vei chi sü zübare ae Mapao nou hulai peiyu tyahrütao jünou shipuyu mahmo khesü Israel maiye saloua soutare.

¹⁰ Mapao vei kilai rachipaolayu maitao hinou puhnou haibüa paoe,

¹¹ “Veo Manasseh nou Kanaan mai jünou shipua ngaorayu vah haso khesü soutare; ae puhvei basharatao koa nou puhnou Israel maiye süthaisa-a mah sü soutare.

¹² Südonou Israel maivei Ramai Mapao Enou Jerusalem hi ae Judah hisü mainou süloua maikare vei veahoyu sü pove peilai.

¹³ Enou Jerusalem sü Samaria büa tudee peilai ae Enou Israel maivei Veo Ahab ae puhvei tyaosholea hi soupeiyu büa soupeilai. Enou Jerusalem hi hrüa buyu maitaoye sü paikhao dzükhü sheesha khaitouyu büa sousheesha teanou khaipeilai.

¹⁴ Shokhai toua buyu maitaoye sü Enou ngaobayu maitao bah hi thoupeiwulai ae puletao nou puletao jünou veiloulai ae puletao vei teidei sü panou poloulai.

¹⁵ Enou haibüa avei maitao hisü soupeilai, daiolouzü puletao nou mahmo khesü soure, ae Enou puletao vei puopaoh maitaoye Ejipt hinou sapa peiyu nou poa zhou koute hai Eye khaityare.”

¹⁶ Manasseh nou mah lia hayu mai taoli hai southa peie, sübüa Jerusalem vei duvatao hisü zhe nou küre; puhnou Judah maiye mah hi süthaithou panou basharataoye thota-a Mapao hinou mah souyu pei hinou puhnou haibüa soupeie.

¹⁷ Manasseh nou vah soupfüyu teitei ae puhnou mah souyu khesü Judah maivei Vemaitao Hrüko Larübvü hi rüthou peikhai toue.

¹⁸ Manasseh hai thaire ae puhye veo vei kipei, Uzza vei kipei hinou poa daovu peie ae puh nahpoutu Amon nou puh thaosou vekou loue.

Judah hi Veo Amon

¹⁹ Amon nou Judah hi pa veo soulouyu phaki, puh hai po kaihai pare ae puhnou Jerusalem hinou po ahai veo soue. Puh pfü hai Haruz nah naotupai Meshullemeth toue, ae puh sü Jotbah nuhdu hi maipfüe.

²⁰ Puh puo Manasseh bütoua puh-a Mapao vei nghingao hinou mah sü soure.

²¹ Puh puo nou souyu zhaidou hai puhnou douloua puh puo vei bashara khesü puhnou thotare.

²² Puhvei puopaoh maitao vei Ramai Mapao hai puhnou malaiwure ae Mapao vei chikha khesü puhnou zübare.

²³ Amon vei peikho maitao nou shodo ashi souloua puhye sü veo vei ki hinou southawure.

²⁴ Judah hi maitao nou Amon ye southayu maitaoye sü southawure, ae puh nahpoutu Josiah panou veo souloure.

²⁵ Amon nou soupfüyu vah teitei hai Judah hi Vemaitao vei Hrüko Larübvü hi rüthou peikhai toue.

²⁶ Amonye sü Uzza vei kipei hinou daovu peie ae puh nahpoutu Josiah nou puh thaosou vekou loue.