2 VEMAITO 1 - SHEEYU BAIBEL (BSI)

Elijah ae Veo Ahaziah

¹ Israel maivei veo Ahab thaitayu thai, Moab maitao nou Israel mai pei hi reih soua dutare.

² Israel maivei Veo Ahaziah hai Samaria hinou buyu puhvei ki pei hinou dekou daishi shore. Südonou puhnou kopomaiye seiho Philistin maivei Ekron nuhdu hinou buyu rah Baalzebub hisü puh hai veilou süho veilou hore touyu panou nouta-e.

³ Ana Mapao vei rakivamai alinou Tishbe hinou buyu rachipaolawo Elijah hi taho Veo Ahaziah nou seitayu kopomaitao hisü haibüa noukhaio tea kharochi peie, “Neletao daisounou Ekron vei rah Baalzebub ye sü phakulai tea tawe? Israel mai hi Ramai hare tea neletao nou tsüchowu?

⁴ Mapao nou haibüa paowe tea taho veo hisü paopeio, ‘Puh sü zhizhu khaitouyu hinou veilou hoa thaia bailai!’ ” Mapao nou kharochi peiyu thaifüa Elijah nou soupeie,

⁵ ae kopomaitao nou dakhai ve veo hisü paopeie. Veo nou puletao hi daisounou dakhai vewe tea noue.

⁶ Puletao nou haibüa chila peie, “Mai ali nou Etaoye sü tave daoloua Mapao nou dakhai ve ne hi haibüa paopeio tea nou paoe, ‘Ne daisounou kopomaiye seiho Ekron hi buyu rah Baalzebub hinou phakulai touwe? Israel maivei teidei hi Ramai hare tea tsüchowu? Ne hai zhizhu khaitoua buyu hinou veilou hoa thai-a bailai!’ ”

⁷ “Mai sünasü zhai kabüwe?” tea veo nou noue.

⁸ “Puh hai souhee mainou soukhai touyu naazao nouwe, ae souhee vei khyako ali nou puh khya hai khokhaitoue,” tea puletao nou chila peie. “Süsü Elijah vuzüre!” tea veo nou paoe.

⁹ Süthaisü veo nou puhvei reihmai peikhowo sü panou mai raingou saloua Elijah ye saloure donou seita-e. Peikho mai nanou puhye deichi vanou bua ngaoloue ae puh hi paoe, “Ramai vei mai nare, veo nou neye takoulo tea kharochi peiwe.”

¹⁰ Elijah nou chila peie, “Hakinou E hai Ramai vei maire toulouzü, raki vanou mei nou kou neletaoye deithawulai!” Süteile bü hinou mei nou kou puletao mai hrülaiye sü deithawure.

¹¹ Veo nou peikhomai kukhe aliye panou mai raingou saloua seitapue ae puletao nou Elijah hi taho haibüa paoe, “Ramai vei mai nare, veo nou neye thasho-a nou takou halo tea kharochi peia nou bue.”

¹² Elijah nou haibüa chila peie, “Hakinou E hai Ramai vei mai-e toulouzü raki vanou mei nou kou neletaoye deitha khaiwulai!” Süteile hinou Ramai vei mei nou kou puletao sü deithawure.

¹³ Süthai-a veo nou puhvei peikhomai ali hai panou mai raingou saloua tare. Puhnou deichi hisü taopaloua Elijah vei nghoujü nou kaokou puhvei khoubou sü deiloua haibüa nou puh hi kho-e, “Oh Ramai vei mai nare, zhuvea nou Eye ae avei maitao vei hrirai hai khailupa peio!

¹⁴ Peikhomai ahai ae puhai nou satayu maitao hai raki vanou kou mei nou deithawure, ana Eye leshia nou zhuvea peio!”

¹⁵ Mapao vei rakivamai nanou Elijah hi haibüa paoe, “Puletaoye koa nou tawo, ngaopiso.” Südonou Elijah nou puletaoye koa veo hisü tare,

¹⁶ ae puh hi Elijah nou ve haibüa paoe, “Mapao nou haibüa nou paoe: ‘Nenou kopomaiye seiho Ekron vei rah Baalzebub hi ne hai veilaiho veilai mosa touyu noutayu donou ae Israel mai hi Ramai hayu büa souyu donou ne hai thai-a bailai!’ ”

¹⁷ Mapao nou Elijah hi paoyu thaifüa Ahaziah sü thaitare. Ahaziah hai nahpoutu mailia ha-e, südonou puh thaihou Joram nou puh thaosou Judah hi veo Jehoshaphat nahpoutu Jehoram nou veo souyu po ahai kousü pa vekou loure.

¹⁸ Veo Ahaziah nou soupfüyu vah teitei hai Israel maivei Veo maitao Hrümaiko Larübvü hi rüthou peikhai toue.