2 PUOPAOKO 34 - SHEEYU BAIBEL (BSI)

Judah hi Josiah nou Veo Souyu

¹ Josiah nou ve koulouyu phaki puh hai po acha baihie, ae puhnou Jerusalem hinou po shiali hai veo soue.

² Puhnou Mapao vei nghingao hinou vah haso aveih ae kaozü vah khesü soupeie, ae puh paoh David nou hrüa tayu büa puhnou Ramai vei chikha teitei sü soutaosoua züa nou hrüe.

Cheche moyu Rah thoyu khesü Josiah nou Aetimoyu

³ Josiah nou veo koulouyu po acha navasü puh hai nahsho-a buyuma puhvei puopaoh David vei Ramai ye sü thotare. Süthai po adai cheyu phaki, puhnou Judah ae Jerusalem hi cheche moyu rahtaoye thoyu buh, Asherah rahpfüpai vei zhuraitao, ae bashara khesü soushi tare.

⁴ Puhnou puhvei maitaoye seiho Baal ye thoyu buh ae süpehao hinou buyu poukai nüvei meideiyu posheelabu khesü panou daphe daphosasa khaiwure. Puletao nou Asherah rahpfüpai zhuraitao ae bashara kukhe teitei sü daphesasa loua poho sütaoye thoyu maitao khü pei hi laikhai peiwure.

⁵ Puhnou rah kukheye thoyu napao maitao vei rao khesü posheelabu hinou poa meidei peie. Haibüa puhnou Judah ae Jerusalem hai naanou hilonou sousheepu peie.

⁶ Puhnou Manasseh, Ephraim ae Simeon alia Naphtali nuhdu veishi hia ae soushi khaitouyu pehao teitei hia raibütoua soupeie.

⁷ Reilova buyu Israel maivei vedei teitei hia puhnou taho cheche moyu ramaiye thoyu posheelabu ae Asherah vei zhuraitao, basharatao, ae poukai nüvei meidei-a posheelabu veishi sü daphe daphosasa kou deiphi hi khaipeie. Süthaisü puhnou Jerusalem hi dakhai vere.

Chikha Larübvü Ngaolouyu

⁸ Josiah nou veo soulouyu po kiacha kousü puhnou teidei hi ae Rathoki soushee chelouyu thai, puhnou Azaliah nahpoutu Shaphan, Jerusalem nuhdu khowo Maaseiah, ae nuh teidei peikhowo Joahaz nahpoutu Joash puletaoye panou shitayu Rathoki nasü soure donou seita-e.

⁹ Rathoki khoyu Levi maitao nou Rathoki hinou khalouyu poushatao sü Napao Peichana Hilkiah bah hi thoupeie. (Haitao hai Ephraim, Manasseh, ae Reilova buyu Israel maitao, Judah, Benjamin ae Jerusalem hinou buyu maitao hinou kha louyu poushatao-e.)

¹⁰ Süthaisü poushatao hai shitayu Rathoki nasü soure mai asü bah hi peiwure, ae puletao nou poushatao sü poloua

¹¹ süü vah souyu maitao ae chuh vah souyu maitao hi peiwua panou süü chuh hüloua poa Judah hi veo maitao nou pa shitayu Rathoki nasü soure donou peiwure.

¹² Vah souyu maitao nou maicheshoa vah sü soutaosoua soutou toupeie. Vah souyu maitaoye zhupeire donou Levi mai adai: Merari khü hinou Jahath ae Obadiah, alia Kohath khü hinou Zekhariah ae Meshullam. (Levi mai haitao hai lou sou veishoyu mai khaitoue.)

¹³ Levi mai kukhetao nou na polayu ae vah kukhe hi zhupeiwe, ae kamai-a nou soupfüa buyu vahtao hai rükhai peiwe ae khekhe mai-a nou reihkhao souwe.

¹⁴ Rathoki hinou pousha popayu phaki Napao Peichana Hilkiah nou Moses hi Ramai nou peikhai touyu Mapao vei Chikha Larübvü nasü ngaoloue.

¹⁵ Süthaisü Hilkiah nou Shaphan hi paoe, “Enou Rathoki hinou Chikha Larübvü sü ngaoloue.” Ae Larübvü nasü puhnou Shaphan hi peie,

¹⁶ ae Shaphan nou Larübvü nasü Veo hi pove peiwua haibüa paoe, “Nenou kharochi peikhai touyu vah teitei sü souche loure.

¹⁷ Rathoki hinou buyu poushatao sü Etao nou poloua vah souyu maitao ae puletaoye zhupeiyu maitao bah hi thou peiwure.”

¹⁸ Süthaisü Shaphan nou Veo hi paopue, “Napao Peichawo Hilkiah nou ahi Larübvü ali peikhai toue.” Shaphan nou sünasü Veo hi phoungaoe.

¹⁹ Veo nou Chikha Larübvü phoungao peiyu nasü choulouyu phaki, puhnou puhvei sabanü sü paiphawure,

²⁰ ae puhnou Hilkiah, Shaphan nahpoutu Ahikam, Mikaiah nahpoutu Abdon, Shaphan, chikuyu ki hi rü-apeio, ae Asaiah, alia veo vei kilai maitao hi haibüa kharochi peie:

²¹ “Taho Eye donou ae shokhaitoua buyu Israel ae Judah maitao donou Mapao hi noukhaio. Larübvü hi daitoua paodou peikhai touyu khesü phoupalo. Mapao nou Etao pei hi raroure, daiolouzü Etao vei puopaoh maitao nou Mapao chi sü zülou more ae larübvü hai hinou soupfülo tea paopeiyu khesü soulou more.”

²² Veo nou kharochi peikhai touyu thaifüa Hilkiah nou kukhe maitaoye saloua rachipaolawo Huldah pfüpai hisü talai tea tare. Honapai hai Jerusalem nuh ashu hilo vanou bue. (Puh chaa zhih hai Shallum toue, puh sü Harhas tyao, Tikvah nahpoutu-e ae puhnou rathoki vei sabanü zhuwe). Puletao nou honapai hisü tave vepayu ko khesü paongao peie,

²³ ae honapai nou puletao hi dakhai ve veo hi haibüa

²⁴ Mapao nou paowe tea paopeio tea paoe, “Enou teidei hai hi hrüa buyu mai hrülai hisü larübvü hinou veo hi phoungao peikhai touyu chaatao sü seive souvea peilai.

²⁵ Daiolouzü puletao nou Eye thaowua ramai kukhe hi poukai nüvei meidei-a posheela peire, ae puletao nou soukhai touyu vahtao sünou avei lekha soupa peiwure, ae avei lekha nasü buh hai hi lakou peilai, ae süsü panou akhai bulai moe.

²⁶ Ana Mapao hinou kabülai tea noulo tea neletaoye seiveyu Judah hi veo hisü Israel maivei Ramai Mapao nou haibüa paowe tea paopeio: Nenou Chikha Larübvü hi rüthou khaitouyu tao choulouyu phaki,

²⁷ nenou ledaloua anghoujü nou tainou souloure, ae Enou nuh teidei hai hinou hrüa buyu maitaoye tudee peilai tea paopi peiyu phaki nenou nevei sabanü paiphawua kra-a ahi veachi paoyu sü Enou chouloure,

²⁸ ae Enou nuh teidei hai hi tudee laiyu nasü ne thaita mojü Enou soukhai laimore. Enou neye sü panou kaona-a thai loulai.” Puletao nou Veo Josiah hisü ko hai khesü ve paopeie.

Mapao Chi Züa Hrüre donou Josiah nou Vo Souyu

²⁹ Süthaisü Veo Josiah nou Judah ae Jerusalem hi süthai-apei mai hrülaiye kuve jüloure,

³⁰ ae puletao mai hrülai nou Rathoki hi napao maitao, Levi maitao ae nuh teidei hinou hrüa buyu mai hrülai sü tave jüloure. Mai hrülai nghoujü hinou Veo nou Rathoki hinou ngaolouyu Vo Larübvü nasü teitei nou phoungao peie.

³¹ Süthaisü Veo nou puhvei buh hinou laloua Larübvü hi rüthou peikhai touyu thaifüa puletao vei tsüle teitei ae hrümai veishi nou peia Mapao chi zülai, puhvei chikhatao ae kharochi teitei sü zülai tea vo ali souloure.

³² Veo nou Benjamin mai hrülai ae Jerusalem hinou hrüa buyu mai hrülaiye panou Vo soukhai touyu hainasü züa hrülai tea chaachou souloue. Jerusalem hinou hrüa buyu maitao nou puletao vei puopaoh Ramai ye koa vo soukhai touyu nasü züa hrüpeie.

³³ Veo Josiah nou Israel maivei teidei hinou ngaora-a buyu bashara teitei sü souhawure, ae puhnou hria buki sasü Israel maiye panou puletao vei puopaoh Ramai Mapao chi züa puhvei kuvah sü panou souloue.