2 SAMUEL 18 - SHEEYU BAIBEL (BSI)

Absalom ye Southayu

¹ Veo David nou puhvei mai hrülaiye kupove jülou-a maitaoye sü mai theli me alia mai kaih me tea dade peie, me-me hisü süthai-apeimai chekhei dothou khaipeie.

² Me sütao teitei sü me asü sou-a dade peie, me arai nasü Joab ye panou süthai peie, me ahai chenasü Joab thaihouwo Abishai, Zeruiah vei nahpoutu puhnou süthai peie alia me asü chenasü Gath puona Ittai ye panou süthai peie. Sütea veo nou “E-a neletaoye koa tazholai,” tea paoe.

³ Ana puletao nou paoe, “Ne Etaoye koa taso, hakia nou Etao kaozhoushi-a tutayuma mokhai-a Etao mai dahli thaita-a buyuma puletaoye donou halia kuyu hae, ana veo newo Etao mai the kirou jünou muteipu hie. Südonou newo louzü nuhdu hinou buloua Etaoye donou molouzü shilaiyu khesü seive peiyu nanou veipua bailai.”

⁴ “Neletao nou veilai touyu nasü E soua bailai,” tea veo nou chila peie. Südonou reihmaitao nou mai theli me ae kaih me tea nou meme sou-a tapayu phaki, veo nou rokhubomü hinou la-a bue.

⁵ Sübüa tapayu phaki, Veo nou Joab, Abishai ae Ittai puletao hi kharochi haibüa peie, “Eye donou tea nahle puona Absalom ye southa peiso.” Peikho maitao hi veo nou paoyu kharochi sü reihmaitao-a choukhaitoue.

⁶ David vei reihmaitao nou Israel maiye reih soure donou Ephraim maivei vaohro hisü tare.

⁷ Soureih souyu hisü David vei maitao nou veiloure. Israel mai alaoye zhipeiwure alia mai the kai sü southare.

⁸ Reih züpoa nuh taoli hi tare ae Israel maitao sü khoche nou daothayu jünou vaohro hinou ha-a thaiyu-a poure.

⁹ Vedaore lükhai timoa buyu hinou Absalom nou puhvei rheisüh pfüa nou tukou David vei mai kamaiye daoloure. Absalom nou puhvei rheisüh na pfüa nou süühro sünou tutakhai-e tukou phüsüübe ali khe loure, ae puhvei pei sü phesüü baokao ali hi pfükou bitsü khaiwu-a reisüh nasü lah tutare alia Absalom ye sü phesüü baokao hinou khizhu-a bubaire.

¹⁰ David vei mai ali nou süsü ngaolou-a Joab hi tave “Absalom hai süübe pei hinou khizhupfüa bure,” tea paopeie.

¹¹ “Nenou ngaoyu ki daisounou puhye southawu mokhai-a? Nenou puhye southawu thaio Enou neye shahu kirou ae khyakho ali peilai mounou,” tea Joab nou chila peie.

¹² “Nenou Eye shahu theli peiyuma veo vei nahpoutu pei hi Ewo abah khakhailai moe, daiolouzü veo nou ne hi ae Abishai alia Ittai hi puhvei nahpoutuye puh zhih hinou hashi lia soupeiso tea paoyu ‘Etao mai hrülai nou sükhai touwe.’

¹³ Ana Enou veo chi zü moa nou Absalom ye Enou southawu-a veo nou süko hai chouloure toulouzü, nenou Eye vupeilou paimoe,” tea mai nanou paoe.

¹⁴ “Neye chipha-a nou teile sü souha-a bukhailai more,” tea Joab nou paowua puhnou heung asü polou-a takou Absalom thaimoa hri-a bukinou puhvei khaorao hi phyathou peiwure.

¹⁵ Süthaisü Joab vei reihna pfüyu nahlemai kirou nou takou Absalom ye sühaolou-a southawure.

¹⁶ Süthaisü Joab nou shabe houpei-a Israel maiye thaingou-a laiyu reihmaitaoye panou chaore.

¹⁷ Puletao nou Absalom thaiphao sü poloua vaohro hinou buyu kaobvü ali hi laithouwure alia sütea chuh alao süpei hi hreithou paowure ae Israel mai hrülai hai linaonao ki hi dakhai vetare.

¹⁸ Absalom hri-a bukinou haithai puhye panou ngaimoa lichoyu soure donou lah puhnou chuh ali polou-a Veo vei Deikho hinou shukhaitoue. Daisounou touyuo puhnou lah soukhai molouzü puhye lichoyu vei shee soukhai peire puhvei nahpoutu mai aliro hae. Südonou chuh süna zhih sü lah puhvei zhih hinou sakhai toue, sünasü zhaodao koutea Absalom ye lichoyu chuh tea süa buwe.

Absalom vei Athai Ko David hi Paopeiyu

¹⁹ “Eye panou tave veo hi ko aveih, süolouzü puhye Ramai nou zhuba ngaoba mai hinou vupa peiwure touyu ko hainasü paopeio,” tea Zadok nahpoutu Ahimaaz nou Joab hi khoe.

²⁰ “Moe, zhou teithe ko aveih ali-a taho veo hisü paolai moe, teile kukhe ali hinou paopeio, zhouwo paoso, daisounou touyuo zhou teithe hai veo nahpoutu thaiyu teithe-e,” tea Joab nou paoe.

²¹ Süthaisü puhvei kilaiwo Sudan puona hi “Ne taho lah ne ngheithou nou ngaoyutao sü veo hisü paopeio,” tea Joab nou lüpeie. Kilaiwo nou puhye khurüwu-a ae tea tutare.

²² “Vei-a shi-a hatali palaishe tou-a zhuvea-a nou Eye panou Sudan puonaye koa tawo,” tea tai-a Ahimaaz nou kholoure. “Ne daisounou tanü showe anahna? Neye buu ali-a hai vanou peikhailai moe,” tea Joab nou paoe.

²³ “Hatali souyuma, Ewo tanüre,” tea Ahimaaz nou paopure. “Sütouyu thaisü tawo,” tea Joab nou aetou peiwure. Südonou Ahimaaz sü Jordan deikho vei ludu nanou tupoa kilaiwo puona jünou railoure.

²⁴ David sü nuhdu khevai vei robomü ae vakou vei rokhubomü kohinou bue. Reihkhao puona nou kivo pei hi tapa robomü pei hinou lalou-a zhuyu phaki, mai ali tupoa laiyu sü ngaoloure.

²⁵ Puhnou veo ye sü kulou-a nou puhnou ngaoyu nasü paopeie, ae veo nou puh hi paoe, “Puh sü lah likhei baiyu thaisü ko avei pfüa laiwulai.” Süthai mai nasü tupoa nghilailai koure.

²⁶ Süthai-a reihkhao puona nou mai kukhe ali-a tupoa laiyu sü ngaolou-a rokhubomü khowo hi “Chu-a mai ali tulai khaire zhukhaio” tea paoe. “Mai taina-a ko aveih pfüa laiwulai,” tea veo chila peie.

²⁷ Reihkhao puona nou “Takou raina hai Ahimaaz bübüwe,” tea paoe. “Puh sü mai aveih mai alie, südonou ko aveih pfüa laibulai,” tea veo nou paoe.

²⁸ Süthaisü Ahimaaz nou veo ye ku-a nou “Ramai ye paoshokhaio, puhnou neye panou ne pei hi hraiyu mai jünou veiloure,” tea paoe.

²⁹ “Nahle puona Absalom vei-a buma?” tea veo nou noue. “Puo veowo, ne khe hinou peikhowo Joab nou Eye vah lütayu phaki, maisou nou shurao sou-a buyu Enou choue, ana taihai daidonousa touyu E sülou more,” tea Ahimaaz nou paoe.

³⁰ “Taihinou la-a buwo,” tea veo nou puh hi paoe; südonou puh sü kou sühinou la-a bure.

³¹ Süphaki Sudan puona-a tave telou-a veo hi “Veo, neye donou ko aveih pfüa vewe, zhou teithe Ramai nou neye panou ne pei hi hrai-a bumai jünou veiloure,” tea paoe.

³² “Nahle puona Absalom vei-a buma?” tea veo nou noure. “Veo, zhou teithe puh pei hi payu büa neye hraiyu mai hrülai pei hi ve peitheo touyu hai avei jüpanae, ne pei hi reih sou-a bumai hrülai pei hi vetheo,” tea kilaiwo nou chila peie.

³³ Veo nou hai ko hai choulou-a levea shore. Robomü hi buyu kide nahi tapa loulou-a puh sü krare. Puhnou ta-a lukhu “Anahtu! Anah Absalom! Absalom, Enou nevei thaosou-a thai baiyuo veilai mounou, anahtu, anah poutu Absalom,” tea sha-a nou krare.