2 SAMUEL 16 - SHEEYU BAIBEL (BSI)

David ae Ziba

¹ David nou deichi tachopoa deikho jütea takouyu phaki, Mephibosheth kilaio Ziba nou puhye daore donou kho-a nou bue. Puhnou buh southouyu rheisüh ahai hisü raokhao pho kaih hai, darkha rashiki nou soukhai touyu raokhao kaihli, doushiki nou soukhai touyu raokhao kaihli alia darkha zhaoh souhee lekhabvü ali tea pfüve peie.

² “Na haitao hai daisoure donou pfüvewe”? tea veo David nou noue. “Rheisüh ahai sü veo kikhamai panou pfüre donoue, raokhao alia rashitao sü nevei maitaoye panou toure donoue, ae darkhadzü sü ludu ta-a veahoyu maiye panou souchahri peire donoue,” tea Ziba nou chila peie.

³ “Nevei paopu tyaotu sü daiki bue?” tea veo nou noue. “Puh sü Jerusalem hi bue, daisounou touyuo zhovu hai Israel maikhe mainou puhvei puopao vei vedei sü puh hi lukhai peishulai tea puhnou vureih-a nou bue,” tea Ziba nou paopeie.

⁴ “Mephibosheth vei sou-a buyu teitei sü chuwo ne veire,” tea veo nou paopeie. “Veo, Eye panou teisa nevei jüpa hinou buyu soulou theo,” tea Ziba nou paoe.

Shimei nou David ye Chaa Peiyu

⁵ Veo David nou tapoa Bahurim hi veyu phaki, Saul veo vei tyaraimai alinou kijü tapaloua puhye chaa-a lukhu chuh nou deipeie. Puh zhih hai Gera nahpoutu Shimei toue.

⁶ Puhnou Veo David ye sü puhvei peikho maitao ae puhye khopoa laiyu maitao nou sühao poa buyuma, puhnou David veo alia puhye salaiyu mai hrülaiye sü chuh nou deipeie.

⁷ Shimai nou chaa-a lukhu “Tawo, tawo, maiye southayu puona, maishi shilaio!

⁸ Nenou Saul vedei sü shaoloue, Saul kikhamaiye southa peie, süvanou ne pei hisü Ramai nou tukha souwe, chuo Ramai nou nevei vedei sü Absalom hi peiwure. Maiye dathawo, ne sü chuo kanghiyu sü soure” tea paoe.

⁹ Süthaisü Zeruiah pfüpai nahpoutu Abishai nou veo hi paoe, “Daisou donou thaiyu sei aliye panou avei paopu veoye sü haibüa chaawe? Eye panou takoulou-a puhvei pei düwo!”

¹⁰ “Hai nasü nevei vah moe, hakianou ne ‘David ye chaa peio,’ tea Ramai nou puh hi paoyu vanou chaa-a bailouzü, ‘Ne daisounou haikua veoye chawe,’ tea thaonou paolou süe?” tea veo nou Zeruiah nahpoutu hi paoe.

¹¹ David nou Abishai ae puhvei peikho maitao hi paoe, “Lah anahpoutu koute-a avei hrirai poloulai tea te-a buyu thaisü, Benjamin khü hi mai sü daisounou haibüa soumo khailai! Südonou puhye keakhai touso, puh panou soure sü soukhaio.

¹² Puhnou Eye haibüa chaa peiyu vanou Ramai nou avei veahoyu hai süpeia shiha-a peilou veie.”

¹³ Südonou David alia puhvei maitao hai thaomoa nou ludu sü tare ae Shimei nou puletaoye ludu sasü chaa-a chuh alia nainou laikhya poa tae.

¹⁴ Veo alia puhvei maitao sü ludu ta-a veashore, ae puletao nou velai tea ta-a buyu buh hisü vete loua nou soloue.

Hushai ae Ahithophel vei Paodou-apei

¹⁵ Absalom alia puh thaifüyu Israel maitao sü Jerusalem hi tave louloure, ae Ahithophel-a sühisü veloure.

¹⁶ Süthaisü David vei louche shoyu samai, Arkit puona Hushai nou Absalom hisü veloua puh hi paoe, “Veo sü hrühso hrülo! Veo sü hrühso hrülo!”

¹⁷ “Nevei samai naye leshiyu sü haibüa nou ngaowu? Ne daisounou nevei samai thaifü tamowe?” tea Absalom nou Hushai hi noue.

¹⁸ “Ewo haibüa Ramai nou dopeiyu alia Israel maisou nou dopeiyu süna hi bua süna vei kuvah sou-a bailai.

¹⁹ Süthemoa, Enou kuvah souyu avei paopu vei nahpoutu kuvah soumoa thaovei kuvah sü soulai? Ne puo vei kuvah souyu büa Ewo nevei kuvah soua bailai,” tea Hushai nou chila peie.

²⁰ Absalom nou Ahithophel hi “Chuwo Etao dai souyu kaoe?” tea noure.

²¹ “Ne puo nou veo ki khore donou satamoa ki hi shokhaitouyu ne puo vei khapapfütaoye ne talou sazülo. Sütou louzü ne hai cheche vuzünou ne puoye hraiyu nah alie tea Israel mai hrülai nou sülou-a ne thaisü fütapulai,” tea Ahithophel nou chila peie.

²² Südonou veo ki pei hinou sahpao ali Absalom ye donou haopeie, sütea sahpao süna hinou Israel maisou nghingao hinou Absalom nou puh puo vei khapapfü taoye sü sazü peie.

²³ Teile süphaki Ahithophel nou paopeiyu chi khesü Ramai nou paoyu bütoua David-a ae Absalom-a tsükhou sho-a poe.