2 TIMOTHI 4 - SHEEYU BAIBEL (BSI)

¹ Ramai nghojünou alia ahrimai ea thaimaiye chikulaiyu Khrista Jisu nghojünou, alia puhnou velaiyu ea puhvei vedei hilonou choa Enou nehi chi hainasü lüthou peiwe:

² Chipao nasü paodoukhaio, teile veikia, teile shikia paodou loure donou telo; nenou shameayu teitei noupu doupeiyu nou koa paothou louche peikhaio, zü-a tukhapeio, alia le souho peikhaio.

³ Daiolouzü maikhe mainou acheche lüzhai nasü keilai moyu teilesü velai, ana lah puletao züpa thaisü fütalai ea lah puletaoye donou puletao nou keizhou zhouyu chi paopeire dou-apei maitaoye povedzü khailai,

⁴ alia puletaosü cheche chi keiyu hinou tarei taloua madayu daomai kotao hilo puletao lehai peita bailai.

⁵ Ana newo teisanou lah neye tukha-a bulo, veayu sü shamealo, Ko Avei paodou peimai ali vahsü soulo, alia Ramai kilai alibüa ne vah teiteisü soulo.

⁶ Daiolouzü, Eye posheelare sü chuo souda chekhou khaitoua bure; Eye donou deiphao hrü hainaye thaowu-a tare teilesü vere.

⁷ Enou reih veitoua züloure, Enou tuvare nasü tuva chewure, alia Enou lü nasü potou loure.

⁸ Alia chuo Teithe sükihi acheche chiku-apeio Mapaowo nou Ahi peilaiyu acheche vei Veo peirü nasü Eye donou soudapei khaitoua bure, alia süsü Ahi likhei peibai laimoe, ana puh veyu sü leshia khoa buyu puletao hrülai hi-a peilai.

Lah vanou Paoyu Chi

⁹ Ne Ahi thala-a velou süsou tekhaio.

¹⁰ Daiolouzü Demas nou chuchu deiphao hainaye leshiyu donou Eye thaowu-a Thessalonika hi tare. Kreske nou Galatia hi ea Tita nou Dalmatia hi tare.

¹¹ Luk likhei Eye koa bue. Markye saloua neye koa vekhaio, daiolouzü puhnou Avah souyuhi soukhasho peilousüe.

¹² Enou Tukhikaye Ephesa hi seitare.

¹³ Ne velouzü Enou Troa hinou Karpas bah hi thaodai khaiyu Avei zaoduna ea larü bvütao matsü soua souheenou soukhai touyu taosü pove peikhaio.

¹⁴ Alekjandar hukuyu nanou Ahi alaosou souha-ka peiwure: Mapao nou puh hisü puhnou souyu thaifüa pao rüpeilai.

¹⁵ Lah ne-a puh vanou zhutouloua bulo, daiolouzü puhnou Eletao vei chipaosü chihshoa nuwe.

¹⁶ Enou Azü paoraina vuh hisü maitalinoua Amü bokhamoa maikhemai hrülainou Eye thaowure. Süna vanou Ramai nou puletao pei hi khü phouyu soupeiwuso!

¹⁷ Ana Avanou chipao nasü soutaosou paodou chekhouloua tahrüh kukhe maitao hrülaiye panou chouve loure donou Mapao nou Ahinou lapei-a Eye khouko peie; alia sübüa Eye khaosouveo mü hinou vupapeie.

¹⁸ Mapaowo nou Eye ashi teitei hinou vupa peilai ea sübüa Eye khailu pove puhvei raki vedeihi khaipeilai. Puhye panou teisanou adushosü souloutheo, teisanou! Amen.

Akhai Khurüyu Chidoh

¹⁹ Enou Priskilla ea Aquila hi alia Onesiphoras kikhamai hi khurüyu chidoh seivewe.

²⁰ Erastas hai Korinth hi bue alia Enou Trophimaye Mileta hinou thaore daiolouzü puhsü lishiwe.

²¹ Saiki loumo jühinou ne Ahi veloure donou tepeikhaio. Eubulas, Pudens, Linas, Klaudia ea thaihou jüraimai kukhe hrülainou nehi puletao vei khurüyu chidoh seiwe.

²² Mapaowo nou ne rakoye koa buyu souloutheo. Ramai zhuvea nou neletao hrülaiye koa buyu soulouwo.