2 PUOPAOKO 7 - SHEEYU BAIBEL (BSI)

Rathoki Soushee-a Popeiyu

¹ Veo Solomon nou veachi paocheyu thai puletao nou posheela khaitouyu natao sü raki hinou mei koulou taoloure, ae Rathoki hisü Mapao vei khouko ava sünou varua phoutao loure.

² Rathoki hisü mei varua phoutao louyu donou napao maitao hai kikha talou louhore.

³ Raki vanou mei kouyu ae Rathoki hi ava sünou lou phouloua buyu sü Israel mai nou zhingao loukhai-e, puletao pei pfüa nakou Ramai ye thore, ae puhvei aveih ae akhai hayu leshi peiyu sü paosho-e.

⁴ Süthaisü Solomon ae maikhe mainou Mapao ye posheela khesü pove peie.

⁵ Puhnou chode 22,000 ae zhaotu 120,000 hai posheela peie. Haibüa Veo Solomon alia maikhe mainou Rathoki nasü sathou peie.

⁶ Napao maitao nou la puletao nou bure buh hisü nou lapoa bue, ae Levi maitao nou puletao hilo reipoa Veo David nou Mapao ye lou soushore donou peikhai touyu basei khesü poa “Puhvei leshi hai akhai ha-e” tea lou soua bue. Napao maitao nou shabe sü nghou-e ae mai hrülai nou lapoa nou bue.

⁷ Solomon nou Rathoki nghoujü nou buyu kipa nasü soushuloue, ae süthaisü meidei-a posheela peiyu, thoudzü posheelayu, alia theadzütao posheela peiyu khesü buh sühinou posheela peie, daiolouzü puhnou baosahu nou soukhai touyu posheelabu nasü posheela haitao teitei posheelare sü tailere.

⁸ Solomon ae Israel maitao nou Sahpao Nüh hai teithe anai koute nüh nüe. Nüh hai hisü mai alao velou-e, veloua buyu Hamath hinou poa khelo kou Ejipt maivei deirai hi koute hinou hrüa buyu maikhe mai-a veloue.

⁹ Puletao nou teithe anai hai posheelabu nasü soushee-a sathouyu donou bue, ae teithe anai hai nüh nüe. Teithe akhai zhou kou puletao nou akhai vei nüh nüzho-e,

¹⁰ ae thainesho, khouh anai navei teithe kaisü zhou hai Solomon nou maikhe maiye sü lahkuku vei ki hi seitawure. Mapao nou Israel mai hi, Veo David hi, ae Veo Solomon ye shiha alaosou peiyu donou maikhe maihai asa shore.

Ramai nou Solomon ye Ve Ngaopu Peiyu

¹¹ Veo Solomon nou soulai tea buyu Rathoki ae puhnou bure veo ki nasü souche louyu thai,

¹² Mapao nou puh hi khei nou ve zhu ngaoloua haibüa paoe, “Nenou veachi paoyu sü Enou choure, ae Rathoki hai nasü Eye posheela peiyu buh ali soure donou Enou popeiwure.

¹³ Enou avei maitao hi panou teirükou peimoa buyu phaki, moyuma puletao vei chamou khesü panou khazü nou toulouyu phaki, moa puletao hi rahta-rahvu seive peiyu phaki,

¹⁴ puletao nou vah ashi souyu khesü thaokhaiwua ledaloua ahi dakhai ve veachi pao louzü, Enou puletao vei veachi sü raki hinou kei peilai, puletao vei mah khesü khai peilai, ae puletao vei teidei sü souveih dakhai peilai.

¹⁵ Enou Rathoki hai nasü zhua bupeilai, ae hai hinou tave veachi paoyu teitei kei peilai,

¹⁶ daiolouzü Enou Rathoki hai nasü doloure ae buh hai hinou Eye panou teisa thore donou soushee khaipeiwure. Enou hai nasü zhupeilai, ae vere teile teitei hia Enou hai nasü vupeilai.

¹⁷ Ne puo David büa nenou avei kuvah hai chilee chechea soupei louzü, avei chikhatao zütoua bulouzü, alia Enou ne hi kharochi peikhai touyu teitei soulouzü,

¹⁸ Enou ne puo David hi puhvei tyaosholea ye panou teisa Israel maiye tukha sa-a hrülai tea chaachou soukhai touyu nasü panou vete peilai.

¹⁹ Ana nenou moyuma nevei maitao nou avei chikhatao ae kharochi khesü pfütho louzü, ae rah kukhe liye thota louzü,

²⁰ Enou neye peikhai touyu teidei hinou polaiwulai, ae Eye panou tholai tea soushee khaitouyu Rathoki hai nasü Enou thaokhaiwua ta-a bailai. Süthaisü maikhe mainou Rathoki hai nasü konüa panou ngaora shoyu buh ali souwulai.

²¹ “Chuo louzü Rathoki hai nasü maikhe mainou tsükhou sho-a nou bue, ana takou takheyu maikhe mainou khupa sho-a nou haibüa noulai, ‘Daisounou Mapao nou teidei haina ae Rathoki hai nasü haibüa soupeiwe?’

²² Maikhe mainou haibüa chila peilai, ‘Puletao vei puopaoh maitaoye Ejipt teidei hinou sapa peiyu Ramai Mapao ye sü thaokhaiwua puletao nou rah kukheye thotayu donou Mapao nou haibüa soushi khaideshe.’ ”