2 SAMUEL 11 - SHEEYU BAIBEL (BSI)

David ae Bathsheba

¹ Vemai hai khonü khana teile phaki soureih soutawe, ana David louzü ki hinou bua Joab ye panou reihmaitao sa-a reih soure donou seitawure. Puletao nou Ammon mai jünou reih veloue alia Rabbah nuhdu nasü sühaoloure, ana David louzü Jerusalem hi bue.

² Teitheli teinghei ngailouyu phaki, David nou züphao hinou tashulou-a kipei tapa sühao-a bue. Süphaki puhnou naotumai ali dzükhüa buyu sü zhingao loure. Naotupai sü hüvei shore.

³ Naotupai hai thaoe touyu süloure donou David nou maiye seiho noutare alia puh sü Eliam nah naotupai Hit puona Uriah chapfü Bathsheba she tea süloue.

⁴ David nou maiye seitaho Bathshebaye kulou-a panou puh hi save peie; puh hai leshilou-a sabu sazü loure. (Bathsheba hai khou vei zhe tawua pfüphao sousheeyu vei nanou chebüa baihie.) Süthaisü puh sü ki hi dakhai vetare.

⁵ Somolu puh sü samode touyu sülou-a David hi samoyu ko hai paove peie.

⁶ “Hit puona Uriah ye ahi seive peio” tea David nou Joab hi chi paoseita-e. Südonou Joab nou Uriah ye David hi seive peie.

⁷ Uriah nou puh hi veyu ki, David nou Joab sü daibüa bue, puhvei maikhe mai hai kabüa bue, ae reih züyu sü daibüre tea noue.

⁸ Sütea nouwu-a David nou puhye chuwo lah ne ki hinou ve sophilo tea paopeie. Uriah nou tapayu thai, David nou puhye donou tea sapeina ali peie.

⁹ Ana Uriah nou lah ki hi vemoa nou süzhou zü veo ki reihkhao maiye koa rokhubomü hinou zü-a baire.

¹⁰ Süzhou Uriah nou lah puh ki hi vemoe touyu sülou-a David nou Uriah ye kuve lou-a paoe, “Ne sü teile alao ki hi vekhai moa zhou nou ve-a baie, daisounou lah ki hinou ve solou mowe?”

¹¹ Uriah nou David hi haibüa paoe, “Israel ae Judah maikhe mai nou reih züre donou lahkuku ki thaowu-a reihbu hinou bue, Vo Sübvü-a sühinou bue ae ajünou du-somai Joab alia puh khenou adusomai koutea rekou nou bue. Südonou E kabüa nou lah aki hinou ve touso toua ae avei kipfüye ko-a sabu sazü khailaige? Ne hri-a bubusa nevei kilaio E sübüa nou sava-a hrüyu sü soukhai toulai moe.”

¹² Südonou David nou paoe, “Süthaisü zhou-a hai hinou chaolo, dosho Enou neye reihbu hi seidakhai tapeilai.” Südonou Uriah sü süzhou alia thainesho koute hai Jerusalem hinou nai-a buloue.

¹³ David nou puhye sü kupove puh hinou pa touso loue, ae puhye sa-a nou süzhou khei-a zhaoh sozhiloure, ana süzhou khei-a puhsü ki hi vemoa lah puhvei sahba nou baloua veo vei fühao khoyu maitaoye koa züa baire.

¹⁴ Thainesho shona sü David nou seiko ali rülou-a Joab ye peio tea Uriah tayu phaki panou pfü-a tare.

¹⁵ Seiko nasü haibüa rüpeie, “Kaozhou shishilai reihbu hisü Uriah ye nghoujü hinou seikou thoupeio, süthaisü puh thailao nou laiyu maitaoye panou thaitsü taloua puhye panou reibuh hinou southawo.”

¹⁶ Südonou Joab nou puhvei reihmaitaoye sa-a nuhdu hi reih hulouyu phaki, reih khoushore buh hisü Uriah ye seikou peie.

¹⁷ Soureih maitao nou tapalou-a reih züyu phaki, David vei peikhomai taoli southawure, sühisü Uriah-a loure.

¹⁸ Reih züyu phaki haibüa vepare touyu ko khesü David hi paota peie,

¹⁹ ae Joab nou kopotare maina hi haibüa paolo tea paodoupeie, “Nenou reih züyu hi haibüa vepare tea paoyu thai,

²⁰ Veo nou rarou-a neletao daisounou nuh vei bokha hi kou nghitei-a hulouwe? Nuh vei bokha hinou voulou kapare neletao sümowu?

²¹ Dao raichoki vuli Gideon nahpoutu Abimelech ye nuh vei bokha hinou southawure touyu sü neletao choloumowu? Thebez touyu buh hinou nahpfümai alinou thou veiyu chuh nou laikou khyathapei-a baie. Daisounou bokha nghitei tea hukouwe tea veo nou rarou-a paolouzü, ne vei reihmai thaiyu hisü Uriah-a thaire tea paopeio.”

²² Südonou kopotayu maina nou David hi velou-a Joab nou haibüa paolo tea paopeiyu taosü tave veo hi paoe.

²³ Puh nou paoe, “Ngaobayu soureih maitao hai Etao jünou khouchipu loua tapa Etaoye duloure, ana Etao nou puletaoye nuhdu robomü khevai hudakhai thoupeie.

²⁴ Süthaisü puletao nou kivo levainou voulou kapa nevei reihmai peikhoyu mai taoli hai kathare; nevei reihmaitao hisü Uriah koute-a kathawure.”

²⁵ Seiko pfüve peiyu maina hisü David nou paoe, “Joab ye leveaso, ledulo, ae khudulo tea paopeio. Reihbu hisü thaomai nou thailai, thaomai nou hrilai touyu sü mailinou-a paolou hoe, khouchipu lou-a hudakhailou nuhdu sü polo tea paopeio.”

²⁶ Bathsheba nou puhvei kyapu thaire touyu ko hai sülou-a dongai pfüa nou bure.

²⁷ Dopfüyu teile cheyu thai, David nou puhye veo ki hi vewo tea kuloure, sütea puh sü veo vei khapfü soulou-a nahpoutu ali napeie. Ana David nou souyu vah haso khesü Mapao nou jüpa more.