2 VEMAITO 2 - SHEEYU BAIBEL (BSI)

Elijahye Raki hi Sakhe Tayu

¹ Mapao nou Elijahye rakiva rüraipao hinou sapoa khere teile sü vere. Südonou Elijah ae Elisha nou Gilgal hinou tapare,

² ae puhai nou ludu hi ta-a buyu phaki, Elijah nou Elisha hi paoe, “Chuo ne buh hai hinou chao-a baio, Mapao nou Eye Bethel hi ta-o tea kharochi peiwe.” Ana Elisha nou chila peie, “Mapao sü hriyu thaifüa ae ne-a hriyu thaifüa Enou neye thaowua takhai toulai moe touyu chaachou hai souwe.” Südonou puhai nou Bethel hi koa nou tare.

³ Sühinou buyu rachipaolayu maime ali nou Elisha hi haibüa nou noue, “Zhou teithe Mapao nou nevei paopuye rakiva sa-a khetalai touyu ne süho moe?” Elisha nou chila peie, “Ouvai, E-a süwe, ana süna vanou chi phalai moshe.”

⁴ Süthaisü Elijah nou Elisha hi paoe, “Chuo ne hai hinou bua baio; Mapao nou Eye Jeriko hi tawo tea kharochi peire.” Ana Elisha nou haibüa chila peie, “Hriyu Mapao vei zhih hinou ae neye donou Enou neye thaowua talai moe.” Südonou puhai nou Jeriko hi koa tare.

⁵ Sühinou buyu rachipaola peiyu maime ali nou Elisha hi veloua nou paoe, “Zhou teithe Mapao nou nevei paopu hai ne hinou sa-a talai touyu sü ne sühomoe?” Elisha nou chila peie, “Oungai, Enou süwe, ana süna vanou Etao hai chi phalai mokhe.”

⁶ Süthaisü Elijah nou Elisha hi paoe, “Chuo buh hai hinou chao-a baio, Mapao nou Eye Jordon rei hi tawo tea kharochi peire.” Ana Elisha nou chila peie, “Hria buyu Mapao ae neye donou E neye thaokhaiwua talai moe touyu hai chaachou soua paowe.” Südonou puhai sü koa nou tare,

⁷ ae rachipaolayu mai raingou nou puhaiye koa Jordan rei hisü tare. Elijah ae Elisha nou reipe hi kou chaore, ae rachipaolayu mai raingou taonou puhai hinou ka douphou-a nou bue.

⁸ Süthaisü Elijah nou puhvei sah hai phaloua nou kheiloure ae sünanou poa puhnou reidzü sü dapeie; ae reidzü sü ahai soua petare, sübüa Elisha puhai nou rei sü the-a nou kacho paloue.

⁹ Buh sühinou Elijah nou Elisha hi paoe, “Eye sa-a tamo jünou, Eye panou ne hi dai soupeiyu sü jüpawe touyu hai paokhaio.” Elisha nou chila peie, “Nevei khouko nasü Eye panou ne thao thaoyu soua ngaolo.”

¹⁰ Elijah nou chila peie, “Nenou khoyu nasü peiloure hai tatei shore, ana nenou Eye sapoa tayu hai zhingao louzü, khouko sünasü nenou ngaoloulai; hakinou nenou Eye satayu hai ngaomore toulouzü, nenou khoyu nasü ngaoloulai moe.”

¹¹ Puhai nou ta-a bulikhu chipha poa nou ta-e, süteile bü hinou mei vei rheiluki ali hai mei vei rhei khenou pfüa puhai ko hisü koure ae Elijahye sü rürai nou pfüa rakiva sapoa khetare.

¹² Elisha nou süsü ngaolou khaie, puhnou kra-a Elijah hi paoe, “Apou, Oh apuowo! Israel maiye dushoa nou vupa-apeio, ne sü tare!” Puhnou Elijah sü ngaopu more. Elisha nou levea puhvei sah sü ahai soua paiphawure.

¹³ Süthaisü Elijah vei sah dekouyu nasü puhnou poloure ae Jordan reipe hisü dakhaikou la-a nou bue.

¹⁴ Puhnou Elijah vei sah sü poloua reidzü sü dapeie ae haibüa paoe, “Elijah vei Ramai Mapao sü daikinou bue?” Süthaisü puhnou dzü hai sah nou poa dapupeie ae dzü sü ahai soua kotare, alia puhnou alilo vatha hai tacho paloue.

¹⁵ Jeriko hinou buyu rachipaola peiyu mai raingou taonou puhye ngaoloua nou paoe, “Chuo Elijah vei khouko hai Elisha hi bure!” Puletao nou puh hi takouloua puhye nakou khurüe,

¹⁶ ae puh hi paoe, “Pfüphao veishoyu Etao mai raingou sü hai hi bue, Etao nou nevei paopuye sü taho phouta laiho. Mapao vei rako nou puhye saho deichi ali hi moa deikho ali hi saho khaitoua buyuma sülou hoe.” Elisha nou chila peie, “Moe, neletao puhye phoutaso.”

¹⁷ Puletao nou Elijahye sü phouta vuzülai tea paoloure, südonou Elisha nou phouta-o tea lüthou peiwure. Mai raingou taonou Elijahye sü teithe asü koute hai deichi deikho veishi hisü phouta-e, ana puhye phouhare.

¹⁸ Süthaisü puletao nou Elisha hisü dakhai vere, süphaki puh hai Jeriko hinou kho-a nou bue, ae puhnou puletao hi paoe, “Enou neletaoye phoutaso tea paomovu?”

Elisha nou Khupayu Vah Souyu

¹⁹ Jeriko hinou buyu kamai-a nou Elisha hisü tave haibüa nou paoe, “Apaopuwo nenou süwe, süolouzü nuhdu haina hai veishoyu nuhdu ali-e, ana hai hi dzü hai veimoe, südonou hai hi nahpfümai hai nah koua baiwe.”

²⁰ Elisha nou haibüa kharochi peie, “Sheetou touyu khaosao ali hinou tai daotu thouloua ahi pove peio.” Puletao nou sünasü puh hi pove peie,

²¹ ae puhnou süsü poloua nou poho dzünghou payu hisü tai thoupeie, ae haibüa paoe, “Mapao nou haibüa nou paoe, ‘Enou dzü sü soushee peiwure, südonou chuo maikhe mai hai thaipu khailai more ae nahmai-a koukhailai more.’ ”

²² Süthaisü dzü sünasü Elisha nou paoyu thaifüa sheekoute-a bubaire.

²³ Elisha nou Jeriko thaowua Bethel hisü tare, ae puhnou ludu hi ta-a buyu teile hinou nuhdu hinou nahmaitou taoli nou tapaloua puhye sü konü peia nou haibüa sha paore, “Peikiyu mainare, hai hinou talo.”

²⁴ Elisha nou puletaoye sü zhutei touloua Mapao vei zhih hinou chaa peiwure. Süthaisü vukü ahai nou vaohro hinou tapaloua nahmaitou raidaihai sü tusasa khaiwure.

²⁵ Süthaisü Elisha nou Karmel Deichi hisü tare, ae süthai hai Samaria hi dakhai tare.