2 PUOPAOKO 36 - SHEEYU BAIBEL (BSI)

Judah hi Veo Joahaz

¹ Judah hi mainou Josiah nahpoutu Joahaz ye panou veo soure donou doloua theadzü napeiwure.

² Joahaz nou po kaisü hinou ve kouloue ae puhnou Jerusalem hinou khouh asü hai veo sou-e.

³ Süthaisü Ejipt hi Veo Neko nou puhye sü hukhamai soua Jerusalem hinou nüpoa tare, ae Judah maiye panou shahu sühcho 3,400 ae sana sühcho 34 hai kikha phasoua panou peie.

⁴ Neko nou Joahaz thaihou Eliakim panou Judah hi veo souloure, ae puh zhih hai Jehoiakim tea sada peiwure. Joahaz ye sü Ejipt hi Neko veo nou nüpoa tare.

Jehoiakim nou Judah hi Veo Souyu

⁵ Jehoikim nou Judah hi ve koulouyu phaki, puh hai po kaingou pare, ae puhnou Jerusalem hinou po kiali hai veo soue. Puhnou puhvei Ramai Mapao vei nghingao hinou vah ashi sü souwe.

⁶ Babilon hi Veo Nebukhadnezzar nou Judah hi reih hulou Jehoiakim ye sü nüloure, ae puhye hurai nou phuloua Babilon hi nüpoa tare.

⁷ Nebukhadnezzar nou Rathoki hi buyu paikhao taoli hai poloua pove puhvei ki hi khailoure.

⁸ Jehoiakim nou soupfüyu vah teitei, puhnou ngaorayu vah ashi soukhai touyu hai-a Israel ae Judah hi Vemaitao Larübvü hi rüthou peikhaitoue. Puh nahpoutu Jehoiakin nou puh thaosou pa Judah hi veo kouloue.

Judah hi Veo Jehoiakin

⁹ Jehoiakin nou veo koulouyu phaki puh hai po kiacha pare, ae puhnou Jerusalem hinou khouh asüa teithe kiarou hai veo soue. Puh-a Mapao vei nghingao hinou vah ashi khesü soure.

¹⁰ Süünghou ae poudai lapayu phaki, Veo Nebukhadnezzar nou Jehoiakin ye sü hukhamai soua Babilon hi nüpoa tare, ae Rathoki hi mutei shoyu na-a taoli poloua tare. Süthaisü Nebukhadnezzar nou Jehoiakin puo thaihou Zedekiah ye panou Judah ae Jerusalem hi veo soure donou vebuh peiwure.

Zedekiah nou Judah hi Veo Souyu

¹¹ Zedekiah nou ve koulouyu phaki puh hai po kaili pare, ae puhnou Jerusalem hinou po kiali hai veo soue.

¹² Puh-a Mapao vei nghingao hinou mahmo khesü soure, ae rachipaolawo Jeremiah nou Mapao vei chipao paopeiyu khesü khaophu souloua kei pei baire.

Jerusalem Kaodutayu

¹³ Veo Nebukhadnezzar nou Zedekiah ye panou Ramai zhih hinou puhvei khakhe hinou hrüa bailai tea chaachou soukhai touyu nasü khaitya pare, ae puhnou le khousholoua ledalou bare alia Israel maivei Ramai Mapao hi dakhai ve bare.

¹⁴ Süpei hinou Judah hi süthai-apei maitao, napao maitao ae maisou hai mahmo soua puletao pehao hinou hrüa buyu tyahrütao büa bashara khesü thotare; ae Mapao vuzünou soushee peikhai touyu Rathoki nasü puletao nou souzhaiwure.

¹⁵ Puletao vei puopaoh Ramai Mapao nou puletao hisü rachipaola peiyu maiye seive paopi peizha zhawe, daiolouzü puh nou puhvei maitao ae Rathoki nasü souha moa khaipei nüe.

¹⁶ Ana puletao nou Ramai vei ko paoyu maiye sü poa panü soure, ae rachipaola peiyu maiye sü ngaophou moa konüre, südonou akhai hisü kou Mapao vei lekha rarou nasü dusholoua puhvei maitao hisü vere.

¹⁷ Südonou Mapao nou Babilon hi Veo ye panou puletao pei hi reih souvere. Veo nou Judah hi nahlemai hrülaiye sü southawure ae Rathoki-a soushiwure. Puhnou Judah hi maiye sü taidu, naotu poutu, ae veishi sümoa zhuveayu aliro ha-a nou southakhai toure. Ramai nou haibüa mai hrülaiye sü puh bah hi thaothou peiwure.

¹⁸ Babilon hi veo nou Rathoki hi buyu kini, veo vei thou-dzü ae puhvei peikho maitao vei sana raka, alia Judah teidei hi buyu na veishi hai Babilon hi potare.

¹⁹ Puhnou Rathoki sü mei deiwure, ae Jerusalem kivo sü dakhowure, ae veo vei ki teitei sü mei deire alia muteiyu paikhao khesü soushi khaiwure.

²⁰ Shokhai toua buyu mai hrülaiye sü puhnou Babilon hi nüpoa tare, ae puletao hai Persia maivei vedei dushu loumo koute hai puhvei qila soua hrüe.

²¹ Rachipaolawo Jeremiah nou paokhai touyu chipao nasü vetere: “Soteithe reichelou moyu sü reiche loure donou teidei hai nasü po rainai hai maiye panou hrümoa bulai.”

Sairas Veo nou Jihudimaiye Lahvei Teidei hi Dakhai Velo tea Lüpeiyu

²² Persia hi veo Sairas nou ve koulouyu po araina hinou rachipaolawo Jeremiah nou paokhai touyu chipao sü panou vetere donou Mapao nou veo Sairas vei tsüle sü daipeia panou puhvei vedei teitei hisü haibüa kharochi rüloua panou shapao ta-e:

²³ “Persia hi Veo Sairas nou haibüa kharochi peiwe: Rakiva buyu Ramai Mapao nou deiphao hi buyu vedei veishi sü Eye peie, ae Puhnou Eye nou Judah teidei hi Jerusalem nuhdu hinou puhvei Rathoki nasü soushulo tea abah hi thaothou peiwure. Chuo, Ramai vei mai hrülai nou buh sühi ve tawo, ae puletaoye sü Ramai Mapao ye panou salai peilou theo.”