2 SAMUEL 19 - SHEEYU BAIBEL (BSI)

Joab nou David ye Zü-a Doupeiyu

¹ David veo nou Absalom thaiyu donou kra-a dopfüa bure touyu sü Joab hi ve paore.

² Südonou David vei maitao sü reih veiloure tea asayu thaosü David nou levea-a puhvei nahye donou do-a buyu vanou maisou nou le vamoyu sou-a baire.

³ Reih hinou maiye soulou ho-a tutayu reihmaitao nou hraongu pfüa buyu bütoua David vei maitao hai kheikhei sou-a lahkuku nuh hisü khaita khaire.

⁴ Veo sü sah pei hopfü-a rasou haibüa kra-a bure, “O anahpoutuwo, anahpoutu Absalom, anahtu!”

⁵ Joab nou veo ki hi tavelou-a puh hi paoe, “Zhou teithe nenou lah nevei maitaoye hraongu soupeiwure; nevei hrirai vupa peiyu, nevei nahmataoye vupa peiyu alia nevei khapfü alia nevei khapapfütaoye vupeiyu maitaoye sou nguwure.

⁶ Neye leshiyu maiye sü nenou ngaora loure alia neye ngaorayu maiye nenou leshi loure. Ne khenou adumai hrülai alia nevei maitao hai nevei nghoujü nou halia more. Zhou hai Absalom nou hrilou-a nevei maitao thaikhai touyuma newo asa sho-a bailai touyu Enou ngaoloure.

⁷ Südonou chunou tapaloua nevei maitaoye kuve jülou-a nou chi paolo, sütou molouzü Ramai zhih hinou chaachou soua E ne hi paowe, süolouzü doshowo mai ali koute-a ne hi bulai moe. Süthaisü nevei hrühi veahoyu hrülai jünou vea vealai nasü soulai.”

⁸ Süthaisü veo nou tashu robomü buh hisü kou buloure. Veo nou chuwo tashu robomü buh na hi buloure touyu sülou-a puhvei mai hrülai nou tave puhye sühao-a buloure. Hai teile phaki Israel maitao hai lahkuku ki hi tuve tare.

David nou Jerusalem hi Khaiveyu

⁹ Israel mai hrülai sü haibüa züva-a bure; “David veo nou Etaoye ngaobamai bah hinou vupa peie, puhnou Etaoye Philistin mai bah hinou vupapeie, ana chuwo puh sü Absalom hinou tuta-a teidei thaowu-a tare.

¹⁰ Etao nou Absalom ye panou veo soure donou theadzü noupeie, ana puh sü reih hinou thaire. Daisounou chukoute veoye sa-a dakhaive loure donou chiko lia paomoa buge?”

¹¹ Israel maitao nou taibüa ku-a buyu David veo hi chouve loure. Südonou David veo nou Zadok ae Abiathar napao ahaiye Judah hi tsümaitao hisü haibüa seiho paoe, “Veo ye sa-a vebuh hi khaidakhai louyu kaore tea Israel maitao nou ku-a buyu ahi chouve loure, veo ye sa-a vebuh hi khaidakhai peiyu hi daisounou neletao hai nakhayu soulai?

¹² Neletao sü avei thaihou jürai maitaoe, avei vasou alia avei zhe baie; daisounou veoye sa-a dakhai veyu hi neletao nanakha soulai touwe?”

¹³ David nou Amasa hi-a haibüa paopeio tea paoe, “Ne avei vasou mowu? Avei zhemowu? Neye panou Joab thaosou reihmai peichana soulai; chi haina vete moyu thaio, Ramai ye panou Eye southa theo,” tea veo nou paoe.

¹⁴ David nou haibüa chipao peikhaie, Judah mai hrülai sü alikhei sou-a puletao lesü David hi peiwure. Sütea puletao nou David alia puhye koa laiyu mai hrülaiye khaivelo tea chipaoh seidakhai peie.

¹⁵ Süthaisü David veo nou khaivere donou tapoa tayu phaki Judah hi mai hrülai nou veoye tapa Jordan Rei hinou sülou-a sa-a nou Jardon tachore donou Gilgal hi ve bure.

¹⁶ Bahurim hinou veyu Benjamin maipuona Gera nahpoutu Shimai-a David ye daore donou Judah maiye koa thalasou tare.

¹⁷ Puhye koa Benjamin khü hinou mai theli, Saul kikhowo Ziba ae puhvei nahmai poutumai kiangou, kilaimai kai koa veo daore donou laie, ae veo nou buyu buh Jordan hi puletao tave loure.

¹⁸ Puletao nou veo kikha maitaoye sühre donou alia hatalia puh jüpa nasü soure donou Jordan rei tachopare. Gera nahpoutu Shimai nou Jordan rei tachopa lou-a takou veo nghoujü nou kaokou khurülou-a paoe,

David nou Shimai ye Zhuvea Peiyu

¹⁹ “Veo nou Jerusalem thao-a tapayu phaki, nevei kilaio Enou soupfüyu mahmo sü khaipeio, Eye veo nou chomahpu peiso, veo nou avei mahmo tainazü nevei lekhe hi khaipei khaiso.

²⁰ Daisounou touyuo nevei kilaio E mahre touyu lah Enou süloure. Südonou zhou teithe Josef vei kihikhamai hrohinou Enou rairaikha sou-a veoye daore donou vewe.”

²¹ Süthaisü Zeruiah vei nahpoutu Abishai nou paoe, “Ramai nou theadzü napeiyu veo ye chaayu vanou Shimai ye southayu sü kao-a baie.”

²² Ana David nou Abishai alia puh jürai Joab hi paoe, “Thaonou kakuyu kaoe tea ne hi nouwe? Ne Eye veayu peikhailaiwu? Zhou Israel mai pei hi veo soure nasü E baie, südonou zhou Israel mai ali koute southalai moe” tea paoe.

²³ “Neye southalai moe touyu avei chipao sü ne hi paopawure” tea puh nou Shimai hi paoe.

David nou Maphibosheth ye Zhuvea Peiyu

²⁴ Süthaisü Saul veo tyao Maphibosheth-a veo daore donou tavere. Puh sü veo nou Jerusalem thao-a tapayu hinou reih veilou-a Jerusalem hi dakhai veyu teithe koute puhvei phi dzü khümoe, mümai saimoe mokhai-a puhvei sabanü-a saokhai toumoe.

²⁵ Maphibosheth nou veoye Jerusalem hinou daolai tea veyu phaki, “Mephibosheth, ne daidonou Eye ko-a tamoge?” tea veo nou noue.

²⁶ “Ramai nou süwe Veo, E sü phi showe. Eye avei rheisüh phao hi popa khaipeio, sütea E-a neye koa tare donou paoe, ana avei kilaio nou Eye lawu baire,” tea Mephibosheth nou chila peie.

²⁷ “Puhnou ne hi ve avanou da-a chi paopeie, ana veo newo Ramai vei rakivamai kheihaoe, südonou lah nenou ahi daisouyu kaolai tea choyu thaifüa soulo.

²⁸ Apuo vei kihikhamai hrülaiye Veo nenou southa khaitouyu kaobaie, ana Eye panou nevei touso buh hinou koa touso zhoyu mai soupeie. Chuwo Enou ne hi hatalia khopulou veiyu sü ali-a hare.”

²⁹ “Ouvai, nenou chi paore sü hae, Enou haibülai tea tsücho chewure, süolouzü Saul vei nangitao hai ne alia Ziba ne hai raibüa zhilo,” tea veo nou puh hi paoe.

³⁰ “Veo nenou vei-a ki hi khaivelou thaisü chebaie, Ziba ye panou nangi veishi sü polo,” tea Mephibosheth nou chila peie.

David nou Barzillai ye Zhuvea Peiyu

³¹ Gilead hinou veyu Barzillai-a Rogelim hinou takoulou-a veo ye paopoa Jordan rei kachopare donou tave-a bue.

³² Barzillai hai tsümai alie, puhsü po raicha pare. Puh hai hanishoyu mai alie, veo nou Mahanaim hi chao-a buyu phaki, puhnou touso khesü veo hi pfüve peie.

³³ Veo nou “Ne-a Eye koa Jerusalem hi ve-a baikhe, Enou neye zhu-a kiko peilai,” tea puh hi paoe.

³⁴ “E teile so-a nou hrire mai more, E neye koa Jerusalem hi ve daio soukhailai?

³⁵ E avei hrümamai po raicha pare, hata linoua Eye vayu peipulou hore. Touvei toushi-a sümore, lou souyu mai pai koute choumode, ne hi ve-a neye souveayu likhei bailai.

³⁶ Daidonou veo nou ahi haizho koute leshiyu ngaowe? Jordan rei tachopa loumo koute E neye paokou peilai tea baie.

³⁷ Süthaisü Eye panou lah ki hi khaive apuopao maitao khü pe hinou thai-a Eye vupeiyu sou-a baio, hai hi avei nahpoutu Chinham bue, puhye panou veo vei kuvah soulai, nenou puhye salo, sütea veo nenou puhye donou dai-a veilai touyu nasü puh hi soupeio,” tea Barzillai nou veo hi chila peie.

³⁸ “Enou puhye saloulai, nenou jüpayu nasü Enou puh hi soupeilai, nenou ahi hatalia khoyu nasü aetou peilai,” tea veo nou paoe.

³⁹ Süthaisü David alia puhvei mai hrülai sü Jordan rei kachopa loure. Veo nou Barzillai ye münou mupei-a puh pei hi hrapeie, sütea Barzillai hai ki hi khaitare.

Veo vanou Judah alia Israel Maitao nou Züveiyu

⁴⁰ Judah mai hrülai alia Israel mai adali nou veo ye paoh po-a Jordan rei tacho paloua veo sü Kimham ye sa-a Gilgal hi tare.

⁴¹ Süthaisü Israel mai teitei nou veo hi tave “Daisounou Eh thaihou jürai soua buyu Judah maitao nou veo ye sü vaopo-a tawe? Daisounou ne alia nevei maitaoye paoh po-a Jordan rei tachopawe?” tea paoe.

⁴² “Veo sü Etao tyarai beimusü, süvanou Etao nou vah haisü souwe, Etao nou vah hai souyu vanou neletao rarouyu daiva bue? Etao nou veo vei touso touloudou? Moa veo vei hatalia Etao nou polourevu?” tea Judah hi maitao nou chila peie.

⁴³ “Veo hinou hatalia ngaore hai neletao jünou Eh nou ngaozü zha kirou kouhie. Neletao daisounou Eh ye ngaophou mowe? Veo ye sa-a Jerusalem hi dakhai velai touyu-a Eh nou paorai himowu?” tea Israel maitao nou chila peie. Ana Judah maitao nou Israel maitao jünou zhaipou shisholou-a paoloure.