2 PUOPAOKO 35 - SHEEYU BAIBEL (BSI)

Josiah nou Tachopa Nüh Nülouyu

¹ Veo Josiah nou Mapao ye tsükhouyu hinou Tachopa Nüh hai Jerusalem hinou nüe, ae puletao nou khouh araina khoukha kiadai zhou khonüh nüre donou kikhaorü khesü datha loure.

² Puhnou napao maitaoye sü lah puletao nou soure vah nasü panou Rathoki hinou vah soure donou dothou peie, ae puletaoye panou vah soutou loure donou süpeie.

³ Israel maiye paodou peiyu Levi maitao hi puhnou haibüa soulo tea paoe, “David nahpoutu Solomon veo nou soupei khaitouyu Rathoki hisü sheeyu Vo Sübvü nasü pothou khailo. Neletao nou süna phao hinou kaopoa talai more, chuo neletao nou Ramai Mapao ae maikhe maivei kuvah sü buh hai hinou soua bailaire.

⁴ Veo David ae puh nahpoutu Solomon nou vah zhipei khaitouyu thaifüa neletao hai lahkuku vei khü thaifüa Rathoki hi vah sü soulo,

⁵ ae neletao hai Israel maiye soukha peire donou lahla nou bure sheeyu buh hisünou meme soua bulo.

⁶ Tachopa Nüh vei zhaotu ae nghitutao dathare donou chuo neletao hai naanou hilonou soushee-a bulo, ae Mapao nou Moses hi paopeiyu thaifüa neletao vei thaihou jürai maitaoye panou souda-a bulo.”

⁷ Süthaisü Veo Josiah nou lah puhnou kiyu kikhaorü hinou maisouye panou toure donou tachopa nüh vei posheela soua zhaotu ae nghitu theshirou, ae chode thesü peie.

⁸ Puhvei peikho maitao-a maisou hi, napao maitao hi, ae Levi maitao hi asasho-a nou popa peie. Rathoki hi peikho maitao— Napao Peichana Hilkiah, Zekhariah ae Jehiel puletao nou napao maitao hi zhaotu ae nghitu thehai-a kaihrou, ae chode kaihsü hai panou khonüh hi posheelare donou peie.

⁹ Levi maiye süthai-apei maitao— Konaniah, Shemaiah ae puhvei thaihou Nethanel, Hashabiah, Jeiel, ae Jozabad puletao nou zhaotu ae nghitu thengou, ae chode kaihngou hai Levi maiye panou khonüh hi posheelare donou peie.

¹⁰ Tachopa Nüh nüre donou souda cheyu thaisü, napao maitao ae Levi maitao nou linaonao nou bure buh hisü veo nou kharochi peiyu thaifüa buloure.

¹¹ Tachopa Nüh vei nghitu ae zhaotutao datha cheyu thai, Levi maitao nou souhee sü laowe ae napao maitao nou souzhe sü poloua posheelabu hi lazü peie.

¹² Süthaisü puletao nou Moses vei Chikha Larübvü hi rükhai touyu thaifüa Mapao hi meidei-a posheela peire donou sou khesü pfümounah thaifüa zha zhipeie.

¹³ Levi maitao nou sheeyu chikha zhai thaifüa tachopa nüh vei posheela peiyu sou khesü mei rouloure, ae shee-a nou popei khaitouyu sou khesü lee ae baosahu lee dutya hinou kholoua mai khemaiye thasho-a nou poa zhipeie.

¹⁴ Haibüa nou souyu thaisü, Levi maitao nou lahye donou ae Aaron vei tyaosholea hinou hrüveyu napao maitaoye donou sou khesü pokhai peiwe, daiolouzü napao maitao hai meidei-a posheelayu ae southeatao meideiyu donou khei koute hai zhoha sho-a nou vah soua bubaiwe.

¹⁵ Levi mai khü hinou Asaph vei tyaosholea mai haitao nou Veo David nou paopeiyu thaifüa lou sou-e: Asaph, Heman, ae veo vei rachipaolawo Jehuthun. Rathoki vei robomü khoyu Levi maitao hai lah puletao vei vahbu nasü thaokhai tumoe, daiolouzü puletao vei thaihou jürai Levi mai kukhetao nou puletaoye donou souda peie.

¹⁶ Veo Josiah nou kharochi peikhai touyu büa süzhou hai puletao nou Mapao ye thoyu, Tachopa Nüh nüyu, ae posheelabu hi meidei-a posheela peiyu teitei sü souloue.

¹⁷ Teithe anai koute hai Israel mai hrülai nou Tachopa Nüh ae Khei thoumoyu Raokhao Nüh hai nüe.

¹⁸ Daoh Samuel rachipaolawo vei teile hinou zhouvu Tachopa Nüh nüyu büa nüh nükhai timo hie, ae veo kukhe maitao nou Veo Josiah, napao maitao, Levi maitao ae Judah, Israel alia Jerusalem maitao nou Nüh nüyu büa nümo hie.

¹⁹ Veo Josiah nou veo soulouyu po kiacha kou Tachopa Nüh sü nüloue.

Josiah nou Veo Souyu Akhai

²⁰ Veo Josiah nou Rathoki hi soure vahtao soucheyu thai, Ejipt hi veo Neko nou Euphratis reipe hinou buyu Karkhemish hi reih souvere. Veo Josiah nou puhye panou reih hulou more donou nu-e,

²¹ ana Neko nou Josiah hi haibüa ko paove-e, “Judah hi Veo, Enou reih souyu hai nasü ne pei hi reih soulai toumoe, ana Eye ngaobayu mai hi reih soulai tea soua baie, ae Ramai nou Eye thasho-a reih soutarao tea paowe. Ramai nou Eye koa salaiwe, südonou ne talou Eye reih souso, ne talou Eye reih soulouzü ne-a ha bailai.”

²² Ana Josiah nou reih soure donou le laloure, ae Ramai nou Veo Neko hinou pao veyu chi sü zübare. Südonou puhnou zhai soudaloua Megido deikho hinou talou reih soutare.

²³ Reihbu hinou Veo Josiah ye sü Ejipt maivei voulouthou ali nou kavu peiwure. Südonou puhnou puhvei kilai maitao hisü “Thasho-a Eye satawo, daiolouzü Eye zhishi showure” tea kharochi peie.

²⁴ Südonou puhvei kilai maitao nou puhye sü puhvei rheiluki hinou poloua puhvei rheiluki ahai na hisü pothouloua Jerusalem hisü savere. Puhsü buh sühinou ve thaire, ae puhye veo maivei khüh hinou poa vupeie. Judah ae Jerusalem mai hrülai nou puh thaiyu donou dopfü peie.

²⁵ Rachipaolawo Jeremiah nou Veo Josiah thaiyu donou dopfüa khouli liyu lou ali dapei khaitoue. Lou hainasü Israel mainou naotu poutu sümoa lou souyu mainou dopfüa khouli liyu phaki lou hainasü zhaodao koute-a souwe. Lou hai nasü dopfüa khouli liyu larübvü hisü rüthou peikhaitoue.

²⁶ Josiah nou soupfüyu vah haso teitei, puhnou Mapao ye thoyu, Chikhatao züyu,

²⁷ ae puhvei ko arai hinou poa akhai koute hai Israel ae Judah vei Vemaitao Daomaiko Larübvü hi rüthou khaitoue.