2 VEMAITO 15 - SHEEYU BAIBEL (BSI)

Judah hi Veo Uzziah

¹ Israel mai hi veo Jeroboam II nou veo soulouyu po kainai kousü Judah hi veo Amaziah nahpoutu Uzziah nou vekouloue.

² Puhnou veo soulouyu phaki, puh hai po kiarou pare, ae puhnou Jerusalem hinou po raingouhai hai veo soue. Puh pfü zhih hai Jekoliah toue, ae puh hai Jerusalem hi maipfüe.

³ Puh puo nou soupfüyu zhaibüa puh hai Mapao vei nghingao hinou vah aveih khesü soue.

⁴ Ana puhnou cheche moyu rah thoyu buh khesü souhalou more, südonou maikhe mai hai cheche moyu rahye tho-a posheela ae poukai nüvei hai meidei-a posheela peia bubaie.

⁵ Mapao nou Uzziah hisü loukhaora souyu sou nasü seive peia puhvei hrümai teitei hai kikha hinou bua nou hrüe, ae puhnou vah lia soumoa puh nahpoutu Jothamye panou nuh teidei kho-a nou bue.

⁶ Uzziah nou soupfüyu vah veishi hai Judah hi Vemaitao vei Hrümaiko Larübvü hi rüthou peikhai toue.

⁷ Uzziah sü thaitare, ae puhye David vei Nuhdu, veo maivei khüh hinou poa nou daovu peie, ae puh nahpoutu Jotham nou puh thaosü pa vekouloue.

Israel hi Veo Zekhariah

⁸ Veo Uzziah nou Judah hi veo souyu po shiacha kou hai Jeroboam II vei nahpoutu Zekhariah nou Israel mai hi vekou loue, ae puhnou Samaria hinou khouh arou hai veo soua bue.

⁹ Puh jünou rai-a veo souyu maitao büa Mapao vei nghingao hinou vah ashi khesü puhnou soutare. Nebat nahpoutu veo Jeroboam büa puhnou vah ashi khesü soure ae Israel maiye sü mah souyu hi süthaisa-a thoupeie.

¹⁰ Jabesh nahpoutu Shallum nou puh pei hi shodo ashi souloua Ibleam hinou puhye sü southawure, ae puh thaosou pa vekou loure.

¹¹ Zekhariah nou soupfüyu vah veishi hai Israel maivei Vemaitao vei Hrüko Larübvü hi rüthou peikhai toue.

¹² Mapao nou veo Jehu hi haibüa maiphao adai koute panou veo soukoulai tea paopeikhai touyu nasü cheche-a nou vete peie. “Nevei tyaosholea maitaoye panou Israel mai hi maiphao adai koute hai veo sü soulai.”

Israel hi Veo Shallum

¹³ Uzziah nou Judah maivei veo souyu po shiakü kousü Jabesh nahpoutu Shallum nou Israel maivei veo sü souloue, ae puhnou Samaria hinou khouh ali hai Israel maivei veo soua khasa-a hrüe.

¹⁴ Gadi nahpoutu Manahem nou Tirzah hinou Samaria hi veloua Shallum ye sü southawure ae puh thaosou pa vekou loure.

¹⁵ Shallum nou soupfüyu vah veishi ae puhnou kabüa shodo ashi sü soue touyu teitei hai Israel maivei Vemaitao vei Hrümaiko Larübvü hi rüthou peikhaitoue.

¹⁶ Menahem nou Tirzah hinou tapayu phaki, puhnou Tappuah nuhdu, sühinou hrüyu mai veishi ae süpehao hinou buyu nuh teidei teitei hai soushi souhawure, daiolouzü puletao nou puhvei khakhe hi bulai moe tea khaitya peie. Puhnou poupfüyu napfümai koute-a pou hinou nahtou hai hrapa peie.

Israel hi Veo Menahem

¹⁷ Uzziah nou Judah hi veo souyu po shiakü kousü Gadi nahpoutu Menahem nou Israel maivei veo sü souloue, ae puhnou Samaria hinou po kirou hai veo soue.

¹⁸ Puhnou Mapao vei nghingao hinou puh thaimo koute hai Nebat nahpoutu veo Jeroboam nou vah ashi souyu büa soupeie, ae puh thaitamo koute hai Israel maiye süthaisa-a mah sü soupeie.

¹⁹ Assaria hi veo Tiglath Pileser nou Israel hi reih huloure, ae Menahem nou puhye shahu sühcho theshiadai hai peie, sübüa puhye panou vebuh hinou bua puhvei vedei hai khasa-a buloure donou peie.

²⁰ Menahem nou pousha sütao hai Israel mai hi toungiyu maitao hinou shahu sühcho raingou raingou hai peio tea poloue. Südonou Tiglath Pileser nou lah puhvei teidei hi dakhai tare.

²¹ Menahem nou soupfüyu vah veishi hai Israel maivei Vemaitao vei Hrümaiko Larübvü hi rüthou peikhai toue.

²² Puh sü thaire ae puhye daovu peie alia puh nahpoutu Pekahiah nou puh thaosou vekou loue.

Israel hi Veo Pekahiah

²³ Judah hi veo Uzziah nou vekou louyu po raingaou kousü Menahem nahpoutu Pekahiah nou Israel mai hi veo souloue, ae puhnou Samaria hinou po ahai hai veo soue.

²⁴ Puh-a Mapao vei nghingao hinou vah ashi sü soure, ae Nebat nahpoutu veo Jeroboam nou vah ashi soupfüyu bütoua puh-a soua nou Israel maiye mah hi süthai thoupeie.

²⁵ Pekahiah khe hinou buyu peikhomai ali, Ramahial nahpoutu Pekah nou Gilead hinou mai raingou saloua Samaria hi veo vei ki hinou Pekahiah sü southawure, ae puhnou puh thaosü pa veo souloue.

²⁶ Pekahiah nou souyu vah veishi hai Israel hi veo maitao vei Hrüko Larübvü hi rüthou peikhai toue.

Israel hi Veo Pekah

²⁷ Judah hi veo Uzziah nou veo souyu po raingouhai kousü Ramaliah nahpoutu Pekah nou Israel mai hi vekou loue, ae puhnou Samaria hinou po kai hai veo soue.

²⁸ Nebat nahpoutu veo Jeroboam nou vah ashi soua Israel maiye mah hi süthai thoupeiyu bütoua Pekah-a Mapao vei nghingao hinou vah ashi khesü soue.

²⁹ Pekah nou Israel mai hi veo soua buyu teile hinou Assaria hi veo Tiglath Pileser nou Ijon nuhdu, Abel Beth, Maakah, Janoah, Kadesh ae Hazor nuhdu, alia Gilead maivei nuh teideitao, Galilee ae Naphtali nuh teideitao hai poloure alia maikhe maiye hukhamai soua Assaria hi nüpoa tare.

³⁰ Uzziah nahpoutu Jotham nou Judah hi veo souyu po kai kousü Elah nahpoutu Hoshea nou shodo ashi souloua veo Pekah sü southawure, ae puhnou pa vekou loure.

³¹ Pekah nou soupfüyu vah veishi hai Israel maivei Vemaitao vei Hrümaiko Larübvü hi rüthou khaitoue.

Judah hi Veo Jotham

³² Remaliah nahpoutu Pekah nou Israel mai hi veo souyu po ahai kousü Uzziah nahpoutu Jotham nou Judah hi vekou loue.

³³ Puhnou veo soulouyu phaki puh hai po kaingou pare, ae puhnou Jerusalem hinou po kiarou hai veo soue. Puh pfü hai Zadok nahnaotupai Jerusha toue.

³⁴ Puh puo Uzziah nou soupfüyu büa Jotham nou Mapao vei nghingao hinou vah aveih khesü soupeie.

³⁵ Ana rah kukheye thoyu buh khesü puhnou souhalou more, südonou maikhe mai hai cheche moyu rahtaoye tho-a posheela peie ae poukai nüvei khesü meidei peia nou bubaie. Rathoki vei Reilova Rokhubomü na hai Jotham nou soupeie.

³⁶ Jotham nou soupfüyu vah teitei hai Judah hi Vemaitao vei Hrümaiko Larübvü hi rüthou peikhai toue.

³⁷ Puhnou veo souyu teile hinou Mapao nou Sairia hi veo Rezin ae Israel hi veo Pekah hai Judah hi panou soureih soure donou seive peie.

³⁸ Jotham hai thaire ae puhye David vei Nuhdu, veo maivei khüh hinou poa daovu peie, ae puh nahpoutu Ahaz nou puh thaosou pa vekou loue.