2 SAMUEL 5 - SHEEYU BAIBEL (BSI)

David nou Israel alia Judah hi Veo Souyu

¹ Süthaisü Israel hi khü teitei nou tave Hebron hi buyu David hi paoe, “Etao mai hrülai hai lah nevei vasou ae zhe baie.

² Raichoki Saul nou veo sou-a buki-a nenou Israel maitaoye sü süthaisa-a reih zü-a baie, Ramai nou neye panou puh vei maitao süthai-apeio alia puletaoye kho-apeio nasü soulai tea paopeiwure.”

³ Südonou Israel hi süthai-apei maitao nou Hebron hi buyu David hisü tave puletao koa nou ae-ao touyu ali souloure alia maisou nou David ye panou veo soulai tea theadzü napeie. Haibüa David nou Israel mai teitei pei hi veo souloure.

⁴ Puhnou vekou louyu phaki, puh hai po shirou pare ae puhnou po raidai hai veo sou-a hrüe.

⁵ Hebron hi Judah mai veo soua po anai-da hrüe, Jerusalem hinou Israel alia Judah maivei veo soua po raidai-asü hrüe.

⁶ David alia puhvei maitao nou Jerusalem hi hrüa buyu Jebus mai hi reih huloue, ae puletao nou David hi paoe, “Ne hatarali souyuma buh hai hisü hulou louhoe, ne nou haki nou haihi loulouyu thaio, ngheicha maitao ae shovai laimai koute nou neye dulou süe.” Puletao nou haibüa paoyu sü David nou buh hai hisü loulou hoe tea cholouyu vanou paowe.

⁷ Ana David nou reih hulou Zion nuhdu nasü poloure alia nuhdu sünasü “David vei Nuhdu” tea souloure.

⁸ Süteithe zhou David nou puhvei maitao hi paoe, “Mai talinoua Jebus maiye southa nülouzü dzükü bo haina hinou loulou-a David nou ngaora shoyu peichamai alia ngheicha maitaoye sü southa khaio.” Hai vanou phicha nghicha mai hai Rathoki hi bulou shie tea paowe.

⁹ David nou reihbu tainasü lou polou-a taihinou hrüloure alia David Nuhdu tea kuloure. David nou nuhdu haina vei vado chukho hinou soukapulou-a souduloure.

¹⁰ Khouko buyu Ramai nou puh ye zho hrüpeiyu vanou teithetsü shu dulailai pade.

¹¹ Tair hi veo Hiram nou vah soulousü maiye David hi sei peie; sedar süü sha soumai alia chuh sha soumai seive pei-a veo vei ki soupeie.

¹² Ramai nou puhye koa vah taralia soupeiwe alia puhye panou Israel mai veo sou-a nou puhvei vedei soudu souso peie touyu David nou süloure.

¹³ Hebron thaowu-a Jerusalem hi ve hrüyu thai, David nou khapfü ae kipfü kukhe-a napu loure, ae nahpoutu alia nah naotu kukhe-a hrüpu loure.

¹⁴ Jerusalem hinou nahmai haitao hai napeie; Shammua, Shobab, Nathan, Solomon,

¹⁵ Ibhar, Elishua, Nepheg, Japhia,

¹⁶ Elishama, Eliada alia Eliphelet haitaoe.

Philistin Mai jünou Veilouyu

¹⁷ David ye panou Israel mai teitei pei veo souloure touyu ko hai Philistin mainou choulouyu phaki, David ye nüloulai tea puletao vei reihmai hai seitare. David nou süsü sülou-a reihbu soutou khaitoua buyu buh ali hi ve buloue.

¹⁸ Philistin maitao nou Rephaim Deikho hi ve buloure.

¹⁹ David nou Ramai hi paoe, “E Philistin maitaoye reih hulou laiwu? Ne Eye panou veiloulai moge?” “Ao, huloukhaio! Neye panou reih veilouyu sü peilai,” tea Ramai nou chila peie.

²⁰ Südonou David nou Baal Parazim hi takoulou-a Philistin mai jünou reih veiloue. Puh nou paoe, “Mapao nou dzüdu büa avei ngaobamaiye püphe püpho loupeie.” Südonou dei süna zhih hai Baal Perazim tea sapeie.

²¹ Philistin mai nou Israel maiye dulou hoa tutare, puletao vei bashara koute thaowua tutare, ae David vei maitao nou sükhesü poloua tare.

²² Taithai-a dakhai Philistin maitao nou Rephaim Deikho hi ve jüa bupu loure.

²³ Chua David nou Ramai hi kabülai tea noupue ae Ramai nou khüpeie, “Hai hinou reih hulouso, ana tasühao khaio alia huloure donou soudalo, puletao thailao nou ae balsam süübetao pe hinou huloure donou soudalo.

²⁴ Neletao nou süübetao pei hinou mai tayukho choulouzü, süthaisü neletao nou reih huloukhaio, Enou neletao jü rai-a kou Philistin mai jünou veiloulai.”

²⁵ Ramai nou paopeiyu toutea David nou soukhaie, Philistin maiye Geba hinou hupoa Gezer ludu hi koute hudakhai tawure.