2 SAMUEL 2 - SHEEYU BAIBEL (BSI)

Judah Teidei hi David ye panou Vekou louyu

¹ Haithai David nou Ramai hi noue, “E chuwo Judah maivei nuh tarali hi taho hrüa veiho shie?” Ramai nou “Taho hrüa veie” tea paopeie. David nou noupukhaie, “E nuh kana hinou taho hrülai?” “Hebron nuhdu hi taho hrüo” tea Ramai nou paoe.

² Südonou David nou puhvei khapfü ahai süolouzü Jezreel pfüpai Ahinoam alia Karmel hi rai-a Nabal khapfü souyupai Abigail ye salou-a Hebron hi tare.

³ Puhnou puh vei maitao alia puletao kikhamaitao tea koa Hebron nuhdu pehi tave hrüa bure.

⁴ Süthaisü Judah hi maitao nou Hebron hi tavelou-a David ye panou veo soure donou theadzü napeire. David nou Gilead hi buyu Jabesh nuhmai nou Saul thaiphao sü vupeie touyu süloukhaie,

⁵ puhnou kopomaiye seiho haibüa nou paoe, “Neletao Saul veo ye tsükhou-a puh vei thaiphao sü soutaosou-a vupeiyu vanou neletaoye Ramai panou hapeiyu soulou theo.

⁶ Ramai nou neletaoye leshi peitheo, neletao nou vah aveih soupeiyu donou E-a neletaoye donou soutaosou zhupeilai.

⁷ Khu dulo, khou chilo! Neletao veo Saul sü thaire, ana Judah maitao nou puletao vei veo soure donou apei hi theadzü napeiwure.”

Ishbosheth ye panou Israel Mai hi Veo Souyu

⁸ Saul veo vei reihmai peichawo Ner nahpoutu Abner nou Saul vei nahpoutu Ishbosheth sa-a Jordan rei alilo dova tupa Mahanaim touyu buhi bure.

⁹ Abner nou Ishbosheth ye panou Gilead teidei hi veo soure, Asher, Jezreel, Ephraim alia Benjamin maitao, süolouzü Israel maivei vedei teitei pei hi veo soure.

¹⁰ Puh nou Israel mai veo souyu phaki, puh hai po raidai pare alia puhnou po ahai Israel mai veo soue, ana Judah khüwo louzü David veo khe hinou bue.

¹¹ Puh nou Hebron hinou po anai-da hai veo soue.

Israel alia Judah Mainou Reih Züyu

¹² Abner alia Ishbosheth khenou adumaitao nou Mahanaim hinou tapoa Gibeon nuhdu hi ve-e.

¹³ Pfü Zeruiah nahpoutu Jaob alia David khehinou buyu adumaitao nou tave zai ali pe hinou daoe. Me ali nou zaipe alilao alia me kukhe alinou zaipe thapo alilao hinou ve zhi ngaola-a dao-a bure.

¹⁴ Abner nou Joab hi paoe, “Nahlemai kamai-a dopaloua maisou thao sou-a panou reih züva-a bailaishe.” “Sü-a veie,” tea Joab nou chila peie.

¹⁵ Me ahai hinou mai kiahai kiahai hai dopalou-a Ishbosheth ae Benjamin khü alia David maitao thaosou-a panou talou reih züvae.

¹⁶ Lahkuku pa chekhei takou ali nou ali pei paivalou-a khoche nou khüvae, sübüa mai kaidai sü deiphi kaokou thaikhai-a baire. Südonou deibuh sühisü “Khoche vei Dou” tea kue.

¹⁷ Süthaisü lekha shishoyu reih sü züshure alia Abner ae Israel maitao sü David maitaoye soulou hore.

¹⁸ Zeruiah pfüpai nahpoutu asü: Joab, Abishai alia Asahel chinamaitao hai reih hi loukhai toue. Asahel hai shu jünoua taveipu hie,

¹⁹ puhnou Abner thai hukoure.

²⁰ Abner nou thailao reive lou-a paoe, “Ne Asahel mowu?” “Ouvai,” tea puhnou khüpeie.

²¹ “Athai ngousou baio!” tea Abner nou paoe. “Reihmai kukhe liye thaihu loua puh hi buyutao sü poloua baio.” Ana Asahel nou thaokhaimoa thaingoukhai ngoukhai-a baide.

²² Abner nou thailao reivelou-a paopue, “Athai ngouso, daidonou Eye panou neye southa vuzüwulai tea souwe? E kabüa ne jürai Joab ye daolai?”

²³ Ana Asahel nou ngouyu thaokhai bare, südonou Abner nou puhvei heung nou thailova thaipa Asahel pou hinou khüshapa phaohi chapeiwu-a puhsü kaolou thai-a baire, ae puh thailao nou laiyu maitao nou takou puhvei thaiphao ngaolou-a cho hasou-a baire.

²⁴ Ana Joab ae Abishai nou Abner thaihu poa tare, thai jüpoa teinghi loutayu phaki Ammah deichi, süsü Giah hinou teinghi palao, Gibeon vaohro hi loure ludu hi vere.

²⁵ Sühisü Benjamin khü hi maitao nou Abner ye sühaove loua deichi peitaoh hinou dulai tea souda-a bue.

²⁶ Abner nou Jaob hi sha-a nou paoe, “Reih zükoute-a bubai laiwu? Akhai hi kou havei ali-a ngaomoa shikhai shikhai-a bailai touyu ne sümovu? Etao hai kityarai maikhai baie, teile daisho koute nemaitaoye panou Etao thai hulaige?”

²⁷ Joab nou chila peie, “E Ramai zhih hinou chaachou souwe, süolouzü nenou chi paomoyu thaiwo dosho teithe payu koute avei maitaoye panou ne thai ngoulai.”

²⁸ Süthaisü Joab nou shabe hou-a puhvei maitaoye panou Israel maiye thai ngoupu khaiso touyu shee soungao peie, alia sübüa reih züpu khaimoa baire.

²⁹ Süthaisü Abner alia puhvei maitao hai kheimathe nou Jordan rei sü tacho palou-a thainesho teithepayu phaki tapoa Mahanaim hi veloure.

³⁰ Joab nou chuo maiye thaihuyu hai chaore, puhnou puhvei maikhe maiye kuve jülouyu kisü mai kiakü hai Asahel-a loua nou ngaomode.

³¹ David vei maitao nou Abner vei mai 360 southawure.

³² Joab ae puhvei maitao nou Asahel vei thaiphao sü puhvei kihikha maivei khüh, süolouzü Bethlehem hinou vupeie, süthai puletao nou kheimathe nou tapoa teithe payu phaki Hebron hi khaive teloue.