2 PUOPAOKO 5 - SHEEYU BAIBEL (BSI)

¹ Veo Solomon nou Rathoki nasü souche louyu thai, puhnou Rathoki vei kini pojüyu kide hisü puh puo David nou Mapao hi posheelayu natao— shahu, sana ae na kukhe teitei sü pothou khaipeiwure.

Rathoki hi Vo Sübvü Pothou Khaiyu

² Mapao vei Vo Sübvü nasü David Nuhdu, Zion hinou Rathoki hi pothoure donou Veo Solomon nou Israel mai khü teitei hinou süthai-apei mai hrülaiye Jerusalem hi kuve jüloure.

³ Puletao mai hrülai nou khouh anai hi Sahpao Nüh nüyu teile hisü nou Veo nghoujü tave jüloure.

⁴ Süthai-apei mai hrülai nou tave jülouyu thai, Levi maitao nou Vo Sübvü nasü kaopoloua nou,

⁵ Rathoki hi pove khaiwure. Napao maitao ae Levi maitao nou Mapao nou buyu Sahpao ae sühi buyu na veishi sü Rathoki hi pove khaiwure.

⁶ Veo Solomon ae Israel maitao nou Vo Sübvü nghoujü nou tave jüa buloure, alia puletao nou choshalou hoyu kikhaorü hai dathaloua posheela peie.

⁷ Süthaisü napao maitao nou Mapao vei Vo Sübvü nasü poloua Rathoki hi polou Sheesheelai buh, shouh pfüyu cherubim khaona khe hisü khaiwure.

⁸ Shouh pfüyu cherubim khaona vei shouh nou Vo Sübvü ae Vo Sübvü kaopoa tayu süüpo khesü hopfüa bue.

⁹ Vo Sübvü kaopoa tayu süüpo taosü Sheesheelai buh nghoujü nou la-a zhu louzü ngaowe, ana buh kukhe hiolouzü zhingao moe. (Süüpo sütao sü chu koute-a sühinou bue).

¹⁰ Vo Sübvü hisü na kukhe halia ha-e, anou chuh ahai Israel mainou Ejipt teidei hinou tapa louyu thai Mapao ye koa Sinai Deichi hinou vo soukhai touyu, Moses nou chuh ahai hi chikhatao rükhai touyu likhei bubaie.

Mapao vei Aduso

^11-14 Me kukua buyu napao mai hrülai hai soushee-a bukhai touloure. Alia lou souyu Levi maitao— Asaph, Heman, ae Jeduthun, alia puletao vei khü hi buyu mai hrülai nou züzüyu sabanü banoukhai touloue. Levi maitao nou posheelabu vei teinghi palova sünou beibei ae shapoulei poa nou la-a bue, ae puletaoye koa napao mai kaihli-a kai hai shabe poa bue. Lou souyu maitao nou shabe, beibei, ae poa lou souyu basei tyatyali poloua veishoa nou haibüa Mapao ye lou sousho-e: “Mapao ye paosholo, daiolouzü puh hai vei-e, ae puhvei leshiyu hai akhai ha-e.” Napao maitao nou Rathoki hi talouyu phaki, sükhai toumoa vavei shoyu teihao ae Mapao vei khouko ava sünou Rathoki sü lou phou loure, südonou napao maitao hai Rathoyu vah haso khesü soupu loushi-a baire.