2 TIMOTHI 2 - SHEEYU BAIBEL (BSI)

Paoyu Züyu Khrista Jisu Reihmai

¹ Südonou, Anahpoutu, newo Khrista Jisu ye koa ali soulouyu hinou Eletao vei soua buyu zhuveana hinou khou-a bulo.

² Alia nenou zhopaoh maitaoli nghojünou Enou paoyu chou-choulouyu doupeiyu taosü poloua mai kukhe maiye-a doupei lousü laiyu puletao bah hi lüthou peikhaio.

³ Paoyu züyu Khrista Jisu vei reihmai alibüa veayu hisü koa lou zha ngaozho khaio.

⁴ Vah soua buyu reihmai talinoua maisou hrühi koa lou hrüa butamoe, daiolouzü puhvei züpa süwo louzü puh pei chanavei li-choyu soure nasüe.

⁵ Tuvayu mailinou zhaina thaifüa tumo louzü puhnou buusü ngaolou hoe.

⁶ Te-a tatayu puhnou chathou sünavei zha arai nasü ngaozüe.

⁷ Enou pao-a buyu süna vanou tsü chokhaio, daiolouzü Mapao nou neye sütao teitei süloure soukha peilai.

⁸ Enou Avei Ko Aveina hinou paodouyu büa athai hinou hrishu louyu, David tyao-nah hinou veyu Jisu Khristaye li-chokhaio.

⁹ Daiolouzü Enou Ko Aveina paodouyu vanou Esü veahowe ea mah soulaimai ali kua Eye sü hurainou phukhaitoue. Ana Ramai vei chipaowo hurai nou phukhai moe.

¹⁰ Südonou Ramai nou dolouyu maikhe maitao donou süolouzü puletao-a Jisu Khrista hinou veyu teisa khouko-ava poveyu khailu louyu nasü ngaoloure donou Enou ha teitei hinou shameawe.

¹¹ Pao-a buyu haina hai chekhaoe: “Eletao nou puhye koa thaire toulouzü, Eletao-a puhye koa hrizholai.

¹² Eletao nou shamea-a bulouzü, Eletao-a puhye koa vezholai. Eletao nou puhye balouzü, Puh-a Eletaoye balai.

¹³ Eletao nou cheche molouzü, Puhwo cheche-a bubaie, daiolouzü puhnou lah puhye sü motou louhoe.”

Ramai nou Aetouyu Vah Soumai

¹⁴ Puletao hi chi haitaosü paopu peikhaio, alia puletaoye chipaotao vanou veiva more donou Ramai nghojünou kaona-a tuzü peikhaio, daiolouzü sünanou veiyulia soupeimoe, ana kei-a buyu maitaoye souha-kayu likheibaie.

¹⁵ Acheche vei chipaosü soutaosou sei-a, lah puhvah donou hraoloure hayu vahsoumai alibüa, nelah neye Ramai nou ae-ao toupeiyu maili kua Ramai hi posheela loure soutaosou tekhaio.

¹⁶ Ahraopayu ea voyuchi phakuyu hinou tareilo, daiolouzü sünanou maikhe maiye Ramai hinou doulailai-a hutawu baiwe.

¹⁷ Sübüyu puletao vei chi pha-kuyu sü vasouhi cho paloua vasou toulouyu sou süna bübaie. Sübüa doupeiyu puletao hrohinou mai ahaiwo louzü Humena ea Philetas süe.

¹⁸ Puletao sü cheche ludu hinou tala tare ea chuo hrishuyuhai pachere tea pao-a lüloumai kamaitao vei lüsü puletao nou souhare.

¹⁹ Sütoukhaia Ramai nou soushupa khaitouyu kifü sünawo louzü soukho louhoe; alia süpei hisü sükua paoshee soukhaitoue: “Mapaowo nou puhmai soua buyu taoye sü süwe” ea “Mapao vei zhih ku-a buyu maitalinou ashi soua buyu hinou tarei talou vuzülai.”

²⁰ Kidu ali hisü sana ea shahu vei pai-khao likhei bubaimoa süü ea nai vei pai-khao-a bue; alia sütao hronou kamaiye sü teile veiki seiloure ea kamaiye sü teile taki seiloure donou khai khaitoue.

²¹ Maitalinou puh lah ashi sütao teitei hinou sousheeloua bulouzü, puhwo vah vei hi seiloure donou sousheewuyu paopunou seiloure moshilaiyu vahvei tali donou souda khaitouyu pai-khao büe.

²² Südonou nahlemaivei pfüphao züpa nasü thaowuwo, alia le sheetouyu hinou Mapao hi soukha khoa buyu maikhe maitaoye koa, acheche, lü, leshi ea kaonayu sütaosü te-a phoulo.

²³ Ana avoyu ea tsü ha-a veivayu sütao hinou tarei talo; daiolouzü sütaonou zü-veiyu povepeiwe touyu sü nenou süwe.

²⁴ Mapao vei kilaimai sü zü-vei sülaimoe. Puhsü avei ea shamealou süyu dou-apeimai ali soua maikhemai hrülaiye zhuvea peilousü vuzülai,

²⁵ alia puhye ngaobamai taoye kaonayu hinou paodouzü peilai, daiolouzü Ramai nou puletao hi panou ledaloua acheche naye süloure teile avei peilouveie.

²⁶ Alia sükua rashi nanou puhvei li-choyu sü panou souloure donou puletaoye niloukhaia puletao nou puhvei sho-rüh hinou tupaloulai.