2 PUOPAOKO 8 - SHEEYU BAIBEL (BSI)

Solomon nou Soulouyu Vahtao

¹ Solomon nou Rathoki souyu ae puhvei ki souyu hai po kai lou-e.

² Veo Hiram nou puhye peikhai touyu nuhdutao-a puhnou soushupuloua Israel maiye seiho nuhdu sütao hinou hrüloue.

³ Puhnou Hamath ae Zobah maivei teideitao-a poloue,

⁴ alia radeiki hinou buyu Palmira nuhdu nahai soushuloue. Puhnou Hamath maivei nuhdu teitei sü soushupu loue, nuhdu sütao hai hupona khaiyu ae seitayu matsü buhtao-e.

⁵ Solomon nou nuhdu haitao-a soushupu loue: Beth Horon nuhdu reilo, ae Beth Horon nuhdu khelo (nuhdu sühai hai kivo khohaoloue, rokhubomü hai hu nou southouloue),

⁶ Baalath nuhdu, hupona seitayu nuhdu teitei, rhei ae rheiluki khaiyu nuhdu teitei sü soushupu loue. Puhnou soulai tea tsüchoda-a buyu teitei sü Jerusalem hi-a, Lebanon hi-a ae puhnou khasa-a hrüyu buh teitei hinou soucheloue.

^7-8 Israel mainou Kanaan maivei teidei polouyu phaki southamoa buyu Kanaan maivei tyaosholea hrülaiye sü Solomon nou tudee poa veavah panou sou-e. Mai sütao hai Hit mai, Amor mai, Perizz mai, Hiv mai, ae Jebus mai-e. Puletao vei tyaosholea maitao hai zhou koute panou qila soua hrüe.

⁹ Puhnou Israel maiye panou veavah soumoe, ana puletaoye panou reihmai, peikhomai, rheiluki pfüyu hi peikhomai, ae rhei pfüyu mai panou sou-e.

¹⁰ Ki souyu hi tudee poa veavah souyu maitaoye khosa-a vah soure donou peikhomai 250 bue.

¹¹ Solomon nou puhvei khapfü, Ejipt veo vei nahnaotu paiye sü David vei nuhdu hi khaimoa puhnou soukhai touyu ki hisü saho panou bure, daiolouzü puhnou haibüa paoe, “Honapai hai Israel maivei Veo David vei veofühao hisü buyu veimoe, daiolouzü vo sübvü khaiyu buh sü sheeyu buh-e.”

¹² Solomon nou Mapao ye puhnou Rathoki pa hinou posheelabu soukhai touyu hisü nou posheela peie.

¹³ Puhnou Moses vei chikha thaifüa sheeyu teithetao— Soteithe, Khouh Ashu vei Nühtao, ae potei hi khonüh asütao- Khei Thoumoyu Raokhao Nüh, Chachiyu Nüh, ae Sahpao Nüh haitao hisü meidei-a posheela peie.

¹⁴ Puh puo David nou haibüa soulo tea kharochi peikhai touyu thaifüa puhnou napao maitaoye sü vahbu peie, ae Levi maitaoye panou napao maitaoye soukha-e ae lou panou soue. Puhnou Rathoki khoyu maitao-a panou teithe teithe vei vah khesü soue ae robomü khesü panou khore donou vah zhipei-e.

¹⁵ David nou haibüa soulo tea napao maitao hi ae Levi maitao hi paopeiyu vah haso teitei sü puletao nou kaolou toua soupeie.

¹⁶ Solomon nou soulai tea buyu vah teitei sü Rathoki soushutayu nou poa Rathoki souche louyu koute hai veitou-a vah teitei sü soucheloue.

¹⁷ Süthaisü Solomon nou Edom maivei teidei, Aqaba zaipe hi buyu Eziongeber ae Elath nuhdu hi ve-e.

¹⁸ Veo Hiram nou puhvei peikho maiye panou dzüluki pfüveih shoyu maiye panou pfüloua puh hi ve-e. Puletao nou Solomon vei peikho maitaoye saloua Ophir teidei hi ta-e, ae puletao nou Solomon ye sana sühdou thekiangou jünou la-a pfüve peie.