2 PUOPAOKO 33 - SHEEYU BAIBEL (BSI)

Manasseh nou Judah hi Veo Souyu

¹ Manasseh hai po kiahai hinou pa Judah hi veo souloue, ae puhnou Jerusalem hinou po raingou-angou hai veo soue.

² Israel mainou talou füdei polou mojü tyahrü kukhe maitao nou ngaorayu vah haso soupfüyu büa puhnou Mapao nghingao hinou vah ashi khesü soue.

³ Puh puo Hezekiah nou soushi khaitouyu basharatao thoyu buh khesü puhnou soushupu loure. Puhnou Baal rahye thore donou posheelabu soupeie, Asherah rahpfüpai zhurai sü souloure, ae puhnou teivu khesü thotare.

⁴ Mapao ye panou teisa thore donou tea soukhai touyu Rathoki koute-a puhnou cheche moyu ramaiye posheelare donou posheelabu sü southou khaipeiwure.

⁵ Rathoki pa hi maisou vejüa buyu buh ahai hisü puhnou teivutaoye thore donou posheelabu soukhai peiwure.

⁶ Puhnou puh nahpoutu maitao koute-a Hinnom Deikho hinou dathaloua meidei-a posheela peie. Puh hai prou soua rako zhure, keingumai, kheikhupado souyu mai, ae thaimai rako hinou dai-e vepalai touyu khesü noutare.

⁷ Puhnou bashara khesü Rathoki hi polou khailoure. Rathoki süna vanou Ramai nou haibüa David ae puh nahpoutu Solomon hi paoe, “Israel mai khü kiahai buyu hrohinou, Enou Jerusalem hinou ae Rathoki haina hinou Eye panou thore donou dopa khaitoue.

⁸ Israel maitao nou avei kharochi ae avei kilai Moses nou peikhai touyu chikha khesü züa hrülouzü, Enou puletao puopaoh hi peikhai touyu teidei hinou puletaoye sü hulai laimoe.”

⁹ Manasseh nou Judah ae Jerusalem hi maitaoye süthaimah poho panou Israel maitao nou talouyu phaki, Mapao nou hulai peiyu tyahrütao jünou-a vah ashi khesü soupu tare.

Manasseh nou Leda Louyu

¹⁰ Mapao nou Manasseh ae puhvei maitao hi paopi peie, ana puletao nou kei peibare.

¹¹ Südonou Mapao nou Assaria hi veo vei reihmai peikhoyu maitaoye panou Judah teidei hisü reih hulou poloure, ae Manasseh ye nüloua puhye hurai nou phuloua Babilon hi süthai poa tare.

¹² Puhnou veashoa buyu teile hinou puh sü nataiyu hrü hi kou hrüloua puhvei Ramai Mapao hinou soukha sü khore.

¹³ Manasseh nou veachi paoyu sü Ramai nou kei peia puhye sü panou puhvei vedei Jerusalem hi dakhai ve panou veo soupu loure. Süthaisü Manasseh nou Mapao hai Ramai cheche-e touyu süloure.

¹⁴ Hai thaisü, Manasseh nou David vei Nuhdu kivo vakou buyu nahai teinghi palova nou Gihon dzüla reilova khete, Kha Robomü koute ae Ophel tea kuyu nuhdu hi koute sü kivo khokukhe loure. Puhnou kaopo khokhai touyu nuhdu teitei hisü reihmai me peikhoyu peikho mai khailoure.

¹⁵ Puhnou vakou maivei rahtao ae bashara khesü Mapao vei Rathoki hinou popa laiwure, ae puhnou Mapao vei Rathoki deichi hinou soukhai touyu posheelabu teitei sü nuhdu vakou hi popa khilaiwure.

¹⁶ Puhnou Mapao ye thoyu posheelabu nasü souveipu peie, ae sühinou puhnou chavei lathao-a hrüloure ae kalo vei posheela sü meidei-a posheela peie. Puhnou Judah hi hrüyu mai hrülai hisü Israel maivei Ramai Mapao ye tholo tea kharochi peie.

¹⁷ Kukhe mainou posheelabu kukhe hinou posheela peia buyuma puletao nou Ramai Mapao hi likhei sheela peia baie.

Manasseh vei Hrümai Akhai Souyu

¹⁸ Manasseh nou soupfüyu vah teitei, puhnou puhvei Ramai hi veachi paoyu, ae rachipaola-apei maitao nou Israel maivei Ramai Mapao zhih hinou puh hi chi paopeiyu teitei sü Israel maivei Vemaitao vei Hrümai Ko Larübvü hi rüthou peikhaitoue.

¹⁹ Veo nou veachi paoyu ae Ramai nou puhvei veachi kei peiyu, ae puhnou ledalou mojü mahmo souyu teitei— puhnou vah ashi souyu, cheche moyu rahye thoyu ae Asherah rahpfüpai vei zhurai daoyu ae puhnou basharataoye thoyu veishi sü Rachipaola peiyu maitao Larübvü hi rüthou peikhaitoue.

²⁰ Manasseh thaiyu thai, puhvei thaiphao hai veo vei ki fühao hinou vupeie, ae puh nahpoutu Amon nou puh thaosü pa ve kouloue.

Amon nou Judah hi Veo Souyu

²¹ Amon nou po kaihai hinou Judah teidei hi pa veo souloue, ae puhnou Jerusalem hinou po ahai hai veo soue.

²² Puh puo Manasseh büa puhnou Mapao vei nghingao hinou mahmo khesü soure, ae puh puo nou thoyu basharataoye puhnou thore.

²³ Puhnou puh puo büa ledaloua Mapao hi dakhai velou more, ana mahmo khesü soupua baire.

²⁴ Amon khakhe hinou peikhoyu maitao nou shodo souloua puhye sü lah puh ki hinou southawure.

²⁵ Judah hi mainou Amon ye southayu maitaoye southawua puh nahpoutu Josiah ye panou ve kouloue.