2 SAMUEL 7 - SHEEYU BAIBEL (BSI)

Ramai nou David hi Chi Paoveyu

¹ David nou lah puh vei vebuh hisü pa buloure, ae Ramai nou puhye ngaobamai teitei hinou büroyu ali-a hazei tea panou sophitea hrüloue.

² Süthaisü puhnou rachipaolawo Nathan hi paoe, “Ewo avei ki sü sedar süünou soulou-a bure, ana Ramai vei Vo Sübvü nasü sahpao hinou bua baire!”

³ Nathan nou chila peie, “Ne vei lekhe hinou daio soulai tea cho-a buna thaifüa souta khaio, Ramai nou teisa neye zhohrü peilai.”

⁴ Ana süzhou kheikou hai Ramai nou Nathan hi paoe,

⁵ “Taho avei kilai David hi Enou ne hi paoyu teitei sü paopeio, süolouzü ‘Eye panou bure Rathoki na soure sü ne moe.

⁶ Israel nah maiye Ejipt mai bah hinou vupoa tapalouyu nou chu koute E hai Rathoki hinou hrükhai toumo hie, sahpao hinou bua nou tasühao-a bubaie.

⁷ Israel maiye sa-a tasühao-a buyu teile hi Enou Israel maiye süthai-apei mai tarali hi-a daisounou Eye donou sedar süünou souyu Rathoki soupeimowe tea nou paokhaimo hie!’

⁸ “Südonou avei kilai David hi paopeio, süolouzü Halih Hala Soulousüo Mapao nou puh hi paowe, ‘Enou neye sü rekou nou zhaotu kho-a buhinou, neye panou Israel mai peikhowo soulai tea saloure.

⁹ Nenou tayu buh teitei hi Enou neye koa sata peie, neye huveyu soureihmai teitei jünou neye panou veiloue, Enou neye panou deiphao hi süthai-apei dudulaina soupeie.

¹⁰ Enou avei Israel maitaoye donou teidei ali dopa khaitoue, puletaoye panou taihinou hrülai ae raichoki büa puletaoye panou mai linoua souveapulai moe.

¹¹ Enou ngaobamai bah hinou neye vupeilai alia nevei tyaosholea hai teisa nou kaozhou vei-a panou bukoute peilai tea Enou ne hi chaachou soua paopeire.

¹² Ne thai ki, nevei puopao maitao hrohi pothou vuyu thai, nevei nahmaitao hrohinou mai aliye panou veo soulai, puh vei vedei sü soukhou souchi peilai.

¹³ Eye donou sedar süünou Rathoki soupeire hai puhnou soulai, puh vei tyaosholea panou akhai soulai moe.

¹⁴ Enou puh vei puo soulai alia puhnou anahpoutu sü soulai. Puo nou nahye tukhayu büa puhnou soumah soumo louzü Enou puhye tukha peilai.

¹⁵ Ana Enou Saul ye vebuh hinou pophawua neye panou vebuh hi bulouyu büa avei leshiyu nasü puh hinou potawu laimoe.

¹⁶ Nevei tyaosholea hai panou teisa nou bukoutelai, sütea nevei vedei sü hrülü phaolü panou bulai.’ ”

¹⁷ Ramai nou süngao peiyu teitei sü rachipaolawo Nathan nou David hi paongao peie.

David nou Ramai Kalo Pao-a Veachi Paoyu

¹⁸ Süthaisü David veo nou Ramai ki sahpao hi talou bulou-a paoe, “Oh Ramai Mapaowo, nenou Eye donou alia avei kihikha maiye donou havei haizho koute soupeiyu hai E büyu paitya alia avei kihikha büyu mai alinou ngaoyu khamoe.

¹⁹ Ana Ramai Mapaowo, hainou akhai soumo khai-a naki hrüvere avei tyaosholea pei hi-a nenou havei soupeilai tea apaopeikhai touyu haitao hai chunou Eye panou süloue.

²⁰ Avei Ramai, avei Mapaowo, E ne hi daichi paopulai! Ne lah nevei kilai ye süwe.

²¹ Pa-a buyu pfüphou sü lah nevei jüpa, nevei leli ali buyu thaifüa vepakhai tea baie.

²² Ne hai daizhoa due, Oh Ramai Mapao! Ne büyu kukhe ali-a hae, ne likhei Ramai sü baie touyu hai Etao nou süa baie.

²³ Mai vei qila sou-a buyu hinou lah nevei mai soulai tea nenou vupa peiyu Israel mai tyahrüh büyu tyahrü ali-a deiphao hi hae. Nenou puletaoye donou khupa tyatyalih soupei-a lah nevei zhih sü deiphao veishi hi süve teloue. Nenou nevei maikhe maiye sa-a takouyu phaki tyahrü kukhe maiye hulai peie alia puletao vei basharatao souha peie.

²⁴ Israel maiye sü teisa lah nevei mai soupeie alia nenou teisa puletao Ramai sü soupeie.

²⁵ “Chuwo Ramai Mapaowo, nenou Eye donou alia avei tyaosholea donou paohpeiyu nevei chipaotao thaifüa teisa nou souvete peio.

²⁶ Sütea ne zhih sü dusho-a talai alia ‘Halih Hala Soulousüo Ramai nou Israel maivei Ramai soupeie’ tea maikhemai nou paokulai. Ae nenou avei tyaosholea ye sü teisa khopei vupeilai.

²⁷ Halih Hala Soulousü Israel maivei Ramai Mapao, nenou ahi haibüyu veishi sü süngao papeie, südonou ne kilai E hai khuvei-a nou ne hi haibüa veachi paowe.

²⁸ “Chuwo O Ramai Mapaowo, newo Ramaie; nenou paopayu chipao taosü vetevuzülai, daisounou touyuo khupa souyu paohpeiyu haina sü nenou ahi paohpeie.

²⁹ Chuwo Ramai Mapao, zhuvea nou ne kilaiwo avei kihikhamai pei hi hapeio, avei tyaosholea maiye panou teisa nevei leshi khehinou hrüa buloure donou hapeio, teisa panou nevei ha ngao-a hrülo.”