2 SAMUEL 6 - SHEEYU BAIBEL (BSI)

Vo Sübvüna Jerusalem hi Pove louyu

¹ Chua dakhai David nou Israel maivei reihmai veikayu mai theshirou hai kuve jüloure,

² ae puletaoye sü sa-a Judah hi buyu Baalah hisü velou sühinou buyu Ramai vei Vo Sübvü, Halih Hala Soulousüo Mapao vei zhih pfü-a shouh pfüyu khaona phao hinou vebuh sou buyu nasü Jerusalem hi podakhai veloure donou tare.

³ Puletao nou deichi hinou buyu Abinadab kihinou popalou-a choluki sheetou touyu ali hi thouloue. Abinadab vei nahpoutu ahai Uzzah alia Ahio nou choluki sü khopoa nou tae,

⁴ ae Ahio nou nghoujü nou tae.

⁵ David alia Israel mai kukhe taonou phi cho-a talukhu lou soupoa nou khouko teitei nou lou-a, lou souyu basei, khubvü, hu baiyu kho tyalih nou ko-a Ramai ye shoe.

⁶ Puletao sübüa Nakon vei chathai hi veyu phaki, chode nou phei süloua choluki hai kaotayu noure, süphaki Uzzah nou puh vei bah topa Vo Sübvü nasü tao baire.

⁷ Ramai nou Uzzah pei hi raroulou-a puhye sü Vo Sübvüna pe hinou southawure,

⁸ südonou dei taina zhih sü teisa nou Perez Uzzah tea kutare. Ramai nou raroulou-a Uzzah ye tukha souyu vanou David-a raroure.

⁹ Süthai David nou Ramai ye ngaopilou-a paoe, “E daibüa Vo Sübvü nasü ahi pove khailoulai?”

¹⁰ Südonou puhnou Vo Sübvü nasü Jerusalem hi pove khaimo-a nou Gath nuh hi buyu Obed Edom touyuna ki hi pove khaiwu baire.

¹¹ Nuh taihi Vo Sübvü nasü khouh asü bue, ae Ramai nou Obed Edom alia puhvei kikhamaiye shiha alao soumoa nou peie.

¹² David Veo nou Obed Edom kihikhamai hai Ramai vei ha ngaolouyu ko süloua Vo Sübvü nasü Jerusalem hi povere donou Obed Edom ki hinou popaloure.

¹³ Maikhe maiye panou Vo Sübvü nasü po-a phika arou katayu phaki David nou puletaoye panou tapumoa chaoyu phaki David nou chode ali alia hrü veiyu chotou ali tea Ramai hi posheela peie.

¹⁴ David nou züzüyu sabanü likhei puhvei khya zhalou-a puhvei khouko veishi nou lou-a Ramai ye tsükhouyu hinou phi choe.

¹⁵ Sübüa Israel maitaoye koa Vo Sübvü nasü poa sashoyu pai sha-a alia shabe houyu kho nou koa Jerusalem hi pove khailoue.

¹⁶ Vo Sübvü nasü poa nuhdu hi louyu phaki, Saul nah naotupai Mikhal, David vei khapfü nou vabomü hinou phepa David nou phi cho-a Ramai ye shoyu ngaolou-a ngaora shore.

¹⁷ Puletao nou Vo Sübvü nasü poa ve David nou soudayu sahpao khevai hi khailoure. Süthaisü puhnou meideia Ramai ye posheela peie alia chavei lathao-a buloure vei posheela hai Mapao hi posheela peie.

¹⁸ Puhnou ratho-a nou posheela peiyu thai, puhnou Ramai Mapao zhih hinou maikhe maiye ha peie,

¹⁹ alia puhnou Israel mai naotu poutu hrülaiye raokhao ke chekhei, souva chekhei alia rashithou nou souyu raokhao pho chekhei zhipeie. Süthaisü mai hrülai nou lahkuku ki hi vetare.

²⁰ Süthaisü David-a lah kihikhamaiye daore donou ki hi veyu phaki, puh vei khapfü Mikhal nou tapa puhye süloua haibüa paoe, “Zhou Israel mai veo sü vomai ali büa lah vei kilai loumai nahtao nghoujü nou sabanü banoutu moa ngao-a nou lah nevei zhih veih ali souloure!”

²¹ David nou chilai peie, “Ne vei puo alia puhvei kihikhamai thaosou-a Eye panou Israel mai vei süthai-apeio soure donou tea dolouyu Mapao puhye khuhao-a aphi chowe, süthai-a Ewo aphi cho-a Mapao ye tsükhouyu soulai.

²² Chu jünoua E lah hraongu soupulai hie, ne nghoujüwo E hai hazholia moa powe, ana nenou paoyu homaitao nghoujü hiwo Eye tsükhou shopeiwe!”

²³ Saul nah naotupai Mikhal sü athai koute hai nahmai ali-a nalou moe.