2 VEMAITO 16 - SHEEYU BAIBEL (BSI)

Judah hi Veo Ahaz

¹ Isreal mai hi Remaliah nahpoutu Pekah nou veo souyu po kianai nava sü Judah hi hai Jotham nahpoutu Ahaz nou vekouloue.

² Puhnou vekou louyu phaki puh hai po kai pare, ae puhnou Jerusalem hinou po kiarou hai veo soue. Puhnou puh puopaoh David veo büa vah aveih sü soumore, ana puhvei Ramai Mapao nou jüpa moyu vah khesü soua baire,

³ ae Israel mai hi veo maitao nou tayu zhai büa puh hai ta-a baie. Puh hai Israel mainou talouyu phaki, Mapao nou teidei hai hinou hulaiyu maitao nou ngaorayu hrü hrüyu zhaibüa puh nahpoutu koute-a southaloua bashara hi meidei-a posheela peie.

⁴ Cheche moyu rahtaoye thoyu buh hinou, deichi hinou, ae süübephi hinou Ahaz hai posheela peie ae poukai nüvei khesü meidei-a posheela peie.

⁵ Sairia hi veo Rezin ae Israel mai hi veo Pekah nou Jerusalem hi reih hulou poloure, ana veo Ahaz ye sü nülou more.

⁶ (Teile süphaki, Edom maivei veo nou Elath teidei hai podakhai loure ae sühinou hrüyu Judah maiye sü hulaiwure. Edom mainou Elath hisü ve hrüloure ae zhaodo koute-a sühinou hrüa nou bue.)

⁷ Ahaz nou Assaria hi veo Tiglath Pileser hi haibüa kopomaiye seiho paoe, “E hai nevei kilai mai ali baie. Südonou tave Eye Sairia ae Israel maivei veo hinou vupa peio, puletao nou Eye dulai tea bure.”

⁸ Ahaz nou Rathoki hinou buyu ae veo vei kini pojükhai touyu hinou buyu shahu ae sana khesü poloua veo hisü sapeina soua nou peie.

⁹ Veo Tiglath Pileser nou Ahaz nou soukha peio tea khoyu sü aetou peia nou puhvei reihmaitao sü saloua Damakas hisü veloure, ae puhnou nuhdu sünasü poloure, alia veo Rezin sü southawua hukhamai taoli nüloua Kir hisü sapoa nou tare.

¹⁰ Veo Ahaz nou Damaskas hi taho veo Tiglath Pileser ye daolai tea tayu phaki, puhnou posheelabu ali hai ngaoloure, ae puhnou napao Uriahye sü posheelabu süna raitoua nou soulo tea seidakhai tawure.

¹¹ Südonou Uriah nou Ahaz dakhai vemo jünou posheelabu nasü raibütoua nou souche loure.

¹² Ahaz nou Damaskas hinou dakhai veyu phaki, posheelabu nasü souchewua puhnou ngaoloure.

¹³ Südonou puhnou posheelabu süna hinou hrikhaona ae thoudzü vei posheela sü meidei-a nou posheela peie ae darkhazhaoh alia chavei lathou-a buloure vei souzhe hai lazü peie.

¹⁴ Mapao hi sousheeloua nou peithoukhai touyu baosahu vei posheelabu nahai Rathoki ae posheelabu ashu soukhai touyu kohinou bue, südonou Ahaz nou posheelabu süna sü reilova pokhe posheelabu ashu naye da-a nou khaiwure.

¹⁵ Süthaisü puhnou Uriah hi haibüa nou kharochi peie, “Enou dushoa soukhai touyu posheelabu ashu haina hinou shona vei meidei-a posheela peiyu ae koukhe vei thoudzü posheela peiyu sü posheela peilai, alia veo nou ae maikhe mainou meidei-a posheela peiyu ae thoudzü vei posheela, ae maikhe mainou darkhazhaoh posheela peiyu khesü hai hinou posheela peilai. Haina hi maikhe mainou hrikhaona pove sheela peiyu souzhe sü lazü peio. Ana baosahu nou soukhai touyu posheelabu nasü rako zhure donou Eye donou khaipeio.”

¹⁶ Veo nou kharochi peiyu thaifüa Uriah nou soupeie.

¹⁷ Veo Ahaz nou rathoki hinou buyu rheiluki khesü pokupa khaiwure ae poa nou vah souyu raikhao khesü polaiwure; puhnou baosahu nou soukhai touyu chode kiahai tao phao vanou baosahu soukhai touyu dzükhao nasü popawua buh sühinou chuh kho soua khokhai loure.

¹⁸ Assaria hi veo vei jüpa souloure donou Ahaz nou Rathoki hinou buh kua soukhai toua buyu veo vei vebuh ae veo nou Rathoki hi taloure vei kikhubomü nasü soulaiwure.

¹⁹ Veo Ahaz nou soupfüyu vah veishi sü Judah hi Vemaitao vei Hrüko Larübvü hi rüthou peikhai toue.

²⁰ Ahaz sü thaire ae puhye David vei Nuhdu, veo maivei khüh hinou poa daovu peie, ae puh nahpoutu Hezekiah nou puh thaosou pa vekouloue.