2 PUOPAOKO 32 - SHEEYU BAIBEL (BSI)

Assaria Mainou Jerusalem ye Soupiyu

¹ Veo Hezekiah nou haibüa vah haso aveih ae Mapao ye puhvei tsüle teitei nou peia puhvei kuvah soupeiyu thai, Assaria hi Veo Sennakherib nou Judah teidei hi reih huloure, ae kivo veisho-a soukhai touyu nuhdu khesü poloulai tea sühao loure.

² Sennakherib nou Jerusalem hi reih huloure donou souda-a bure touyu sü Hezekiah nou sülou khai-e,

^3-4 Assaria maivei reih maitao nou Jerusalem hi nghikouyu phaki panou dzü ngaolou hore donou nuhdu pe hi dzü kü kouyu taosü puh ae puhvei peikho maitao nou ngilaire donou lela loure. Südonou peikho maitao nou mai taoli salou-a taho dzüla sü nure, sübüa panou dzü kükou more.

⁵ Veo nou nuhdu hi panou soureih hulou louhore donou shitayu kivo khesü khopu loure, ae reihkhaobutao-a veisho-a nou souloure, alia nuhdu vei kivo vakou hinou pa kivo kukhe ali khopa loure. Süpei hinou, puhnou Milo tea nou kuyu Jerusalem vei teinghi palova buyu hi deinai thoukhai touyu buh hia reihkhaobu soukhai loure. Puhnou heung ae rü-a taoli tuda khailoure.

⁶ Puhnou maikhe maiye khopeire maitaoye dopeie, ae puletao mai hrülaiye nuhdu vei robomü buyu kijüdu hi tave jülo tea kharochi peie. Puhnou puletao hisü haibüa paoe,

⁷ “Leche pfülo ae khuveilo, Assaria maivei veo, moyuma puhnou salaiyu reihmaitaoye sü ngaopiso, daiolouzü puhye salaiyu maitao jünou Etaoye salai peiyu na-a khouko veipu hie.

⁸ Puh hi louzü deiphao maivei khouko bua baie, ana Etao hiolouzü Etaoye soukha peire ae reih soukha peire Etao Ramai Mapao bue.” Veo Hezekiah vei chipao sünou maikhe maivei tsüle sü soudu peiwure.

⁹ Phajütou buyu thaisü, Assaria hi veo nou puhvei reihmaitaoye koa Lakhish hi buyu teile hinou puh vei peikho maiye Judah hi Veo Hezekiah ae Jerusalem hinou buyu peikho maitao hisü haibüa kopomaiye seive paoe,

¹⁰ “Assaria hi Veo Sannakherib nou haibüa paoe, ‘Jerusalem nuhdu khevanou neletao dai-e louche-a nou buwe?

¹¹ Hezekiah nou neletao hisü neletao Ramai Mapao nou neletaoye sü Etao vei bah hinou khailupa peilai tea paowe, ana Hezekiah nou neletaoye sü süthai mah peiwua panou neletaoye sü khü-züa thai-a bailai.

¹² Hezekiah nou Mapao vei rathoyu buh ae posheelabu kukhe sü souha khaipeire, ae süthaisü Judah ae Jerusalem hinou hrüa buyu maitao hi posheelabu ali khei hinou meidei-a ratho bailai tea paoe.

¹³ Avei puopaoh maitao ae Enou tyahrü kukhe maitao hi dai-e soupeie touyu neletao nou sümovu? Tyahrü kukhe nou thoyu rah kananou puhvei maitaoye Assaria veo bah hinou khailupa louyu bue?

¹⁴ Tyahrütao vei rah kananou puhvei maitaoye Etao bah hinou vupa louyu bue? Neletao nou thoyu rah nanou neletaoye vupa peilai tea kabüa neletao nou tsü chowe?

¹⁵ Südonou chuo Hezekiah ye panou haibüa neletaoye süthai mah peiso, ae puhye loucheso. Daiolouzü tyahrütao vei rah ali koute-a lah puhvei maitaoye abah hinou khailupa loumoe. Südonou neletao vei Ramai-a neletaoye abah hinou khailupa peilou hoe.’ ”

¹⁶ Assaria maivei peikho maitao nou Ramai Mapao ye ae puhvei kilaiwo Hezekiah hai jünou-a shisho-a paopeie.

¹⁷ Assaria hi veo nou seiko seiveyu hisü haibüa Israel maivei Ramai Mapao ye paoshi peie, “Tyahrü kukhe maitao vei ramaitao nou puletao vei maiye abah hinou khailupa louhoyu büa Hezekiah vei Ramai-a puhvei maitaoye abah hinou vupa louho-e.”

¹⁸ Assaria hi peikho maitao nou Jerusalem nuhdu hisü talapa-a poloure donou puletao nou kivo hinou buyu maitaoye panou choulou-a ngaopire donou seiko nasü pai chishoa Hebrew mai la hinou phoungao peie.

¹⁹ Puletao nou Jerusalem maivei Ramai ye deiphao mai bah nou soukhai touyu tyahrü kukhe maitao vei ramai ali hi paoyu büa paopeie.

²⁰ Süthaisü Veo Hezekiah ae Amoz nahpoutu Isaiah nou hai vanou veachi pao-a Ramai hinou soukha sü khore.

²¹ Mapao nou rakivamai ali seive Assaria maivei reihmaitao ae peikhoyu maitaoye southa khaiwure. Südonou veo sü hrao ngao-a lah puhvei teidei hisü dakhai tare. Ae teithe ali puhnou puhvei rahye tholai tea rathoki hi veyu phaki, lah puhvei nahmai kamai-a nou puhye sü buh sühinou khoche nou daothawure.

²² Haibüa Mapao nou Hezekiah ae Jerusalem hinou hrüyu maitaoye Assaria maivei Veo Sennakherib bah hinou khailupa peie, ae puletaoye ngaobayu mai kukhe hinou-a vupa peie, ae puhnou puletaoye panou hateitei hinou kaona-a hrüe.

²³ Mai alao sou Jerusalem hi tave Mapao ye posheela peie, ae Veo Hezekiah ye sapeina khesü pove peie, süthai sünou tyahrü hrülai nou Hezekiah ye tsükhou peie.

Hezekiah nou Souyu ae Khaophu Souyu

²⁴ Teile süphaki Veo Hezekiah hai souloua nou thainonore. Puhnou Mapao hi veachi paoyu phaki Mapao nou puh hi veiloure donou shee ali soupeie.

²⁵ Ana Hezekiah nou khaophu sousholoua Mapao nou puhye souvei peiyu muh sü sülou more, südonou Judah ae Jerusalem mai hai veahoyu sü ve dao-e.

²⁶ Akhai hi kou Hezekiah ae Jerusalem hinou hrüa buyu maitao hai ledaloua tainou souloure, südonou Mapao vei lekha rarou nasü puletao hi ae Hezekiah hrüa buki sasü vemore.

Hezekiah vei Kinitao ae Puhvei Duso

²⁷ Veo Hezekiah hai tounghi shopare, ae mai hrülai nou puhye sü tsükhou-e. Puhnou puhvei sana, shahu, mutei chuhtao, pou kainüveitao, rütao, ae mutei nakhe khaire donou ki ali soushuloue.

²⁸ Süpei hinou, puhvei thou-dzü ae oliv theadzü khaire donou-a ki kukhe ali souloue; ae puhvei kikhaorü ae zhaotu khaiyu ve-a taoli bue.

²⁹ Haitao buyu pei hinou Ramai nou puhye zhaotu, kikhaorü ae kini taoli peiyu donou puhnou nuhdu alao soushu puloue.

³⁰ Veo Hezekiah nou Gihon dzüla nasü khulaiwua panou dzütao hai Jerusalem kivo khevai külou peie. Hezekiah nou souyu vah veishi hai puhnou veilouyu sü souloue.

³¹ Teidei hi khupayu vahtao sü Babilon hi sühseita maiye seive puh hinou nou-e. Ramai nou puhvei tsüle zhure donou puhye sü panou lah puhnou sounü vah khesü souloue.

Hezekiah vei Hrü Akhai

³² Hezekiah nou soupfüyu vah teitei ae puhnou Mapao vei kuvah souyu khesü Rachipaolawo Amoz nahpoutu Isaiah vei Larübvü alia Israel ae Judah maivei Vemaitao Larübvü hi rüthou khaitoue.

³³ Hezekiah nou puhvei puopaoh maitaoye koa zhitare, ae puhye sü veo maitao khüh peido hinou poa vupeie. Judah ae Jerusalem hinou hrüyu mai hrülai nou puh thaiyu phaki puhye tsükhou peie. Ae puh nahpoutu Manasseh nou puh thaosou pa ve kouloue.